Velþefjandi skartgripaskjóður álykta

Og ekki láta hinar stífpúðruðu yfirstéttarkerlingar í Landssambandi sjálfstæðiskvenna uppá sig standa að freta út ályktun til stuðnings VillaVill. Í leiðinni eru þessar velþefjandi skartgripaskjóður að lýsa gleði og fögnuði yfir að VillaVill, og hans gengi, skuli á tillits- og miskunarlausan hátt hafa tekist að fífla heiðursmanninn og einfeldninginn Ólaf F. til fylgilags við sig með hálfum borgarstjórastól. Það fer varla framhjá neinum, að umrædd ályktun ber þeim sem samþykktu hana ekki fallega sögu. Ónotaleg framhleypni auðvaldskerlinganna í hinu gagnmerka Landsambandi sjálfstæðiskvenna ber að þessu sinni velgjandi dám af illu innræti þar sem ekkert tillit er tekið tekið til velferðar Ólafs F. Magnússonar sem var svo innilega óheppin að vaða eins og blindur hvolpur út í lygakviksyndi Sjálfstæðisflokksins. Megi Guð gefa að honum verði bjargað heilum að húfi úr þeirri forarvilpu.   

Sjálfstæðiskonur fagna nýjum meirihluta

Framsóknarfélagið Guðjón Ólafur

Mikið vildi ég að Guð gæfi að einhverjir valinkunnir framsóknarmenn stofnuðu heiðarlegt stjórnmálafélag undir nafninu: Framsóknarfélagið Guðjón Ólafur. Ég er viss um að það myndi freista margra gáfaðra, frjálslyndra og víðsýnna einstaklinga að ganga í félag sem héti svo afgerandi nafni. En gáum að því, að félagar í Framsóknarfélaginu Guðjóni Ólafafi yrðu að ganga um með hlemm á bakinu og rassinum til verjast árásum ófyrirleitnra bakstungumanna sem alltaf eru á sjái í kringum Framsóknarfjósið. Og við skulum gera okkur grein fyrir að hinir blóðþyrstu bakstungubófar hlífa engum þessa dagana og svo eru þeir fólskir að þeir myndu stinga búrknífum sínum á kaf í rassgatið á sjálfri Maddömunni fengju þeir færi á.

Mikið áfall fyrir Framsóknarflokkinn

Vísaði börnunum frá sér

Hann VilliVill lætur ekki að sér hæða þegar hann er að flýta sér og lætur þá ekki smámuni eins og að tala fyrst við samverkafólk sitt tefja fyrir sér. En svona eiga sannir karlmenn einmitt að vera: röskir, fljótir að hugsa, eða hugsa alls ekki neitt, og láta verkin tala. Því miður eru ekki allir svo vel af Guði gerðir að þeir hafi getu til að fylgja skjótráðum og ráðgóðum mönnum eins og VillaVill eftir þegar hann er á fullu skriði.

Það er því öldungis óviðeigandi og absúrd að frú Edwald hæstaréttarlögmaður skuli þenja sig út og fitja uppá trýnið eins og hvefsinn hundur þó að röksleikamanninum Vilhjálmi hafi láðst að setja sig eitthvað sérstaklega í samband við þá æruverðugu frú áður en hann skipaði hana formann barnaverndarnefndar Reykjavíkur. 

Og í þokkabót bítur þessi kona hausinn af skömminni með því að hafna bitlingnum, þó pólitískur sé, og þar með gjörvallri æsku höfuðborgarinnar. Í þessu sambandi verður ekki hjá því komist, að benda á að Kristur, frelsari vor, sagð: ,,Leyfið börnunum að koma til mín en bannið þeim það eigi." En frú Edwald er þeim mun merkilegri frelsaranum að hún vísar börnunum frá sér. Fyrr má nú gagn gera !  Svo eru konur sífellt að kvarta undan að framhjá þeim sé gengið þegar ráðið er í forustu- og stjórnunarstörf !

