Atvinnurekendur vilja verkföll, elska verkföll og hlakka til verkfalla

Fnuhh, ætlar þessi stúfur í heimdallsstuttbuxunum, Dóri Benjamín, að ljúga því að fólki að hann hlaki ekki til verkfallanna? Það sést bæði á glyrnunum í honum og nasavængjunum að hann ræður sér ekki fyrir verkfallskæti, hún hreint úr sagt leiftrar af honum og nebbalingurinn skiptir litum í sífellu af svokölluðum verkfallslosta, sem einungis hugsjónaverkfallsmenn hafa til að bera. Og á morgum sjáum við Halldór Benjamín steðja út á strætið með skilti á staung, þar sem á stendur ,,niður með helvítis fátæklingskommúnistana og niður með Stalín."

Nú, það liggur annars í augum úti, eins og oddvitafíflið sagði hér um árið, að það eru atvinnurekendur sem vilja verkföll, elska verkföll og hlakka til verkfalla, annars hefðu þeir gengið að sanngjörnum kröfum verkalýðsfélaga. En nei, samtök atvinnurekenda vildu verkföll og ekkert múður. Og nú fá þeir sín verkföll og munu skemmta sér vel, jafnvel má búast við að þeir hlaupi hálfberrassaðir út á götu og dansi og djöflist eins og brasilískar gelgjur á ketkveðjuhátíð í Ríó.

Auðvitað hlakkar alla til að sjá Halldór Benjamín í stríðsdansi úti á götu á bíkíní að fagna velheppnuðu verkfalli. Og vafalaust mun velmeinandi og góðgjarnir menn, eins og til dæmis Bjarniben, Hanez Holmestone og Þorsteinn Víglundar, stíga dansinn með stráknum og kitla hann kammó undir hökuna. Hátíð er í vændum hjá arðræningjasöfnuðinum og verkföllunum mun eflaust ljúka með stórbyltingu auðvaldsins og fangabúðum á Hornströndum. 

Ekki við hæfi að hlakka til verkfalla

Athugasemdir

[Þorsteinn Siglaugsson, 7.3.2019 kl. 18:42]

Heyrst hefur að hann stigi fínan menúett með Eflingargrýlunni á síðkvöldum við fiðluleik fjögurra blaða Smárans.

[Jóhannes Ragnarsson, 7.3.2019 kl. 18:58]

Já, hann kvað vera óttalegur tralli.