Hörkukerlingin Björk

Loksins rekst maður á eitthvað verulega jákvætt í öllum fréttflaumnum sem vellur dag og nótt útaf fjölmiðlunum eins og illlyktandi forarvilpa. Enn og aftur sannar Björk okkar hérna, dóttir hans Guðmundar í rafmagninu, að hún er gerð úr sterkari þráðum en sinustráum og tvinnaspottum. Nú ætlar hún sem sé, að syngja náttúru Íslands til dýrðar á ókeypis útitónleikum, ásamt snilldarsveitinni Sigur Rós. Það er ekki ónýtt að eiga heimsklassa listamenn, sem kunna og geta eitthvað meira en að hugsa um rassgatið á sjálfum sér og annan þessháttar innantóman hégóma.

En því miður hafast fjármálaséní vor og stjórnmálalágkúrumenn annað að. Þeirra ær og kýr eru skemmdarverk á ósnortinni náttúru Íslands, sem og á þjóðarsál íslendinga. Stórvirkjanir og álver er það eina sem þessum brjóstumkennanlegu görmum dettur í hug, fyrir nú utan olíuhreinsunarviðbjóðinn sem ætlunin er að svívirða vestfirðinga með.

Guð gefi okkur fleiri Bjarkir og fleiri Sigur Rósir, en færri fjármálaséni, stjórnmálalágkúrumenn og önnur slík niðurrifs- og skemmdarverkaóféti. 

 

Ísland verði áfram númer eitt

Athugasemdir

[Birgitta Jónsdóttir, 6.6.2008 kl. 00:27]

heyr heyr:)

[Þórdís Bára Hannesdóttir, 6.6.2008 kl. 10:37]

ekki geta allir lifað á peningunum hennar bjarkar er það? og ef eitthvað  framleiðslufyrirtæki verður til hér á landi þá er það unnið af kínverskum verkamönnum. áhverjuá íslenski verkamaðurinn að lifa? loftinu?  VG hefur engan áhuga á íslensku verkafólki.

[Jóhannes Ragnarsson, 6.6.2008 kl. 12:52]

Það er rétt hjá þér, Þórdís Bára, að VG, eða a.m.k. þeir sem ráða þar ferð, hafa lítin sem engan áhuga á íslensku verkafólki. Reyndar er sömu sögu að segja um aðra stjórnmálaflokka hér á landi. Mér finnst að það bráðvanti sósíalískan verkalýðsflokk og tel sjálfsagt að fólk fari að taka sig saman og stofni slíkan flokk.

[Þórdís Bára Hannesdóttir, 6.6.2008 kl. 14:14]

Ég ætla að halda í vonina a.m.k. eithvað,áfram um að ,,jafnaðarmannaflokurinn" sé ekki alveg gagnslaus. Sósíalískur verkalýðsflokkkur yrði ,,kapítalískur" ef hann kæmist til valda eins og hefur sýnt sig í kommunistaríkjum. Því miður, maðurinn er allsstaðar samur við sig. Græðgin verður öllu yfirsterkari hjá valdhöfum.