ESB-vandræðamenn og krypplingar spá dómsdag á morgun eða hinn.

Það hefur vægast sagt verið stórbrotið og jafnframt stórhlægilegt að fylgjast með viðbrögðum krypplinganna, sem engjast sundur og saman af viðþolslausri löngun til að borga Icesave-glæpinn fyrir bófagengið sem rændi hér öllu lauslegu og eyðilagði þjóðfélagið okkar, eftir að heiðursfélgai Ólafur Ragnar vísaði Icesave-samningi Jóhönnu, Steingríms og Bjarna Ben til þjóðarinnar. Allrahanda leiðindaskjóður, einkum ESB-vandræðamenn, sem skreyta sig háskólatitlum sem virðast jafn innihaldslausir og tóm Armani jakkaföt, hafa verið kallaðar til af fjölmiðlum til að spá dómsdegi á morgun eða hinn og formæla heiðursfélaga Ólafi Ragnari niður í ystu myrkur fyrir að snúa á gjörspillta og svikula stjórnmáladólga og gera þá afturreka með ódæðisverk sín.

Það er alveg ljóst, að vandræðafólki sem á sér þá ósk heitasta að ljúga íslensku þjóðina með öllum ráðum inní ESB tengja Icesave-samninginn beint við aðildarumsóknina að ESB og mega ekki til þess hugsa að þjóðin hafni nefndum samningi því það kunni að hefta ferð þeirra í fangið á stórauðvaldi Evrópu.

Það er einlæg von mín að almenningur taki forseta lýðveldisins, heiðursfélaga Ólaf Ragnar Grímsson, sér til fyrirmyndar í þeirri viðureign við landsölumenn og auðvaldsþjóna og róna sem framundan er, þegar hann tók ESB-agent DV, Jóhann Hauksson, og flengdi hann uppúr hans eigin hroka og lítlimennsku.

Úr því sem komið er, væri best að gefa ræflunum, sem vilja að almenningur borgi stórglæpamennsku eins og Icesave, kost á að greiða sjálfir úr eigin vasa það sem þeir ætlast til að þjóðin færi Hollendingum og Bretum úr sameiginlegum sjóðum sínum.

 

 

57,7% myndu samþykkja Icesave

Ómarktæk búrtík ómarktæks húsbónda

Það ber að hafa í huga, við lestur þessarar fréttar, að eina hlutverk Björns Vals í stjórnmálum er að vera búrtík og hælbítur Steingríms J. Sigfússonar. Og eins og góðri búrtík sæmir gjammar hann og glefsar í hæla fólks þegar húsbóndi hans sigar honum, að öðrum kosti þegir þetta apparat og borar í nefið á sér af fullkomnu tilgangsleysi.

Og auðvitað gat þessi auðvirðilega búrtík ekki stillt sig um, í Silfrinu, vegna þess að húsbóndinn skipaði svo fyrir, að reyna læsa hvolpstönnum sínum í hælana á Lilju Mósesdóttur. Já, búrtíkin var meira að segja svo frökk að kveða uppúr, með tilheyandi bofsi og ýlfri, að Lilja væri ómarktækur stjórnarandstæðingur.

Hinsvegar er hin raunverulega staða sú, að Steingrímur J. og hans eigendur, búrtíkur og dekurdýr er fólki sem ómarktækt í VG. Það liggur fyrir að þessi óhrjálegu endemi hafa svikið flokk sinn í grundvallaratriðum, eyðilagt hann og sprænt framaní hinn almenna flokksmann í þokkabót, svona til að undirstrika vald sitt.

Það tók Steingrím, Álfheiði og Svavarsfjölskylduna ekki langan tíma að breyta VG í illþefjandi sorphaug með óforskömmuðum yfirgangi, svikum, falsi og lygum. Ég veit ekki hvað þarf að hamra oft á þessari nöturlegu staðreynd þar til öllum flokksmönnum verður ljóst í gegnum afneitunarþokuna að umrætt flokkseigendastóð hefur haft það að fíflum og skilið það eftir á berangri með brostnar vonir og harm í hjarta. 

Björn Valur: Icesave mál þingsins

Í dag mun félagi Ólafur Ragnar undirrita örlög sín.

