Gottfreð læknir hefir bruggað og selt fólki sterkt kóvíðsmeðal í faraldrinum

Síðastliðið ár hefir verið annasamt í lífi Gottfreðs læknis Gottfreðssonar, en því hefir hann varið við að berjast sem ljón í móti kóvíð nítjánda, því umdeilda kvefi. Í upphafi farsóttar sá Gottfreð sér leik á borði og vefengdi kóvíð nítjánda, sagði þetta vera væga skítpest sem best væri að lækna með ormalyfi þá skjaldan lækningar þyrfti við. Svo fór Gottfreð að selja viðskiptavinum sínum litdaufan vökva í ómerktu glasi ásamt munnlegum fyrirmælum um inntöku vökvans, en af þeim loknum væru þeir úr allri hættu á að fá kóvíð nítjánda.

Það hefir verið sagt að ýmsum hafi þókt lækningavökvi Gottfreðs heldur bragðvondur, en því miður hafði enginn rænu á að láta rannsaka innihald glassins. Hið sanna aftur á móti er það, vökvinn var gjarnan samsettur úr þvagi læknisins sjálfs, dálitlu af ormalyfi ætluðu sauðfé og fáeinum dropum af hoffmannsdropum til að fá lyfjalykt af meðalinu. Stundum bar við að einhverjir sem leituðu úrlausnar hjá Gottfreði fengu ósvikið hreinsiefni frá efnagerð, sem kunningi hans hafði útvegað honum til að búa til rottueitur úr. Skipti engum togum, að eftir inntökuna lágu neytendurnir nær dauða en lífi með allt í buxunum þar sem þeir lyppuðust niður, sumir í nokkra sólarhringa áður en að var komið.

Ekki verður því að neitað að Gottfreði lækni græddist ákafleg fé á lyfsölu sinni við kóvíði nítjánda. Nokkrir létust fljótlega eftir að hafa fengið lyf hjá honum og þá hló Gottfreð all-dátt og heimtaði nákvæma lýsingu á dauðstríði hins ólánssama. Gamla frú, leiðinlega og hávaðasama og fram úr öllu hófi freka og vitlausa freistaðist Gottfreð til að sprauta með lyfinu í ómerkta glasinu. Fyrst stífnaði kérlíngarsvarkurinn öll upp og blánaði undarlega í framan og augun ætluðu út úr hausnum á henni. Svo fór hún að tylla sér á tá eins og ætlaði að takast á loft. Að lokum heyrist dulítill smellur, og höfuðið fauk af henni eins og tappi úr freyðivínsflösku. Um þessa tilraun skrifaði Gottfreð langa og lærða ritgerð, sem nú er geymd í hundrað og tíu ára leyndarmálageymslu ríkisstjórnarinnar, en leifarnar af kerlíngunni fór hann með í sorptunnuna og hefir ekki spurst til hennar síðan. Já, mikill læknir er Gottfreð Gottfreðsson læknir. 

Afhentur vökvi gegn veirunni í ómerktu glasi