7 spurningar til VG

Af því að Alþingiskosningar eru skammt undan langar mig að bera upp fáeinar spurningar til VG. Að vísu geri ég ráð fyrir að frambjóðendur VG muni ekki ómaka sig á að svara mér né heldur einhverjar af þeim hræðum sem þar eru á skrá sem flokksmenn. Hinsvegar er varla til of mikilis mælst að VG-liðar hugleiði þessar spurningar, hugleiði þær og svari sjálfum sér fyrir þær.

1. Getur VG lýst því afdráttarlaust yfir fyrir kosningar að ekki komi til greina að fara í ríkisstjórnarsamstarf með Sjálfstæðisflokknum?

2. Ætlar VG að taka á sig rögg og reka Steingrím J. Sigfússon úr flokknum áður en honum tekst að troða sér á framboðslista flokksins að þessu sinni?

3. Er sósíalismi enn bannorð á samkomum VG?

4. Má gera ráð fyrir, ef VG kemst í ríkisstjórn að kosningum loknum, að flokkurinn beiti sér fyrir því að ráðuneytin og stjórnsýsla ríkisins verði hreinsuð af því illgresi sem auðvaldsflokkarnir hafa plantað þar?

5. Mun VG hjóla í sægreifahjörðina og freista þess að færa þjóðinni aftur fiskveiðiauðlindina ef flokkurinn kemst í ríkisstjórn.

6. Eru félagar í VG sammála þeirri fullyrðingu að VG sé hægfara í  raun hægriflokkur?

7. Hvernig hyggjast VG-liðar bæta fyrir umhverisbrot sín, til dæmis á Bakka og Drekasvæðinu.

Ég læt þessar sjö spurningar duga að sinni því ærið mun verða fyrir fólk í VG að svara þeim. En þar eð ég kom dálítið að stofnum VG á sínum tíma þá er líklegt að ég sendi þessum fyrrum félögum mínum fleiri spurningar til úrlausnar bráðlega.

Rósa Björk langefst hjá VG

Athugasemdir

[Guðmundur Ásgeirsson, 2.10.2017 kl. 20:02]

8. Hvar er skjaldborgin?

[Einar Sveinn Hálfdánarson, 2.10.2017 kl. 22:34]

Það er auðvitað sjálfsagt réttlætismál að flokkskírteini í VG eða öðrum sósíalistaflokki verði starfsskilyrði hjá ríkinu. Það eitt dugar þó ekki til; það þarf að fylgjast með að liðið hugsi rétt.

Æ, hvað varð um sæluríkin í Austri? Það er þó huggun harmi gegn að hvorki Norður-Kórea né Venesúela hafa bilað. Enda liðið þar ekkert að ybba gogg nema það vilji endilega fá gúmoren.

[Jóhannes Ragnarsson, 3.10.2017 kl. 15:04]

Hvað sem öðru líður, morgunblaðslærdómi þínum Einar Sveinn og öðrum ámóta fróðleik í rússagrílustíl, þá er illgresið sem Sjálfstæðisflokkurinn hefir plantað um alla stjórnsýsluna þessháttar krabbamein sem ber að skera burt ef sjúklingurinn á að eiga einhverja framtíð fyrir sér.

[Jón Valur Jensson, 4.10.2017 kl. 23:12]

Var ekki Össur undur-röskur að planta samfóistum án auglýsingar í ráðuneytin?

Og hve mörgum hundruðum milljóna eyddi Steingrímur Joð í "sérfræðiálit" og annað þess kyns til að styðja undir það að hann fengi að borga Hollendingum og Bretum ólögvörðu Icesave-kröfuna þeirra og ESB-kommissaranna? Þær upplýsingar er að vísu að finna að hluta á vefnum thjodarheidur.blog.is