Nú verður félagi Ólafur Ragnar að sýna í verki að hann sé verðugur þess að vera kallaður félagi Ólafur Ragnar. Ef hann skrifar undir Icesave-glæpinn til að þóknast santryggingarkerfi heimskapítalismans mun ég tafarlaust svipta hann heiðurstitlinum ,,félagi" og skipa honum jafnframt í flokk með Halldóri Ásgrímssyni, Finni Ingólfssyni og öðrum ódámum, hverra nöfn er ekki hægt að nefna á prenti venga þess að þau eru ekki prenthæf.

En ef forsetinn sýnir þá sjálfsögðu dáð að fleygja Icesavelögunum óundirrituðum í smettin á Jóhönnu, Steingrími og Bjarna Ben, svo samtryggingar- og hrossakaupsglottið máist af þeim á einu andartaki, mun Ólafur Ragnar sjálfkrafa öðlast nafbótina ,,heiðursfélagi" og nafn hans, ásamt nafnbótinn, mun verða á vörum þjóðarinnar svo lengi sem byggð stendur á Íslandi.

 

Forsetinn kominn að niðurstöðu

Þjóðskáld veldur óróa með leynilegum kveðskap

Það er ekki tekið út með sældinni að vera stjórnmálaskörungurinn Sigmundur Ernir Rúnarsson og þykjast vera viðurstyggilega móðgaður útaf skitnum hundra þúsund krónum í kjaftinn á einhverjum dómararæflum sem neyðast til, alla virka daga sem Guð gefur, að dæma allrahanda trantaralýð á Hraunið fyrir misljóta glæpi.

En sem kunnugt er, er téður Sigmundur Ernir einhver mestur núlifandi hugsjónabelgur á Íslandi og að sama skapi í hávegum hafður af stórgáfuðu fólki sem hikar ekki við að kalla hann til skiptis séní og andans jöfur. Þá er han mjög dáður fyrir að hafa orkt Rauðvínsrímur hinar nýrri, sem eru álíka aðgengilegar alþýðu manna og leynileg hrossakaup stjórnmálamanna. Þó hefur lekið út að kvæðabálkur sá er Sigmundur Ernir kennir við rauðvín hefjist á þessa leið: ,,Undir borði á Akureyri elliærðist Hunda-Geiri. Hann var öðrum mönnum meiri, mjök hann skapti söng úr leiri. Þeir sem eyru hafa heyri, renni víni rauðu á könnu og rói sig á viti grönnu."

Það var víst útaf þessum gáfum þrungna kveðskap Sigmundar Ernis sem Máría borgargagn brá nærbuxum sínum á loft og hugðist kyrkja Jón aumingja, frænda sinn, með þeim.    

Viðurstyggileg móðgun við landsmenn

Og pervertisminn vex, - og vex. Verða kýr áfram mjólkurpeningur eða munu kerlingar leysa þær af hólmi.

Það fullyrða vísir menn að Teboðshreyfingin svokallaða í USA sé systurhreyfing Sjálfstæðisflokksins á Íslandi, sem sjáist á því að Sara Palín og Bjarni Ben, form. Sjálfst.fl. séu svo sláandi lík að halda mætti að þau væru eineggja tvíburar.

Nú berast góðar fréttir af því að Sara Bjarnasystir sé komin í hörkubaráttu gegn áforum frú Óbama að gera konur að mjólkurdýrum og leysa þar með kvennautgripi undan þeirri kvöð að sjá ofhodguðum Bandaríkjamönnum fyrir mjólkurvörum.

Nú má vel taka undir orð Karls Einfers, að það sé mesti viðbjóður og villimennska að fólk drekki í sig mjólk úr öðrum dýrategundum og best færi á að kerlingar myndu sjá mjólkurstöðvum alfarið um hráefni, fyrst mannkynið er svo illa statt að geta ekki lifað án mjólkuráts.

En það verður spennandi að fylgjast með hvort verður ofaná í USA, hefðbundin kúabú, þar sem skjöldóttar kýr leika aðalhlutverkið eða ný tegund þessháttar landbúnaðar þar sem mylkar kerlingar eru leiddar til mjalta kvölds og morgna.

Teboðshreyfingin hjólar í brjóstagjafir

Gunnar á Hlíðarenda endurborinn.

