Íhaldið vill nýja hækju.

Það er alveg rétt hjá félaga? Steingrími J., að kjósendur hafa gildar ástæður til að kjósa ekki áframhaldandi ríkisstjórnarsamstarf Sjálfstæðisflokks og Framsóknarflokks. Gallin er hinsvegar sá að kjósendur hafa lítil sem engin áhrif á hvaða flokkar mynda næstu ríkisstjórn. Þó að stjórnin nái ekki halda meirihlutanum, eða meirihlutinn verði mjög tæpur, er mjög líklegt að Sjálfstæðisflokkurinn kippi bara öðrum flokki uppí til sín í staðinn fyrir maddömuræxnið; sá flokkur verður þá mjög líklega Samfylkingin. Ég veit til þess, að margir Sjálfstæðismenn er þess fýsandi að sparka maddömunni niður í kjallara og mynda ríkisstjórn með Samfylkingunni í staðinn, alveg burtséð frá hvort núverandi ríkisstjórnarflokkar halda meirihluta sínum eða ekki. Og reyndar yrði ég ekki undrandi þó ég fengi staðfest núna að ríkisstjórn þessara flokka sé nú þegar til á pappírunum.

VG hvetur Íslendinga til að snúa við blaðinu

Framsókn ekki dauðvona - því er nú ver.

Þessi frétt minnir mig dálítið á Framsóknarflokkinn. Þeir eru ekki allfáir sem greint hafa þann þursaflokk með ólæknandi innanmein sem drægi hann vissulega til dauða þann 12. maí næstkomandi. En þegar talið verður upp úr kössunum mun koma í ljós að greining hinna sjálfskipuðu sérfræðilækna var röng. Þá mun koma í ljós að sjúkdómurinn var ekki illkynja heldur góðkynja bræðingur af peningageðsýki, græðgissótt og valdasótt og kvótafíkn.

Dauðvona sjúklingur sem eyddi aleigunni var ranglega greindur með krabbamein

Er Samfylkingin að skríða uppí til Íhaldsins?

Mikið andskoti er ég hræddur um að Samfylkingin sé um það bil að skríða upp í bælið hjá Sjálfstæðisflokknum, sé jafnvel komin með annann fótinn undir sængina. Auðvitað reyna talsmenn Samfylkingarinn eftir föngum að afneita þessari kenningu svona rétt á meðan þeir eru að safna atkvæðum fyrir kjördag. Í Silfri Egils í gær var ekki annað að heyra á Sigurði Kára Kristjánssni en að ríkissjórn þessara flokka kæmi vel til greina, og það var ódulið eggjahljóð í stráknum!

Í framhaldi af þessu er rétt að minna á, að fyrir sextán árum hljóp Alþýðuflokkurinn úr félagshyggjustjórn í fangið á Davíð Oddsyni og lagði grunninn að löngum ferli hans á forsætisráðherrastóli. Um tilurð þeirrar stjórnar sagði Össur Skarphéðinsson á opnum fundi í Ólafsvík fyrir nokkrum dögum, að hann hefði fyrst nú í vetur komist að því að búið hefði verið að mynda þá ríkisstjórn á leynifundum úti í bæ löngu fyrir kjördag 1991, og bætti við ,að þar hefðu fjórir kratahöfðingjar verið að verki án þess aðrir flokksfélagar þeirra hefðu hugmynd um.

Ég verð að játa, að ég sé svosem fátt sem getur komið í veg fyrir að kratasagan frá 1991 endurtaki sig ekk vorið 2007, nema ef vera skyldi að Samfylking og VG næðu hreinum meirihluta á Alþingi. Og þó svo að VG og Samfylking næðu meirihluta, er hætt við að lokrekkja Íhaldsins freisti margra í Samfylkingunni.  

Samfylking og Sjálfstæðisflokkur bæta við sig fylgi

Valgerður, Wolfowitz og klámkarlarnir.

Þetta er aldeilis þokkalegt að heyra. Hvað vit í að banna mannaumingjanum að koma í heimsókn þó hann hafi gaukað einhverju smáræði að frillu sinni. Þetta minnir mann á þegar klámköllunum var meinað að halda samráðsfund í Bændahöllinni í vetur. Og að það sé Valgerður áldrottning og framsókanarmaddama sem vill ekki fá Wolfowitz karlangann í heimsókn er vægast sagt kostulegt í ljósi afreka Framsóknarflokksins síðustu 12 árin.

