Eldur í bindi og blúndudama sigrar

Það verður að teljast dálaglegt afrek hjá Degi B. Eggerssyni að ná fyrsta sætinu, einkum í ljósi þess að hann var sá eini sem gaf kost á sér í það sæti. Ef Björk Vilhelmsdóttir hefði líka ágirnst fyrsta sætið hefði hún sigrað en Dagur tapað.

Annars er Dagur vel að toppsætinum kominn. Hann er ákaflega vel greiddur hvundags, með skottarapróf í lækningum og svo gífurlega háfleygur í tali, að ekki er á færi annarra en latínumanna að skilja hann til fullnustu. Þá mun Dagur öðrum fremri í að haga orðum sínum á þann hátt að sumir fara jafnvel að halda að þessi hástemmda blúndudama sé efni í stjórnmálamann. Einnig ku Dagur vera varaformaður Samfylkingarinnar, en það er ákaflega virðingarverð staða og vandmeðfarin.

Og rétt í þessu frétti ég af sanntrúuðum samfylkingarmanni, sem varð fyrir því óláni í kvöld að það kviknaði í bindinu hans þegar hann beygði sig fram yfir borð sem logandi kert stóð á. Eldurinn læsti sig óðfluga úr bindinu í nef mannsins og höfuðhár. Á þessari stundu er ekkert vitað um afdrif þessa óhamingjusama samfylkingarmanns, en fyrr í kvöld kom í ljós að hann hafði tapað illilega í prófkjöri. Á þessum manni hefur því á einni kvöldstund sannast hið fornkveðna: Þegar ein báran rís er önnur vís. 

Átta atkvæði milli Bjarna og Dofra

Kosningasvindl í Hafnarfirði; Gaflara-Rósa borin ráðum í prófkjöri

Ekki trúi ég að íhaldsskepnurnar í Hafnarfirði séu svo heillum horfnar og skyni skroppnar að þær hafi hafnað Gaflara-Rósu í prófkjörinu í dag, þrátt fyrir að Rósa sé óumdeilanlega þeirra eina von um að koma fulltrúa að í bæjarstjórn Hafnarfjarðar í vor. En þó að vegir Guð séu órannsakanlegir, þá eru vegir bófaflokksins sem kennir sig við sjálfstæði (hvaða sjálfstæði sem það nú er) rannsakanlegir. Ef Gaflara-Rósa nær ekki fyrsta sætinu þá hafa verið brögð í tafli, kosningasvindl. Það er nefnilega óhugsandi að Rósa geti tapað í svona prófkjöri, allrasíst fyrir einhverjum Vladimír Svavarssyni sem enginn þekkir og enginn vill þekkja, nema ef til vill Svavar Gestsson faðir hans.

Mjótt á mununum í Hafnarfirði

Afbragðs listi undanrennufólksins í 101

Vel virðist ætla að takast til með framboðslista Samfylkingarinnar fyrir borgarstjórnarkosningarnar í Reykjavík að þessu sinni. Hver undanrennudúkkan uppaf annari skipar efstu sætin svo jarðbundnu fólki klígjar uppí háls. Þó er enn óljóst með afdrif orkuveituvarphænunnar ferðaglöðu, Sigrúnar Elsu, en sem stendur skrapar hún botninn í prófkjörinu. En eitt er víst: Það mun ekki verða töluð vitleysan í framvarðarsveit Samfylkingarinnar fyrir borgarstjórnarkosningarnar þó svo að flestum muni þykja orðfærið sem þar verður viðhaft álíka bragðmikið og vatnsblandað undanrennuskólp.

Dofri kominn í fimmta sætið

Verkalýðshreyfing í höndum auðvaldsdindla

Eitthvað virðast slagorð VR, ,,virðing og réttlæti" hafa aðra merkingu en orðanna hljóðan í höfði meirihluta stjórnar VR. Stjórn stéttarfélags sem gerir allt sem í hennar valdi stendur til að fela upplýsingar um fjármál félagsins er að sjálfsögðu gjörsamlega óhæf. Það vill nefnilega þannig til, að stéttarfélög eru tæki í eigu þeirra sem eru fullgildir félagsmenn í þeim en ekki einkahlutafélag örfárra manna sem valist hafa til forystu. Auðvitað eiga fjármál stéttarfélaga að vera galopin öllum félagsmönnum sem og athafnir og ákvarðanir stjórnar. Ef stjórnarmenn stéttarfélaga geta ekki beygt sig undir þessa sjálfsögðu skyldu eru þeir einfaldlega ekki starfi sínu vaxnir.

