Í fylgdarliði forsetans

Í hinni konunglegu skemmtireisu forseta Íslands til majestetens í Kaupinhöfn, okkara gamla yfirvalds, er einhver glæsilegasta sendisveit Íslendinga, sem send hefir verið út fyrir landsteinana af opinberri hálfu. Í þeim föngulega félagsskap má finna eðaldjásn borgarastéttarinnar, eins og til dæmis hana frú Ingveldi og mann hennar, Kolbein Kolbeinsson skrifstofustjóra; Máríu Borgargagn og Indriða Handreð, hennar mann; Brynjar Vondulykt og hans vinkonu, hverrar nafn ekki hefir enn verið kunngert. Og ekki er annað vitað en Óli Apaköttur eigi sæti á fremsta bekk við samdrykkjur i kannsellíinu, enda ekki hægt að sniðganga hann að þessu sinni þrátt fyrir einkennilegan órðstír.

Á meðan hennar majestet tók á móti forseta Íslands skruppu Brynjar Vondalykt og Kolbeinn á hóruhús á Amager. Þar komust þeir á snoðir um, að tveir landar þeirra, báðir valinkunnir, væru nýfarnir úr húsi og að sögn yfirstýrunnar væru vikastúlkurnar á heimilinu í sjöunda hymmni eftir að hafa afgreitt þá, ein þeirra næstum í öngviti. Þá tjáði yfirstýran þeim, að hún ætti von á fleiri Íslendingum þegar liði á nóttina, þar á meðal væru tvær háttsettar konur, sem hefðu bókað sig í gær. Við fréttina af háttsettu konunum fór að sjóða á þeim Kolbeini og Vondulyktinni, sem ákváðu orðalaust að láta höndur standa svo um munaði frammúr ermum og ganga að verkefninu með oddi og egg.

Og það skal fært þeim Kolbeini og Vondulyktinni til hróss, þótt ýmislegt megi gjörðum þeirra finna bæði fyrr og síðar, að þeir stóðu virkilega vel að verki í dag og það svo sérstaklega, að yfirstýran sá sig tilneydda að kveða til dólga sína tvo, er búa í risi hússins, og skipa þeim að bjarga lífi og limum telpnanna undan forkastanlegum atgangi hinna íslensku viðskiptavina. Þegar dólgarnir höfðu skakkað leikinn og Kolbeinn og Brynjar Vondalykt voru að mjaka sér uppúr skítugri götunni framan við hóruhúsið sórust þeir bræðralagsböndum um að komast að því hvaða háttsettu konur ættu bókaðann tíma hjá yfirstýrunni og koma í veg fyrir að þær gerðu þjóð sinni og landi til óbætanlegrar skammar.

Guðni afhenti veglega bókagjöf