Sko, ef Wolfowitz er spilltur (sen hann auðvitað er) hvað má þá segja um Framsóknarflokkinn? Ég fæ a.m.k. ekki séð að framsóknarmafían sé fremur landtæk en Wolfowitz og klámkarlarnir.  

 

Wolfowitz aflýsti ferð sinni til Íslands að beiðni ráðherra

Kompásþáttur um athafnasama kvótafíkla kl.19:15 í kvöld.

Minni hér með háttvirta lesendur á að horfa á Kompásþáttinn á Stöð 2 í kvöld. Ég á von á að þar komi ýmislegt fram um vinnulag sægreifanna sem komið gæti fólki á óvart.

Kosningastjórn VG í klessu?

Þessa daganna er flatneskjuleg og kraftlaus kosningabarátta VG mér töluvert umhugsunarefni. Auglýsingar flokksins í fjölmiðlum eru undarlega litlausar, að maður segi ekki ufirborðskenndar og það svo að maður hristir höfuðið í hvert skipti sem þær bera fyrir augu. Því miður virðist það vera þannig að langöflugustu talsmenn VG, Ögmundur og Steingrímur J. hverfa mikið niður í flatneskjusvað flokksins þegar þingi lýkur og út í kosningabáráttu er komið. Þetta gerðist líka fyrir síðustu alþingiskosningar með eftirminnilegum hætti og ég hélt í einfeldni minni að þessháttar yrði ekki látið gerast aftur. En annað hefur komið á daginn, og flokkurinn hríðfellur í skoðannakönnunum dag frá degi.

Þá hefur það sem ég hef séð til og heyrt af kosningastjórn VG valdið mér nokkrum heilabrotum, vægast sagt. Á höfuðborgarsvæðinu er ein sameiginleg kosningastjórn, með Svandísi Svavarsdóttur í broddi fylkingar, sem skipuleggur ferðalög frambjóðenda í kjördæmunum þremur. Hvernig stendur t.d. á því að efstu frambjóðendum í Suðvesturkjördæmi, Ögmundi Jónassyni og Guðfríði Lilju Grétarsdóttur, er í gríð og erg beint á vinnustaðafundi og aðrar uppákomur í Reykjavík en ekki í sitt kjördæmi? Þessi einkennilegheit eru orðin umtöluð meðal flokksmanna í SV-kjördæmi og farin að valda þeim áhyggjum og óánægju. Getur það virkilega verið að fulltrúar flokkseigendaelítunnar í kosningastjórninni fari svona að, vitandi vits, til að halda Ögmundi og Guðfríði Lilju sem mest frá kjördæminu þar sem þau eru í framboði? - ef svo er, hver þá tilgangurinn?. Ég er þar með ekki að fullyrða eitt eðaneitt í þessum efnum, en svona líta hlutirnir einfaldlega út í augum leikmanns. Ef þetta er raunveruleikinn, þó ekki væri nema að hálfu leyti, þá er mikið að í flokki VG og því ekki nema eðlilegt að skoðanakannanir telji hann niður fram á kjördag..   

Gettu betur - bókmenntaspurningar.

Að þessu sinni langar mig að leggja þrjár eftirfarandi spurningar fyrir lesendur:

1. Úr hvaða bók og eftir hvaða höfund er þessi tilvitnun: ,,Ræningjafjölskyldan með húsbóndann í broddi fylkingar þvingaði mig til þess að ljúga! Þessar síljúgandi manneskjur tróðu sinni eigin lygi inn í mína sannleikselskandi sál, með því að leggja mér sína eigin lygi í munn með allri þeirri mannlegu grimmd, sem þekkist."?

2. Spurt er um bók og höfund: ,,Mér leist halurinn fremur ábúðarmikill og líklegur til að verða illur viðfangs í lúgarnum, svo ég beið ekki boðana, heldur sló hann niður og skundaði í land að svo búnu að þiggja veislu Ólafs viar míns."?