Þróun almennu verkalýðshreyfingarinnar á Íslandi hefur verið ein allsherjar sorgarsaga síðustu 10 - 20 árin. Til forystu hefur valist fólk sem ber litla sem enga virðingu fyrir láglaunafólki, ganga erinda auðvaldsins í smáu sem stóru og berjast eins og ljón gegn stéttarbaráttu og raunverulegu réttlæti. Í búsáhaldabyltingunni fyrir ári síðan sveik verkalýðselítan alþýðu landsins eftirminnilega með tómlæti sínu og aðgerðarleysi. Það er nayðsynlegt að launafólk beri gæfu til að endurheimta verkalýðshreyfinguna úr höndum hinna auðvirðilegu auðvaldsdindla sem halda hreyfingunni í gíslingu. Til þess að það megi verða þarf skipulagða baráttu.

Ég óska Bjarka Steingrímssyni, Guðrúnu Jóhönnu Ólafsdóttur og Ragnari Þór Ingólfssyni velfarnaðar og þolinmæði í baráttu sinni gegn drottnunarvaldinu í VR. Góður málstaður og ómæld þolinmæði í mótlæti og meðbyr eru þau vopn sem best bíta þegar upp er staðið.    

Segja fjármál VR hulin

Frú Ingveldur harðneitaði fyrir rétti

Eins og við var að búast, harðneitaði frú Ingveldur fyrir rétti að hafa skitið á stéttina fyrir dyrum nágranna sinna aðfaranótt 16. ágúst 2008. Að vísu viðurkenndi hún með ánægju, að henni væri í nöp við umrædda nágranna, en að sjálfsögðu myndi henni aldrei detta í hug að fórna mannorði sínu góðu við jafn lítlmótlega iðju sem þá að ganga örna sinna fast uppvið útidyrahurð drullusokka og aumingja. Hinsvegar kvaðst frú Ingveldur þeirrar skoðunar, að nágrannar sínir væru fullfærir um að hafa unnið það verk sem hún væri grunuð um. Og meir en það: Hún hafði sjálf séð með sínum eigin augum þegar nágrannakonan lét frá sér óþrifnaðinn á stéttina.

Eftir réttarhaldið skipaði frú Ingveldur Kolbeini Kolbeinssyni eiginmanni sínum að fara á stundinni yfrum til nágrannahjónanna og lúberja þau. Væddur lurki hljóp Kolbeinn af stað til að uppfylla bón konu sinnar. Á gangstéttinni milli húsa lenti Kolbeinn í hörðum árekstri við konu á reiðhjóli með þeim afleiðingum að hjólreiðarkonan féll í götuna og rotaðist, en hann sjálfur kastaðist útá götu og varð fyrir bifreið sem kom þar aðvífandi.    

Yfirheyrðir fram yfir miðnætti

Svavarsistinn fíflar Bjarna Ben og Kögunarstrákinn

Helvíti er hann Steingrímur nú röndóttur að fífla Bjarna Ben og Kögunarstrákinn með sér til Hollands til að stunda tilgangs- og innihaldslaust kerfiskallaogkellingamal við fjármálaráðherra Hollands og bankamálaráðherra Bretlands.

Á síðustu mánuðum hefur Steingrímur verið að hasla sér völl sem ágætur kapítalisti og kerfiskall hinna auðvaldslegu gilda. Má í því sambandi að segja, að hann hafi komið útúr skápnum, sem er auðvitað mjög gleðilegt utaf fyrir sig. Það hefur svo sem lengi verið vitað að Steingrímur væri býsna mikill velunnari kvótakerfisins illræmda, sem gerði auðvaldsillþýðinu á Íslandi kleyft að stela fiskveiðiauðlind þjóðarinnar til sinna prívatafnota. Linkind Steingríms gagnvart kvótakerfinu hefði eitt og sér, ásamt krónískum undirlægjuhætti hans við Svavar Gestsson og Álfheiði piff Ingadóttur, átt að kveikja ljóstýru í höfðinu á þeim sem telja enn þann dag í dag að pilturinn sé sósíalisti, jafnvel vinstrisósíalisti! En því miður er þessi kúnstugi vinstrihöfðingi einungis svavarsisti, sem merkir hægrisinnaðan mann sem felur sig undir skikkju vinstrisnobbs sem á ekkert skilt við sósíalisma.  

Hollendingar gefa sig ekki

Ábyrgðarleysið ríður ekki við einteyming

Það ríður ekki við neinn andskotans einteyming bölvað ábyrgðaarleysið í þessu okkar volaða þjóðfélagi. Ekki er nóg með að Ólafur Ólafsson bóndi á Miðhrauni í Miklaholthreppi hafi tryggt sér Samskip á yfirnáttúrlegan hátt, heldur hefur Landhelgisgæslan með dómsmálaráðherra í fylkingarbrjósti hætt að leita að ísbjörnum fyir norðan land.