En vonandi lætur VilliVill ekki kenjar frú Edwald á sig fá, heldur sínu þráðbeina striki og tekur sér til handargagns næstu kvinnu sem á vegi hans verður og skipar henni að vera ekki með neitt andskotans múður þó hann hlammi henni eins og hverjum öðrum kartöflupoka í stól formanns barnaverndarnefndar Reykjavíkur. Það væri t.d. alveg gráupplagt fyrir karlinn að dubba Hannes Hólmstein Gissurarson upp til barnaverndarnefdarformanns. Ég er nefnilega handviss um að Hannes myndi verja blessuð börnin af jafnmiklum ákafa og hann ver kvótakónga samfélagsins og aðra auðvaldsbelgi og yfirgangshunda. Það yrði samfélagsleg blessun. 

Skipuð formaður barnaverndarnefndar að henni forspurðri

Innsýn í ranglátt kvótakerfi

Eftirfarandi grein er eftir Ögmund Jónasson og birtist á heimasíðu hans: ogmundur.is  

INNSÝN Í RANGLÁTT KVÓTAKERFI

Aðalsteinn Baldurssson, formaður Matvælasviðs Starfsgreinasambandsins, hefur gengið fram fyrir skjöldu og krafist raunverulegra mótvægisaðgerða til varnar fiskvinnslufólki sem nú missir umvörpum atvinnu sína vegna samdráttar í fiskvinnslunni. Hundruð einstaklinga hafa þegar misst vinnuna eða munu gera það á næstunni um lengri eða skemmri tíma. Ríkisstjórnin situr á áhorfendabekk og horfir sljóum augum á framvinduna.

Í haust var hætt að reyna að sporna gegn útflutningi á óunnum fiski en fram til 1. september var slíkur fiskur látinn vega þyngra í kvótaútreikningum en sá fiskur sem fór á innlendan markað. Við þessa breytingu var því heitið að hugað yrði að öðrum mótvægisaðgerðum. VG lagði þá til að allur óunninn fiskur færi á markað til að tryggja að innlendir framleiðendur ættu kost á að bjóða í hann. Á þetta hefur ekki verið hlustað og þær mjög svo auglýstu „mótvægisaðgerðir" svokölluðu hafa ekki komið fiskvinnslufólki til góða.

Atburðir síðustu daga hafa enn einu sinni fært okkur sanninn um hvar völdin liggja í sjávarbyggðunum. Þau liggja hjá handhöfum kvótans. Á þeirra valdi eru örlög sjómanna, fiskvinnslufólks og einnig heilla byggðarlaga. Allir vita að sjávarútvegsfyrirtækin, hvort sem er í útgerð eða fiskvinnslu eru mörg hver verulega skuldsett og þar með veðsett. Hvað þýðir það? Það þýðir að ef að þeim þrengist getur það auðveldlega gerst að kvótinn komist allur á hendur banka og fjármálastofnana. Handhafar kvótans hafa því miður alltof margir, frá tilurð kvótakerfisins með framsali og tilheyrandi braski sem einkennt hefur kerfið, ekki sýnt ábyrgð gagnvart sínu samfélagi. Frekari tilfærsla á kvótanum í hendur fjármálaafla - í hendur þeirra sem hvergi hafa nálægt sjávarútvegi komið - verður ekki til þess að efla samfélagslega ábyrgðarkennd þar sem sjávarauðlindin er annars vegar.Group.is hefur ekki reynst ávísun á ábyrgð og réttlæti.    

Segja HB Granda hafa brotið lög um hópuppsagnir

Láta verkin tala - málefnasamningur ...

Þeim er tamt þessa dagana, VillaVill og Láfa Flista, að japla endalaust upp hvor eftir öðrum þessi tvö stef: ,,Málefnasamningur"  og ,,Láta verkin tala." Og sennilega munu þeir tuldra þennan innihaldslaus kveðskap þegar þeir hrökklast út úr Ráðhúsinu í hinsta sinn. 

Ólafur hyggst láta verkin tala

Það átti að láta hendur skipta í Ráðhúsinu í dag

Ég varð satt að segja fyrir mikilum vonbrigðum með allt það fólk sem mætt var á palla Ráðhúss Reykjavíkur í dag. Ekki vantaði að hafður væri uppi hávaði og gauragangur líkur því sem hafður er um hönd á íþróttakappleikjum og pallafólki tækist að æsa upp til reiðiláta þá geðprúðu sjálfstæðisstúlku Hönnu Birnu sem er að öllu jöfnu víðfrægt stillingarljós og gleðigjafi á hverju heimili þegar hún kemur fram í sjónvarpi og útvarpi.