Hann ræðst ekki á garðinn þar sem hann er lægstur ungi maðurinn sem bauð lögreglusveit stjörnusýslumannsins Stones byrginn í gærkvöldi. Eins og Gunnar á Hliðarenda endurborinn barðist hann við fjöld lögregluþjóna og var við það að hafa betur þegar sjálfur Stones birtist óforvandis á vettvangi og tókst að koma skessubragði á hetjuna svo hann féll í valinn og var yfirbugaður. Má fullyrða að enginn hefur sýnt af sér annan eins fræknleik á Suðurlandi síðan Gunnar og Skarphéðinn lituðu lokka sveitunga sinna bóði austur þar. Þetta sýnir enn fremur að enn eru til horskir menn á Íslandi sem hika ekki við að berjast gegn ofurefli og falla að lokum með þeirri sæmd sem gerir þá ódauðlega í sögu þjóðarinnar. Í skæru ljósi þeirrar hetjulundar sem hinn ungi maður sýndi af sér í gærkvöldi, má fullyrða að upp sé runnin sú eftirsókarverða gullöld sem vér höfum saknað síðan hetjur riðu um héruð fyrir þúsund árum. 

En mikið afrek hefur hinn ástsæli stjörnusýslumaður Árnesinga í þjálfun varðsveitar sinnar. Honum hefur á undraskömmum tíma tekist að þjálfa lyktnæmi sinna manna með slíkum ágætum, að nú renna þeir eins og skæðustu labradorar á kannabisþef sem á sín upptök í órafjarlægð frá þeim. Á þann hátt hafa þeir afhjúpað hvern kannabisbaróninn af öðrum á Selfossi og nærsveitum, þannig að umræddir barónar vita ekki lengur sitt rjúkandi ráð.

En svona eiga nú einusinni sýslumenn að vera.

Lenti í áflogum við lögregluna

Hrapaleg mistök dómnefndar í Ósló og frétt af annarri og mun merkilegri verðlaunaveitingu

Þarna fóru þeir rangt að vesalings skepnurnar í norrænu dómnefndinni. Þó Jónsi sé vel að verðlaunum kominn, er hann þeirrar gerðar að hann er of stór fyrir svona grín. Ef allrar sanngirni væri gætt, hefðu Norrænu tónlistarverðlaunin farið beint í lúkurnar á skáldrindlinum Sjón, því hann er sérhannaður fyrir norræn verðlaun fyrir ekki neitt.

En fyrst við erum farin að tala um verðlaun, lesendur góðir, er ekki úr vegi að nefna aðra verðlaunafhendingu sem fram fór á dögunum. Það fór nefnilega svo, að hið virta félag sjálfstæðiskvenna í Reykjavík, Hvöt, veitti frú Ingveldi æðstu orðu Hvatar fyrir framúrskarandi störf í þágu sjálfstæðisstefnunnar, auk þess að fá verðlaunin ,,Hvatarkona ársins 2010" fyrir, eins og segir í niðurstöðu dómnefndar, óbilandi baráttu sína gegn drykkfelldum framsóknarmönnum og kynvillu á framhaldsskólastigi.

Vart þarf að taka fram, að frú Ingveldur hélt uppá verðlaunin með því að rjúka tafarlaust heim og lúberja Kolbein Kolbeinsson, eiginmann sinn, fyrir andstyggilega framsóknarmennsku og annað yfirþyrmandi óeðli.

Jónsi vann í Ósló

Hæfileikarýrar stjórnmálakvinnur fremja súrrealískan ræðugjörning í auglýsingarskyni fyrir sjálfar sig

Mikið andskoti er nú súrrealískt að Jóhanna Sigurðardóttir og Torgerður Kattrín skuli enn sitja, á sínum ónýtu hrunsrössum, á Alþingi Íslendinga. Fyrir það fyrsta er stórfurðulegt að þessar hæfileikarýru konur skuli ekki hafa lagt niður skottið sama dag og Ísland skutlaðist fram af frjálshyggjubjarginu og látið sig hverfa af vettvangi stjórnmálanna. Í annann stað er jafnvel enn furðulegra að nokkur maður skuli hafa lagst svo lágt að styðja fyrrgreindar hrunamaskínur til áframhaldndi setu á Alþingi.

Það er svo í stíl við fortíð Jóhönnu og Torgerðar að þær geri sér að leik að kalla hvora aðra vitleysing út ræðustóli Alþingis, svona til að undirstrika súrrealíska setu þeirra á þjóðþinginu. 

