Að rota fólk í sumarbústöðum

Það þarf ekki að koma neinum á óvart þó slái í brýnu milli vaskra drengja sem staddir eru í sumarbústað. Kunningi minn einn, uppivöðslusamur og ofbeldishneigður, sagði mér fyrir skömmu síðan, að sumarbústaðir væru einmitt albesti staður sem hugsast getur til hörkuslagsmála í illu. Hann kvaðs eitt sinn hafa barist á þriðja klukkutíma við illskeytt hjón í sumarhúsi hjónanna. Þegar kunningja mínum hafði loks tekist að rota bæði hjónin, var sumarbústaðurinn svo gott sem ónýtur og heiti potturinn líka. Nokkrum vikum síðar, sagðist kunningi minn, hafa rotað heila fjölskyldu í sumarbústaði í Ölfusborgum; enfremur, að það hefi verið hrein unun að horfa yfir vígvöllinn á eftir. 

Líkamsárás í sumarbústað

Svandís einkavæðir í Asíá

Ekki er annað að heyra á máli Svandísar Svavarsdóttur, þeirrar hinnar sömu og nú er í hvað mestum metum hjá Sjálfstæðismönnum og blindu áhugafólki um pólitík, að henni finnist ekkert athugavert við að Reykjavíkurborg aðstoði einhverja auðvaldsdela við að einkavæðingu jarðvarmafyrirtækja austur í Asíu, meðan flokkur hennar sjálfrar, VG, reynir,með Ögmund Jónasson í broddi fylkingar, að berjast á móti einkaæðingu hér heima. Hvern fjandann svona loddaraskapur og hræsni á þýða er ekki auðvelt að ráða fram úr. Má vera að snobbhænsnin í flokkseigendaelítu VG séu með lægni að feta sig í rólegheitunum inn á brautir einkavæðingar til að falla betur í kramið hjá erkíhaldinu, framsóknaríhaldinu og samfylkingaríhaldinu? Það er vitað, að innan VG eru pólitísk viðrini sem eiga þann draum mestan og æðstan nú um stundir að VG komist í gott hjónaband með Sjálfstæðisflokknum sem allra-allra fyrst. Ja, þokkalegur hugsjónaeldur atarna, eða hitt þá heldur, og lítilmennskan að sama skapi.

Ég held að sá tími sé upp runninn að flokkseigenda-elíta VG, ásamt sínu menntaða fémínístafargani, ætti að fara að hafa vit á að draga sig yfir á þá ruslahauga sem Samfylkingin og Framsóknarflokkurinn eru. Það fer best á að asninn gangi í sama haga og eyrun á honum eru.

Verður borgarstyrjöld í Árnessýslu, eða mun ráðherra taka í taumana?

Þær gjörast nú tíðar ölvunar og óspektafréttirnar úr umdæmi stjörnusýslumannsins á Selfossi. Má ætla að allt sé úr böndum gengið hjá umræddum sýslumanni og upp sé runnin óöld, ef ekki skálmöld, austrí Árnessýslu. Er nú svo komið, að farinn er að læðast grunur um, jafnvel að hrekklausustu mönnum, að stjörnusýslumaður sá er þeim var fenginn frá Ísafirði hafi borið með sér þann anda að vestan sem flatlendingar í Árnessýslu kunna með engu móti að höndla. Það er samdóma álit fróðra manna, sem og sérfróðra, að baldnir drykkjurustar á Suðurnesjum séu mjög fallnir í skuggan fyrir lagsbræðrum sínum austan Hellisheiðar í tiltektum á sviði drykkjuláta, handalögmála og annarrar óyndislegrar hegðunar. Ef svo fer sem horfir, er vart langt að bíða borgarastyrjaldar í umdæmi stjörnusýslumannsins með þvaglegginn, nema dómsmálaráðherra taki sig til og frelsi árnesinga undan nærveru þessa manns og geri hann að lögreglustjóra í Svefneyjum, eða á einhverjum þeim stað öðrum sem lítil hætta stafar af því móralska andrúmslofti sem virðist eiga óðal sitt  og lögheimili undir húfu stjörnusýlumannsins með þvaglegginn.    

Vildi fá far með lögreglunni til Reykjavíkur

Lesbískar hugrenningar frú Ingveldar

Þegar frú Ingveldur síðarmeir ræddi lesbískar hugrenningar sínar sem kvöldgestur í þætti Jónasar Jónassonar á Rás 1. Ríkisútvarpsins, komst hún svo að orði: - Auðvitað fór ég að finna fyrir þessari tilhneigingu undir eins og ég komst á gelgjuna. Ég prufaði svo sem eitt og annað á unglingsárunum, en fann loks hvötum mínum öruggann farveg með Kolbeini, sem í fyllingu tímans varð eiginmaður minn. Ég meina, kvenleg útgeislun Kolbeins er með þeim hætti, að enginn kvenmaður getur státað af öðru eins. Og ég get með góðri samvisku borið, að Kolbeinn minn hefur alla tíð ,frá því fundum okkar bar fyrst saman,uppfyllt allar mínar svefnherbergisþarfir af einstökum glæsibrag, og þannig borgið mér frá að verða kynvillunni að bráð...

