Leita í fréttum mbl.is

Nú verður ,,Bróðurhöndin" að hafa upp á glæpamönnunum og leiða þá inn á réttar brautir

séraSér er nú hvur ,,Bróðurhöndin" atarna sem lætur stela frá sér flugeldum fyrir milljon, hér um bil um hábjartan dag. Og ætli fari ekki eins og venjulega hjá lögreglunni þegar hún fer að rýna í öryggismyndavélarnar: ekkert að sjá, vélin óvirk. Á meðan valsa bófarnir um eins og Sjálfstæðismenn með fullt fangið af sprengiefni, þess albúnir að sprengja allt og alla í loft upp.

Hérna einhvurju sinni í gamla daga stálu Kolbeinn Kolbeinsson, síðar skrifstofustjóri og Framsóknarmaður, og Brynjar Vondalykt ókjörum af dýnamíti og fóru með það upp í sveit á gamlárskveld. Í sveitinni komu þeir sprengiefninu fyrir í fjóshaug og sprengdu. Um þetta leyti hafði verið heljar frost í sveitinni og tveggja tommu þykk frostskán yfir öllum haugnum, sem gerði að verkum að sprengingin varð enn stórfenglegri en ef fjóshaugurinn verið ófreðinn. En sprenging þessi gjörði heldur meira að verkum en að færa nokkur tonn af kúaskít úr stað. Fjósveggurinn féll inn og slasaði tvær kýr og gaddfrosinn taðköggull fór í tígulegum boga inn um eldhúsgluggann á bænum og gjörði næstum útaf við fjölskylduna, sem sat að mat sínum við eldhúsborðið; þau hjónin fóru bæði á géðveikrahæli á eftir og börnum komið fyrir hjá vandalausum fyrir milligöngu barnaverndarnefndar.

Síðar gjörðu Kolbeinn og Vondalyktin yfirbót, fóru á knén frammi fyrir síra Baldvini sem skenkti þeim náðarmeðölin. Á eftir gjörðist Kolbeinn handgenginn gömlu ófrýnilegu Framsóknarmaddömunni en Vondalyktin gekk fagnandi í Sjálfstæðisflokkinn. Þannig var gert gott úr hinu fljótfærnislega framtaki þeirra kompána og þeim gefið tækifæri til að verða menn með mönnum. Þeir hafa líka ávaxtað sitt pund, eru mjök valdamiklir og helgarsamkvæmin hjá Kolbeini og eiginkonu hans eru rómuð út fyrir landsteinana. Nú er það sem sé í verkahring ,,Bróðurhandarinnar" að hafa uppi á götustrákunum sem stálu öllu sprengiefninu frá henni. Við trúum að ,,Bróðurhöndin" muni haldleika þrjótana af ást og nærgætni og gefi þeim færi á að víkja af villu síns vegar. Og síra Baldvin er boðinn og búinn að veita þeim uppreist æru og leiða þá í heilögum anda inn í Framsóknarflokkinn og Sjálfstæðisflokkinn, því það eru einu flokkarnir sem kunna að fara með hetjur.

  


mbl.is Lögregla skoðar öryggismyndavélar
Tilkynna um óviðeigandi tengingu við frétt

« Síðasta færsla | Næsta færsla »

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Höfundur

Jóhannes Ragnarsson
Jóhannes Ragnarsson

Höfundur er búsettur í Ólafsvík.

netfang: joiragg@visir.is  Sími:436-1438 og 895-1438

Bloggvinir

Innskráning

Ath. Vinsamlegast kveikið á Javascript til að hefja innskráningu.

Hafðu samband