VG kann ekki að reka kosningabaráttu.

Það er engum blöðum um það að fletta að VG kann ekki að reka kosningabaráttu. Þeim virðist vera að takast að glutra niður góðu fylgi á endasprettinum. Áróðurstaktík flokksins virðis vera verulega áfátt svo engu er líkara en hann hafi lent á milli þilja í baráttunni, eða öllu heldur fallið milli skips og bryggju. Ef VG ætlar ekki að húrra niður í 10 prósent á kjördag verður fólk þar á bæ að gera sig gildandi svo um munar þá daga sem eftir eru til kosninga. 

 

Fylgishreyfing mest meðal kvenna á vinstri vængnum

Frú Bjartmarz er snillingur - hreinn og klár snillingur.

Þetta er sannkallað snilldarútspil hjá frú Bjartmarz. Hún virðist ætla sér að koma því inn í hausinn á Helga Seljan og öðru kastljósfólki, í eitt skipti fyrir öll, að það eigi ekki að voga sér svipta tjöldunum frá baktjaldabrallinu hjá höfðingjunum.

Umhverfisráðherra ætlar að kæra umfjöllun til siðanefndar

Chavez, silkigallaliðið og sægreifarnir.

Þetta líkar mér, svona eiga stjórnmálamenn að vera.

Þegar Chavez verður búinn að taka til heima hjá sér væri upplagt að fá hann hingað til lands til að stjórna rækilegri vorhreingerningu í stjórnmálum á Íslandi. Ekki veitir af eftir áralanga græðgisvæðingu og annan subbuskap borgarastéttarinnar. Ég er viss um að félagi Hugo yrði fljótur að klæða þotuliðið úr silkigöllunum og snúa ærlega upp á rassgatið á sægreifahjörðinni. 

Chavez hótar að þjóðnýta banka

Að safna saman vötnum.

Andskotans þvættingur er þetta! Ég hélt út frá fyrirsögn greinarinnar, að Hólmararnir væru búnir að safna saman einhverjum kynstrum af vötnum, það er að segja, stöðuvötnum og nú gæti maður brugðið sér þarna inneftir og skoðað merkileg vötn á borð við Þingvallavatn, Mývatn, Langasjó og Reykjavíkurtjörn. En því miður, þarna er bara um eitthverja pjátursýningu að ræða sem þeir kalla ,,vatnasafn".

Annars er hugmyndin um að safna saman vötnum ansans ári góð og síður en svo út í hött. Þetta gerði ríkisstjórnin fyrir þá þarna fyrir Austan og úr varð Kárahnjúkavirkjun. 

Vatnasafnið opnað í Stykkishólmi

Logandi sígaretta ofan í opna buxnaklauf?

Mér finnst vanta tilfinnanlega í þessa frétt hvað varð um sígarettuna sem pilturinn missti. Því ef hann hefur misst hana logandi ofan í opna buxnaklaufina, er hætt við að allt hafi farið í bál og brand á miðvígstöðvunum.

Reykingarnar höfðu slæmar afleiðingar

Það er skammarlegt að drukkna í Reykjavíkurtjörn

Það var naumast að manngarmurinn fékk ér neðaníðí, fyrr má nú gagn gera. Fyrst þetta var útlensk fyllibytta, má gera ráð fyrir að hann hafi ekki vitað, að einhver mesta skömm sem einn maður getur orðið fyrir er að drukkna í Reykjavíkurtjörn; háðuglegri daudagi er ekki til á Íslandi og er þá ,,reiðarslag" meðtalið.

Ég er líka að velta fyrir mér hvort það hafi verið einhver innfæddur sem hellti manninn svona ösku-blindfullann. Sem minnir mig á þegar ég og Gvendur vinur minn helltum rússneskan sjómann svo hryllilega ofurölvi á Hótel Borg, að félagar hans urðu að bera hann um borð. Það hefur víst ekki runnið af þessum manni síðan, og eru þó þrjátíu og tvö ár liðin frá því fundum okkar bar saman. Með þessu er ég þó ekki að gera að því skóna, að hinn ágæti japanski ferðamaður eigi eftir að vera draugfullur þa sem eftir er æfinnar. En það er samt aldrei að vita ...

Ölvaður ferðamaður fannst í Tjörninni

Herra Haarde og hans kompaní.

Herra Haarde og hans kompaní er greinilega kominn á bullandi flótta með fyrirætlum auðvaldsaflanna að ræna Landsvirkjun frá almenningi. Hann veit sem er, að umræða um slíkt ráðabrugg er ekki heppilegt rétt fyrir kosningar, það gæti kostað ríkisstjórnarflokkana heilmikið fylgi.

Annars virðist herra Haarde vera svolítið séður karl, a.m.k. gerir hann hvað hann getur til að fela ránfuglinn undir sauðagærunni, lygnir augum í sjónvarpsviðtölum, slær úr og í og veltir vöngum. Minnir einna helst á værðafullann fresskött sem dormar á meltunni. Takist honum með þessu værðarmóki að rorra ríkistjórnarjaktinni heilli til hafnar á kjördag með Framsóknarmaddömuna á lífi, mun Sjáfstæðisflokkurinn verða fljótur að kasta sauðargærunni og taka til við að skerpa gogg og klær, albúinn að halda ránsskap sínum áfram græðginni til dýrðar.

 

Stjórnarflokkar ekki rætt um sölu á Landsvirkjun

Mafíubæli?

Ef þetta er rétt hjá Skúla, verður ekki annað séð en ríkisstjórn Íslands og flokkarnir sem að henni standa séu rétt og slétt mafíubæli. Slíkan ófögnuð ber okkur auðvitað að uppræta, sé hann fyrir hendi, og sem betur fer fær þjóðin tækifæri til þess eftir 11 daga.

Það er engin ástæða til að taka áhættu - Burt með ríkisstjórnina 12 maí!

Segir að byrjað sé að undirbúa sölu Landsvirkjunar