Stjörf og starandi færir hún nýfrjálshyggjunni fórnir

Stjörf og starandi skar hún fumlaust hausinn af Nýsköpunarmiðstöð Íslands. Enda hafa spilltir lúðar Sjálfstæðisflokksins séð um að mjólka Nýsköpunarmiðstöðina og fénýta í eign vasa. Það væri fróðlegt að sjá umsvif miðstöðvarinnar í smáatriðum og hvað hefir orðið úr þeim fjármunum sem veitt hafa verið til ,,nýsköpunar." Og hvað um það þótt einn heilaþveginn ráðherra Sjálfstæðisflokksins geri eina af ríkisuppsprettum sínum höfðinu styttri, þeir búa bara til aðra í staðinn til að fela slóðina og slá ryki í augu kjósenda, sem flestir eru þó svo blindir að varla er gerlegt að villa þeim sýn.

Hvar ætli ríkisstjórnarnefnan beri niður næst? Hvaða ríkisstofnun fer næst á höggstokkinn? Það mætti til dæmis hausa og slægja bæði Fiskistofu og Hafró eins og í pottinn er búið. Þá væri viðeigandi að ríkisstjórnin klippti á styrkjafarganið til stjórnmálaflokkanna, sem stjórnmálafólkið hefir komið sér upp. Sjálfstæðisflokkurinn fær að sjálfsögðu stærstu styrkina af aflafé skattgreiðenda í sinn flokksjóð. Vér skorum á hinn stjarfa og starandi ráðherra að leggja flokksjóð Sjálfstæðisflokksins þegar á höggstokkinn og embætta hann.

En best væri þó, og það langbest, að ríkisstjórnarnefnan atarna sálgaði sjálfri sér. Aunginn mundi gráta það. Verst er samt hvað kjósendaskjáturnar eru blindar í rökkri stjórnmálanna og flestar gjörsneyddar því að sjá samhengi hlutanna. Það er víst alveg sama þótt kosið sé og kosið í belg og biðu, alltaf kemur Sjálfstæðisflokkurinn upp eins og einhver glaðhlakkalegur og fólskur Svarti-Pétur. Í einfeldni sinni hefir lýðurinn kosið VG, en atkvæðið hafnað hjá Sjálfstæðisflokknum og Bjarnaben; í örþrifaheimskukasti kaus hann Samfylkinguna og Ingibjörgu Sólrúnu, þá hafnaði atkvæði hans í ruslatunnu Sjálfstæðisflokksins og kjósendur fengu eitt virkilega gott Hrun í kaupbæti. Gamla og galna Framsóknarmaddaman er fyrir löngu orðin fylgitungl Sjálfstæðisflokksins, að ekki sé minnst á braskaradeild auðvaldsins í svokallaðri Viðreisn. Um skítakompuna og klausturkamainn Miðflokk þarf ekki að minnast á, óhreinn sem hanna er. Þetta er nú meiri viðbjóðurinn, sem ekkert fær læknað nema hressileg bylting, sósíalísk að sjálfsögðu.

Nýsköpunarmiðstöð Íslands verður lögð niður