Það þarf víðtækari uppreisn

Ágúst Fylkisson, einn af talsmönnum bílstjóra, segist vera hissa á því að ekkert hafi heyrst í þingmönnum stjórnarandstöðunnar. „Við erum mjög hissa á því að stjórnarandstaðan skuli ekki koma fram og standa með okkur."

Ágúst þarf svo sem ekkert að vera hissa á að samtryggingarvæddir stjónmálamenn eigi í erfiðleikum með að veita aðgerðum atvinnubílstjóra lið með stuðningi sínum. Þó verð ég að segja eins og er, að mér finnst dálítið undarlegt að VG blandi sér ekki í leikinn og hvetji almenning til víðtækrar uppreisnar gegn okur- og misréttistilburðum hinnar gráðugu borgarastéttar. Af nógu er að taka. Eða á maður að trúa því, að VG ætli haga sér eins og værukær geltur fressköttur þegar þjóðfélagið nötrar af uppsafnaðri reiði? Nú er kjörið tækifæri fyrir forustusveit VG að sýna úr hverju hún er gerð. Eða er hún bara samansafn af geltum fressköttum, sem láta sér vel líka að liggja malandi á stofusófum auðvaldsins? 

Mestu tafir hingað til

Athugasemdir

[Hafsteinn Viðar Ásgeirsson, 2.4.2008 kl. 10:47]

Það er nú ekki gæfulegt þegar forsprakkinn er verri en Soffía frænka hvað geðvonsku varðar og allsendis útilokað að teljast nothæfur í tiltektir af neinu tagi. Svo höfum við greyið hann Munda, ekki bætir hann upp forystusauðinn?

[Þórdís Bára Hannesdóttir, 2.4.2008 kl. 11:36]

fólkið verður að vita hverju er verið að mótmæla. Setja sig inn i málin.

[Ásthildur Cesil Þórðardóttir, 2.4.2008 kl. 12:10]

Já ég vona að þetta verði víðtækara.

[Jóhannes Ragnarsson, 2.4.2008 kl. 12:58]

Já, það er ekki gott ef háyfirhershöfðinginn ef geðstirður og snakillur eins og ryðgaður yfirstéttarfémínísti en í leiðinni murrandi og malandi sem einn sterílíséraður fressköttur. Slíkt kann ekki góðri lukku að stýra. En við skulum gefa karlinum smá séns, áður en við afskrifum hann, til að sanna að hann búi yfir nokkrum byltingaranda.

Ég held, Þórdís Bára, að almenningur viti alveg hverju því ber að mótmæla. Það þarf aðeins að finna mótmælum sínum farveg. Því miður er þann farveg, eða leiðsögn, ekki að finna innan vébanda verkalýðsforustunnar. Þannig að böndin berast að þeim stjórnmálaflokki, sem kveðst standa lengst til vinstri í íslenskri pólitík, að gera allt sem hann getur til að skapa nauðsynlegan farveg fyrir almenning til að sýna hvers hann er megnugur.

Aðgerðir trukkakarlanna eru ágæt, svo langt sem þau ná, en spanna afskaplega þröngt svið. En ég held að nú sé tækifæri til mun víðtækari aðgerða, sem hefðu töluverð áhrif. 

[Rúnar Sveinbjörnsson, 2.4.2008 kl. 16:52]

Jói, oftast er ég sammál þér. En nú er ég hugsi, atvinnubílstjórar sem mótmæla eru flestir sjálfstarfandi verktakar. Eigum að fara að veita verktökum afslátt ofan á skattalækkanir úr 17 í 15%, því flestir eru þeir ehf. Ekki batnaði málstaðurinn þegar jeppakarlarnir bættust í hópinn með bíla sem eyða yfir 20l. á hundraðið og notaðir eru í bílaleik.

Óskandi væri ef fólk gæti sameinast um mótmæli gegn láglaunasköttum. 

[Jóhannes Ragnarsson, 2.4.2008 kl. 17:50]

Útaf fyrir sig hef ég takmarkaða samúð með því sem vöruflutningabílstjórar eru að berjast fyrir, þ.e. lækkun á eldsneytisverði, að ég minnist nú ekki á jeppaspjátrungana, sem ættu, ef eitthvað er, að borga helmingi hærra verð en aðrir fyrir dropann á skrjóðana sína. Hinsvegar hafa þessir karlar sýnt frammá, að það er hægt að rísa upp, með skæruhernað að vopni, á friðsamlegan hátt.

Á sama hátt væri óskandi að alþýða manna tæki sig til og beitti samskonar aðferðum, eða svipuðum, til að knýja fram breytingar á lífskjörum sínum. Lág laun, láglaunaskattar, okurvextir, verðhækkanir á nauðsynjavörum, vaxandi stéttarskipting, ásamt ýmsu öðru, ættu að vera atriði sem fólk gæti sameinast um að mótmæla af þunga.   

[Rúnar Sveinbjörnsson, 2.4.2008 kl. 18:28]

Þakka þeir Jói við skiljum hver annan.

[Óskar Arnórsson, 2.4.2008 kl. 21:56]

Tek undir orð ykkar, Jóhannes og Rúnar. Almenn reiði ungra barnafjölskyldna er að verða greinilegri. Yrði ekki hissa á að unglingar, smitaðir af fjárhagsáhyggjum foreldra yrðu fyrtir að valda verulegum uppþotum ef ekki fer að gerast eitthvað sem sýnir jákvæðni frá stjórnvöldum sem gera mest annað lítið en að bulla á fundum og leita að sökudólgum erlendis...munstrið í upptöppun á múgæsing finn ég á lyktinni...spái því að að það verði fyrstu alvöru uppþotin hjá stórum hópum unglinga...og hvað ætlar löggæslan okkar að gera í því máli? Bjóða þeim í nefið? Það væri þá helst amfetamín eða kókaín sem þeir yrðu að bjóða upp á eða senda Víkingasveitina og skjóta þá...veruleikafirringin hjá Ríkisstjórn er komin út í tóma þvælu með tilheyrandi afleiðingum...það er kannski dónaskapur að vekja sofandi Ríkisstjórn! Minnir mig á brandara sem einn verkakall í slippnum var vanur að segja. "Ég er alltaf mættur í vinnuna kl.08.00 þó ég sé ekki vaknaður fyrr en eftir mat!" Finnst þetta eiga við snobbistanna sem eru með stjórn Íslands sem aukavinnu...  

[Árni Gunnarsson, 8.4.2008 kl. 10:55]

Er ekki til of mikils mælst að forysta stjórnarandstöðunnar á Alþingi standi fyrir götumótmælum?

Hæddur er ég um að þá kæmu fram efasemdir um skilning VG á lýðræðinu.