Kvenlæg afbrot eða karllæg?

Það er svo sem góðra gjalda vert að fjölmiðlar segi frá hneykslisverkum ölvaðs fólks. Hitt er verra, þegar ekki er greint skilmerkilega frá því hvers kyns þeir einstaklingar eru sem sváfu úr sér áfengisvímuna í fangageymslunni, brutu gegn lögreglusamþykktinni eða voru teknir moldfullir við akstur bifreiða. Það verður semsé að vera á hreinu hvort umræddir þorparar eru af kvenkyni eða karlkyni svo að hægt sé að leggja mat á hvort um hafi verið að ræða kvenlæg eða karllæg afbrot. Því ef afbrotin eru af kvenlægum rótum runnin, þýðir það að kvannabaráttan er að skila árangri. Hafi brotin hinsvegar verið framin á karllægum forsendum, þurfa konur að spýta grimmt í lófana og herða róðurinn gegn karlveldinu.

Nokkur erill hjá lögreglunni í nótt

Kaupás á móti öllu

Bölvuð endemi eru þessir Kaupáspungar. Þeir eru fjandakornið ekkert skárri ern Vinstrigrænir, þ.e. á móti öllu. Meira að segja þegar gott fólk reynir að vanda um við þá, bregðast þeir illir við eru á móti hinu góða fólki sem vill þeim ekki nema gott eitt.  

Kaupás mótmælir ásökunum um samráð og blekkingar

Ástarsamband Moggans og VG

Föstudaginn 26. október s.l. bregður höfundur Staksteina Morgunblaðsins á leik og upphefur næsta kynlega lofgerðarrollu um Svandísi nokkra Svavarsdóttur sendiherra Gestssonar. Staksteinahöfundi er greinilega glatt í geði, því hann lætur sér ekki muna um að skáka Svandísi fram á kostnað Ingibjargar samfylkingarformanns og forsætisráðherraefnis. Ekki er nóg með, að Staksteinn vilji að Svandís verði fyrsti forsætisráðherra Íslands af kvenkyni, heldur fullyrðir hann, að margt bendi til, að þessi draumaprinsessa hans geti með skömmum fyrirvara tekið við embætti borgarstjóra í Reykjavík með stuðningi borgarfulltrúa Sjálfstæðisflokksins!!!

Það var og.

Það skyldi þó ekki vera, að á bak við tjöldin sé hin efnilega vinstrigræna dóttir Svavars sendiherra, sem og aðrir í flokkseigendafélagi VG, í stöðugu daðri við ráðamenn Sjálfstæðisflokksins, ekki bara um meirihluta í borgarstjórn heldur og ríkisstjórnarsamstarf. Það hefur komið ýmsum, þar á meðal mér, býsna einkennilega fyrir sjónir, hve mikið dálæti hinir morgunblaðslærðu hafa á VG og  einstökum höfuðsnillingum þar á bæ. Þetta dálæti ætti a vera almennum félagsmönnum í VG heilmikið umhugsunarefni, því hér eru ekki á ferðinni beinlínis góð meðmæli með stjórnmálaflokki sem á tyllidögum hreykir sér af því að vera lengst til vinstri í íslenskum stjórnmálum. Ég þykist vita að Steingrími J. og Svandísi finnist moggahólið gott, enda eru þau, bæði tvö, ágætis framsóknarmenn og ekkert til vinstri umfram það.

Sú spurning gerist því æ áleitnari, hvort ekki sé tímabært fyrir raunverulega vinstrimenn, sósíalista, að endurskoða með opnum huga veru sína í flokki sem einokaður er af framsóknarliðinu í flokkseigendafélagi VG. Það er með öllu óraunhæft og óásættanlegt, að sósíalistar á Íslandi séu slík lítilmenni, að þeir geri sér að góðu eitthvert fáránlegt Grænt Kvenfélag af Framsóknartegund og styðji þessháttar óskapnað með ráðum og dáð.Má ég þá heldur biðja um einarða sósíalíska Alþýðufylkingu.     

Kirkjumálaráðherra og Helvítisenglar berast á banaspjót.

Mikið held ég að sá stríðsglaði dóms- og kirkjumálaráðherra okkar sé í essinu sínu í dag. Það er enginn smá munaður fyrir karlálkuna að geta látið sína stormsveitarmenn fara í stríð við ekki minna hernaðarveldi en Helvítsengla af Norðurlöndum. Ef að líkum lætur, mun verða orrusta á Keflavíkurflugvelli með skothríð, sprengjukasti og mannfalli. Svo er að sjá hver stendur uppi sigurvegari að bardaga loknum, stormsveit kirkjumálaráðherra eða Helvítisenglar. Ef allt fer á versta veg, munu Helvítsenglarnir ekki telja eftir sér að fella allan herafla kirkjumálaráðherra og hann sjálfan, ef hann hættir sér of nærri vígvellinum. Í kjölfarið mun hinn óvinveitti innrásarher fremja valdarán og mun þá koma í ljós hvor mafínan er verri, sú gamla kirkjumálaráðherrans eða hin nýja Helvítisenglana og Fáfnis. 

Ríkislögreglustjóri með viðbúnað vegna komu Vítisengla til landsins