Náttúrulaust undanrennugutl í þokunni

Til að auka á vonbrigði mín undrun, leyfði ég mér í kvöld að hlýða, á ræðu formanns Vinstrihreyfingarinnar græns framboðs. Vinstrihreyfingin grænt framboð er sem kunnugt er öllum eldri en tvævetur, arftaki Alþýðubandalgsins sáluga, Sameiningarflokks alþýðu - Sósíalistaflokksins og Kommúnistaflokks Íslands. Og ræðubrögð formanns arfleyfðar íslenskra sósíalista stóðu fyllilega undir væntingum mínum um aukin vonbrigði og aukna sorg. Það er skemmst frá að segja, að ræða formannsins virkaði á mig eins og lognmolla og þokumistur, undanrenna og gelding. Ósjálfrátt, undir sinuþyt formannsins vinsæla í ræðustólnum, varð mér hugsað til Einars Olgeirssonar, Brynjólfs Bjarnasonar, Magnúsar Kjartanssonar, Eðvarðs Sigurðssonar og Lúðvíks Jósepssonar og sá í sjónhending þróun úrkynjunar og vatnsblandaða undanrennuvæðingu sósíalískrar hreyfingar á Íslandi og spurði sjálfann mig: Hvað hefur eiginlega gerst? Af hverju samanstendur þingflokkur og flokksráð arftaka Einars og Brynjólfs, Eðvarðs og Lúðvíks af borgaralegu óheilindastóði, sem sleikir skítugar tærnar á kapítalismanum? Hvenær hefði þessum kempum láðst að nefna kjarabaráttu sjómanna í verkfalli í ræðum sínum eins og formanni VG tókst í kvöld? Aldrei, enda voru þeir alla sína tíð í góðu sambandi við alþýðuna í landinu, verkafólkið, sjómennina, öreigana.

Og mér er spurn: Hvaða tilgangi þjónar það róttækum vinstrimönnum, sóíalistum, að gera út aðra eins hænsnastíu? Ekki sé ég tilganginn, nema hann sé að steindrepa fyrir fullt og allt hugsjónir sósíalista, stéttabaráttu og þjóðfrelsis á altari kapítalismans. Ráðamenn VG eru óheilt fólk í stjórnmálum, óheiðarlegt og fáránlega þenkjandi í undanrennugumsi sínu.   

Katrín Jakobs minnist Birnu

Athugasemdir

[Halldór Egill Guðnason, 25.1.2017 kl. 02:10]

Hvar svosem menn og konur, eldri en tvævetur, standa í pólitík í dag, er sorglegt að sjá ungviðið fótumtroða vinnu og hugsjónir þeirra sem vörðuðu veginn og lögðu línuna, af eldmóð og festu. Þetta á við um báða, eða alla arma hins pólitíska litrófs. Undanrenna er býsna góð skilgreining á Eldhúsdagsumræðum Alþingis í kvöld. Útþynnt gutl, flestra sem tóku til máls. Sorglegt í meira lagi og veit ekki á gott. 

Góðar stundir, með kveðju að sunnan.