Það er víst til of mikils mælst að biðja þessar einkennilegu konur um að geyma sjálfum sér allan þvætting og hafa sig á brott úr Alþingishúsinu og koma þar aldrei meir inn fyrir dyr. Það er það eina sem þær geta gert þjóð sinni til gagns.

 

Á ekki að spyrja svona vitleysislegra spurninga

Og paradísardúfan hló og skríki

Hún lætur ekki ganga í verkin sín blessuð dúfan hún Swandeesý þegar kemur að því að greiða atkvæði með því að troða Icesave-glæpnum öfugum ofaní kokið í almenningi í landinu. Og þrátt fyrir mikið og vont heilsuleysi, skeið þessi prinsessa flokkseigenda VG af einskærri þjóðhollustu fram úr bæli sínu, eins og ellihrum framsóknarmaddama, og greiddi sitt atkvæði, hló meira að segja og skríkti eins og fullfrísk væri. Það fór sem sé ekki fyrir Swandeesý Sendiherrans eins og gömlu konunni sem dó, sem pissaði á vegginn og veggurinn hló.

Svona getur nú verið heilnæmt og heilsubætandi fyrir einn stórsósíalist, de la Pétur þríhross, að greiða atkvæði með Isesavesamningi.

Ráðherra staðfestir tillögu að aðalskipulagi frá 2008

Undanrennufénaðurinn í UVG og falsspámennirnir Steingrímur og Ögmundur

Það er svo sem gott og blessað að undanrennufénaðurinn í  stjórn Ungra vinstri grænna (UVG) álykti um dóm Héraðsdóms Reykjavíkur yfir níumenningunum svokölluðu. Hitt er aftur lakara að stjórn UVG skuli ekki hafa manndóm í sér að álykta harkalega gegn samþykkt Alþingis á samningnum um Icesave-glæpinn.

En það er auðvitað ekki raunhæft að ætlast til að undanrennuunghænsin hans Steingrím hafi yfirleitt einhverjar pólitískar skoðanir aðrar en að sleikja sig upp við foringjann, Álfheiði Inga og Árna Þór eins og undirgefnir hvolpar með lága greindarvísitölu. Það eru að minnsta kosti undarleg ungmenni sem hafa svo skerta réttlætiskennd og hlandþunnar hugsjónir að þau geti ljáð stuðning sinn þeim auðvirðilegu ómennum og svikurum sem skipa forystusveit VG.

Þessa dagana er æ betur að koma í ljós hverskonar loddarar og smámenni skipa þingflokk og foruystu VG. Það má vel vera að Steingrímur J. Sigfússon og Ögmundur Jónasson haldi að almennir flokksmenn og kjósendur VG sjái ekki í gegnum leikaraskapinn í kringum atkvæðagreiðslur flokksins um ESB-umsóknina, Icesave I og II, tvískinnunginn varðandi kvótakerfið og endurreisnina miklu sem einungis er endurreisn fjármálaafla Gamla Íslands á kostnað almennings. Hitt er aftur vandséð að þeir kumpánar komist upp með það öllu lengur spila með fólk og hafa það að fíflum. Það getur nefnilega vel verið að fólk eigi í fórum sínum ráð við svona neföpum og muni beita því ráði einn góðan verðurdag innan ekki svo langs tíma.

Vinstrihreyfingin grænt framboð var stofnuð á fölskum forsendum og þar af leiðandi er þátttaka flokksins í ríkisstjórn grundvölluð á fölskum forsendum, svikum og ótrúlegu siðleysi sem er af sömu rót runnin og siðleysi fjármálaperverta og annarra slíkra eiginhagsmunavarga.

Ég sé enga ástæðu lengur til að halda Vinstrihreyfingunni grænu framboði úti stundinni lengur sem stjórnmálaflokki, það er í raun og veru galið og til minnkunar öllum sem þar eiga hlut að máli, bæði forustusveit sem og öðrum flokksmönnum. Ef Steingrímur J. Sigfússon og Ögmundur Jónasson væru heiðarlegir menn myndu þeir leggja til á næsta landsfundi VG að flokkurinn verði lagður niður og lýsa því jafnframt yfir, fyrir sína parta, vinstripólitík á Íslandi heyri sögunni til og sósíalismi sé nítjándualdar þvættingur sem hafi dáið drottni sínum dama dag og Karl Marx tók hinsta andvarpið.  

Harma pólitísk réttarhöld