Hátt er siglt og sviðnar stél og haldið áfram með sprungna vél

Þeir gjörast nú ærið háfleygir verklýðsforingjar vorir og vandséð hvernig þetta ferðalag endar hjá þeim; það er nefnilega ekki enn útséð með að þeir gæti að sér þegar stélfjaðrirnar á þeim fara að sviðna og haldi áfram upp þar til allt er um garð gengið og þeir orðnir að grillösku. En það er svosem við hæfi að eftirmenn Dóra gamla Björns í Dagsbrún og Mánga L. Sveinssonar í VR fari allt í einu og upp úr þurru að míga utan í flugþjóna og flugfreyjur og skilja það fólk síðan eftir holdvott og fremur illa þefjandi.

En frú Ingveldi er andskotans sama hvað eftirmenn Dóra og Mánga í VR taka sér fyrir hendur; hún bannaði Mánga inngöngu í helgarsamkvæmi að heimili hennar og Kolbeins, og þegar karlinn ætlaði samt sem áður að smygla sér inn náði frú Ingveldur taki á buxnastreng höfðingjans, hóf hann á loft og hljóp með hann út í ruslatunnu; það var víst geðugt upplitið afgreiðslukassaforingjanum þegar hann skreið aftur upp úr tunnunni, allur útataður sorpi og öðru þaðan af verra. Og nú hefir frú Ingveldur gert þá kompána, Brynjar Vondulykt og Indriða Handreð, út af örkinni til að kippa nokkrum málum í lag. Fyrir það fyrsta vill frú Ingveldur brennivín í matvöruverslanir og sjoppur; í örðu lagi vill hún einkavæða heilsbótariðnaðinn allan og óskiptan inn í veröld brasksins; í þriðja lagi, frelsa útgerðina um alla framtíð undan allri skattheimtu, veiðigjöldum, eftirliti og öðrum þeim plágum sem fara í taugarnar á útgerðamönnum. Til viðbótar er hinum orðlögðu þorpurum uppálagt að kippa nokkrum smámálum í liðinn.

En nú þegar viðbúið er að vekalýðsforingjar vorir, hugumstórir og víðsýnir, muni fljúga útúr gufuhvolfinu og brennsig á því nokkuð illilega, þá situr verkalýðurinn eftir munaðarlaus, mamma litla og pabbarnir verða úr sögunni áður en til bardagans við auðvaldið kom. Eftirleikurinn verður líka auðveldur: auðvaldið semur í kjölfarið við Flóabandalagið, Keflavíkur-Stjána og einhverju gufusyfjaða slána til viðbótar, á tíu mínútum og málið dautt. Steindautt. Stöðugleikinn tryggður, sem er tilhlökkunarefni fyrir déskotans fátæklingana því þá geta þeir gengið að því vísu að drukkna stöðugt oft á dag í stöðugleikaforarpollinum. Sannast þá enn einn ganginn ljóðmæli skáldsins er það orkti: ,,að þegar hún var borin í burtu dauð var brauðið ónýtt líka."

Verkalýðsleiðtogar gagnrýna Icelandair