Þökk sé blessuðum Sjálfstæðisflokknum

Í kvöld, þegar við göngum til náða, skulum við ekki gleyma að þakka Sjálfstæðisflokknum fyrir allar þær þúsundir og aftur þúsundir manna og kvenna sem sitja í skuldasúpunni fyrir tilverknað þessa dásamlega flokks. Hafi hægrimönnum á norðurhveli jarðar einhverntímann tekist vel upp í svindli, þjófnaði og arðráni þá var það undir styrkri stjórn Sjálfstæðisflokksins á árunum 1991 til 2009. Auðvitað reis snilld Sjálfstæðisflokksins hæst í október 2008 þegar honum lánaðist að hvolfa landinu fyrir efnahagsbjörgin; enda var það slíkur skellur að begmálaðu um gjörvalla heimsbyggðina.

Þó svo að Sjálfstæðisflokkurinn hafi steypt þjóðinni í hroðalegar skuldir, lagt efnahagslífið í rúst og látið alskonar glæpi þrífast eins og skordýraplágu undir sínum ránfuglsverndarvæng, þá skulum við hafa sem fæst orð um það, en kenna núverandi ríkisstjórn alfarið um hvernig komið er. Til dæmis er allt í lagi fyrir baráttuglaða sjálfstæðismenn með að kalla liðsmenn núverandi þingmeirihluta þjóðníðinga, landráðamenn, fasista, djöfla og andskota, á opnberum og óopinberum vettvangi ef það kynni að verða til þess að ríkisstjórnin félli og Sjálfstæðisflokkurinn kæmist, helst með Framsóknarmaddömunni, í ríkisstjórn og bjargaði kvótanum, endurreisti Gamla Ísland tafalaust og fargaði öllum vömmum og skömmum um guðhrædda og sómakæra sjálfstæðismenn með strokleðrum og pappírstæturum.

Það ætti varla að þurfa að taka fram, að allir sjálfstæðismenn eru guðhræddir og sómakærir, enda gaf Guð sjálfur í eigin persónu þeim Sjálfstæðisflokkinn.  

Þúsundir í skuldasúpunni

Athugasemdir

[Hólmfríður Bjarnadóttir, 6.2.2010 kl. 18:15]

Sæll Jóhannes. Ég er efnislega sammála þér, en tek þó ekki undir öll stóru orðin sem þú notar. En notkunn orða er bara smekksatriði hvers og eins.

[Jóhannes Ragnarsson, 6.2.2010 kl. 18:39]

Við getum a.m.k. verið sammála um, Hólmfríður, að sjálfstæðismönnum á blogginu er tamt að kalla núverandi ríkisstjórn landráðamenn, þjóðníðinga og fasista.

[Sveinn Elías Hansson, 6.2.2010 kl. 20:13]

Og þig og mig OFSAFULLA EINTRJÁNUNGA.

Hann Axel vinur okkar notar ýmis orð um okkur, og er mjög skapstyggur um þessar mundir.

Samkvæmt því sem hann og guðsmaðurinn Jón Valur skrifa, þá er efnahagskreppan í heiminum, einkavinavæðing bankanna og hrunið hér allt Clinton og Carter sem var forseti fyrir 30 árum að kenna.

Er ekki í lagi með þessa menn?

[Jóhannes Ragnarsson, 6.2.2010 kl. 20:24]

Þeir eru afskaplega úfnir og geðstirðir heiðursmennirnir sem þú nefnir Sveinn. Mér dettur helst orðið ,,brundílska" í hug um karlagreyin. Með sama áframhaldi fá þeir ekki inni á elliheimili sökum skapvonsku.