3. Spurt um bók og höfund: ,,Með tiltölulega skömmu millibili uppgötvaði ég þannig ýmis fleiri dýr, sem of langt yrði upp að telja. En ég nefni rétt til dæmis hinn mannskæða sæhjört, spendýr af pugrottukyni, kýrtegun, sem hvergi hefir átt sinn líka, og fleiri athyglisverðar dýrategundir. Á hverju degi bættist nýtt dýr í hópinn."? 

Svo svarið þið lesendur góðir á athugsemdasíðunni hér fyrir neðan. Áfram gakk!

 

Aðkomumaður, eldspýtur, kveikjari og Akureyringar.

Svo er að sjá að hinn alræmdi ,,aðkomumaður" á Akureyri hafi ennþá einusinni látið að sér kveða þar í bæ og nú með eldspýtur og kveikjara að vopni. Eins og alþjóð veit, hefur þessi hvimleiði aðkomumaður hefur gert Akureyringum margar kárínur í gegnum árin. Það má því telja undarlegt að Akureyringar skuli ekki hafa tekið á sig rögg fyrir löngu síðan, handsamað aðkomumanninn og flutt hann hreppaflutnigi yfir vötn og heiðar til síns heima. Eitt meðal annarra afreka þessa leiðindamanns var þegar hann tók sig til og hóf ,,að svala ástarþrá sinni og líkamslosta á sauðkindum Akureyringa sem eru til húsa í fjárborg Akureyringa, rétt fyrir ofan sjálfa aðalborgina", svo ég vitni orðrétt í Flosa Ólafsson sem er manna sérfróðastur í Akureyringum.

Því tel ég rétt vera, að Akureyringar fari nú að láta það eftir sér að reka gistivin sinn, aðkomumannin, af höndum sér í eitt skipti fyrir öll svo að bæjarbúar geti loksins farið að sofa rólegir um nætur fyrir uppátækjum og spellvirkjum ,,aðkomumannsins." 

Fjórar íkveikjur og eldur í húsi á Akureyri í morgun

Svívirðileg framkoma ferðamanns.

Þetta þykir mér aldeilis ófullnægjandi frétt, það vantar allt í hana sem við á að éta. Það er algjört lágmark, þegar frétt er birt um óhlýðni og dónaskap ferðamanns, að tilgreina í smáatriðum í hverju óhýðnin og dónaskapurin var fólgin. Þegar svona er í pottinn búið verður fólk að geta sér til um staðreyndir málsins, sem er engan veginn nógu gott, því fólk er nú eins og það er. Ég vil t.d. ekki láta hafa eftir mér eitt einasta orð um getgátur mínar um ósvífni hins drukkna ferðamanns. Hitt þykist ég vita, að þarna hafi ekki verið um að ræða þennan venjulega dónaskap sem ölvuðum ferðamönnum er tamur, heldur eitthvað allt annað og miklu verra, jafnvel svívirðingar um forsætisráðherrann og Framsóknarflokkinn. 

Ferðamaður settur í fangaklefa

Eiginkona andast að heimili sínu.

Aðfaranótt fimmtudagsins fimmta maí  árið 1982 andaðist frú Marta Skrúðbeck húsmóðir að heimili sínu, Skjólgarði 214. Hún var harmdauði öllum þeim sem til hennar þekktu því hún var orðlögð fyrir einstaka alúð við allt sem hún tók sér fyrir hendur og skilningsrík viðhorf til manna og málefna. Eins og gefur að skilja var harmurinn þó mestur hjá hennar nánustu, eiginmanni, börnum og öldruðum foreldrum sem hugsuðu Guði þegjandi þörfina fyrir að taka hana fyrirvaralaust til sín.            Eiginmanni Mörtu, hafði ekki orðið svefnsamt þessa örlagaríku nótt og þegar hann varð þess var að kona hans var önduð í hjónarúmi þeirra bugaðist hann algjörlega og gat engan veginn á heilum sér tekið. En um morguninn, þegar allt var kolniðasvart í huga Eyvindar, fékk hann skyndilega skáldlegan innblástur, varð altekinn guðlegri hugljómun  og orti fyrirhafnarlaust:

Ég hengdi Mörtu mína í nótt með snæri,

svo mér er þungt um hjartarót af trega

en Marta heitin hraut svo gífurlega

að hér var ekki nokkurt undanfæri.