Að láta undir höfuð leggjast að leita betur að hinum blóðgrimmu villidýrum er svo hræðilega ábyrgðarlaust að gengur glæpi næst. Það þýðir lítið fyrir dómsmálaráðherra og forstjóra Landhelgisgæslunnar að klóra sér í rassinum og bora í nefið þegar fregnir berast suður yfir heiðar þess efnis að ísbirnir hafi drepið og étið tugi eða hundruði Norðlendinga á nokkrum dögum.

Hugsið ykkur ef tylft ísbjarna gerði innrás á fjölmennan dansleik eða stórfund sjálfstæðismanna fyrir norðan. Það þyrfti ekki að spyrja að leikslokum í þessháttar rimmu, nema hvað ísbirnirnir myndu eflaust fá freyðandi ræpu eftir að hafa étið belgfylli sína af sjálfstæðismönnum, enda eru þeir argasta ómeti, eiginlega baneitraðir til átu ekki síður en hundakjöt sem legið hefur í arsenikpækli í mánuð.

Ef dómsmálaráðherra fyrirskipar ekki ísbjarnaleit þegar í birtingu í fyrramálið þýðir það einfaldlega að ríkisstjórninni sé hjartanlega sama um Norðlendinga og komi það ekki við hvort þeir enda sína ævidaga í ísbjarnarkjafti eða á einhvern þann skelfilegan hátt annan, sem óviðunandi er talinn í venjulegu árferði.

Leit að hvítabirni hætt

Ljótur leikur

Mér þykir mbl.is teyja sig ansi langt með því að titla Ragnar Kjartansson ,,listamann." Það er svo sem meir en líklegt, að Ragnari þessum langi til að vera listamaður, sem hann er auðvitað ekki; en að espa upp vitleysuna og hégómann í manninum eins og mbl.is gerir með því að kalla hann listamann, er ljótur leikur. Sporgöngumönnum Garðars Hólm er enginn greiði gerður með þessháttar opinberu háði. Eitt hið sorglegasta sem fyrir augu manns getur borið, er athyglissjúkur einstaklingur sem berst við að vera listamaður af miklum vilja en engum mætti.  

Ragnar sýnir The End á Sundance

Velkominn til Íslands félagi Húgó Chavez

Félagi Húgó Chavez er maður fólksins, hinna snauðu og kúgaðra. Ódeigur býður hann gjörspilltu auðvaldi heimsins byrginn af aðdáunarverðri einbeittni og hugrekki. Ef einhver ærlegur snefill af mennsku væri í ríkisstjórn Íslands væri hún fyrir löngu búin að leita eftir aðstoð félaga Chavez gegn því glæpagengi auðvaldsins sem íslenskur almenningur á í höggi við um þessar mundir. En því miður er ríkisstjórn Íslands skipuð brjóstumkennanlegum kerfisþrælum, sem eru samdauna auðvaldinu og gamla Íslandi, - að Jóni Bjarnasyni, sjávarútvegsráðherra, einum undanskildum.  

Lifi byltingin í Venúsúela !!!

Lifi félagi Húgó Chaves !!!

Neituðu að sjónvarpa ræðu forsetans

Fjallkona gamla Íslands og frjálshyggjuljóskurnar

Eins og við var að búast fær Sjálfstæðisflokkurinn þann framboðslista sem hann á skilið fyrir hreppsnefndarkjörið í Reykjavík í vor. Þarna raðast saman frjálshyggjuljóskur, karlkyns og kvenkyns, í þeim mæli að rökrétt er að álykta, að slíkur listi fái varla nema 8-10% atkvæða þegar kosið verður. Það eru nefnilega einungis kjánar sem láta sér til hugar koma að greiða auðvaldsmaskínunni atkvæði sitt eftir allt sem á undan er gengið, ég tala nú ekki um þegar Flokkurinn hefur ekki uppá bitastæðara að bjóða en þann framboðslista sem er að koma útúr prófkjörinu í Reykjavík og er hvorki fugl né fiskur og heldur hvorki vatni né vindi.

Það má vel vera að Hanna Birna, sú er Láfi F. orkti um, sé afar ánægð með niðurstöðu prófkjörsins, en varðandi þá ,,ánægju" verður að hafa ú huga, að hún er fyrrverandi  stofustúlka Kjartans Gunnarssonar í Valhöll og þar með innvígð hrunsdama, fjallkona gamla Íslands sem varð græðginni og ómennskunni að bráð. Í vor mun Sjálfstæðisflokkurinn í Reykjavík bjóða kjósendum í Reykjavík uppá tímaskekkju í stað framboðslista.

Hanna Birna fékk 84% atkvæða í 1. sæti