Ef einhver raunverulegur lífsneisti hefði verið í mótmælendum í Ráðhúsinu og utan þess, hefðu þeir að sjálfsögðu lagt þegar í stað til atlögu við VillaVill, Ólaf F. og þeirra meirhlutafólk og fleygt því öllusaman út í Reykjavíkurtjörn. Og hafi Tjörnin verið ísi lögð í dag, hefði verið hægur vandi að brjóta þar á dulitla vök svo hægt hefði verið að bleyta aðeins í eignunum. Þá tel ég að mótmælendur hefðu átt að fara að dæmi reykvískra verkamanna 1932 og brjóta allt og bramla í fundarsal borgarstjórnar. Slíkar aðgerðir hefðu að sjálfsögðu borið skjótan árangur og komið í veg fyrir fúkka- og subbumeirihluta VillaVill og Láfa Flista í eitt skipti fyrir öll.

En auðvitað var ekki við því að búast að krútt- og kókópuffsæskan sem hélt uppi handboltastemmningu á pöllum Ráðhússins í dag hefði nokkurn urmul að kjarki og þori verkamannanna sem ráku Bæjarstjórn Reykjavíkur á flótta með alvörutiltektum árið 1932. En viðleitni þeirra er samt ágæt útaf fyrir sig og vonandi upphafið að einhverju meiru og beittara. Því er ekki annað hægt að segja en: Áfram krakkar, þið eruð á réttri leið !!! Það skal ganga betur næst !!!

Hávær mótmæli í Ráðhúsinu

Aumingja kerlingin hún Steingrímur

Það átti þá fyrir aumingja kerlingunni henni Steingrími Joð að liggja að verða forstýra jabnréttisnemdar Evrópuráðsþingsins. Ekki er að efa að frú Steingrímur mun hafa hráan eðalmálflutning yfirstéttarfémínístana Kollbrúnar Halldórsdóttur og Sóleyjar Tomm að leiðarljósi í forstýrustörfum sínum í jabbnréttisnemdinni, enda eru þær honum hjartfólgnar mjög og þeirra pólitík honum mjög að skapi. Talið er að fyrsta verk Seingríms í hinu nýja forkonuembætti verði að leggja fram tillögu um að því verði beint til allra evrópuþjóða að jólasveinar þeirra verði kvenkynsvæddir og verði þeirri aðgerð lokið eigi síðar en 1. desember 2008.   

Steingrímur J. fyrsti karlinn til að gegna formennsku

Ungdomshúsið til Reykjavíkur

Í ljósi þrálátra vandaræða stjónvalda í Kaupmannahöfn með Ungdomshúsið sitt ættu Ólafur F. borgarstjóri Reykjavíkur og VilliVill að láta það verða sitt fyrsta verk að skerast í leikinn og bjóða ungdómi Kaupmannahafnar Laugaveg 4-6 til afnota fyrir ungdómsiðkanir sínar. Ekki þarf að fjölyrða um að danskt Ungdomshus í hjarta Reykjavíkur yrði mikil lyftistöng fyrir reykvíkinga alla og þá ekki síst fyrir þá kumpána Ólaf F. og VillaVill sem áreiðanlega fengju góða umfjöllun í heimspressunni. 

Tveir staðir koma til greina fyrir nýtt Ungdomshus

Vængjaróttækni

Í frétt á mbl.is er sagt frá ,,róttækum" framvæng á nýjum kappakstursbíl. Í framhaldi af því vakna eftirfarandi spurningar: Hvernig geta vængir verið róttækir?  Á hvaða rótum taka þeir? Hefur ,,róttæki" kappakstursvængurinn máske sjálfstæðan vilja og vill gjörbreyta einhverju frá rótum?

BMW prófar róttækan framvæng með hornum

Ómerkilegt kjaftabull forsætisráðherra

 Mikið óskaplega er ég orðinn þreyttur á lítilsigldum stjórnmálamönnum sem haga orðum sínum ævinlega á þann veg að augljóst er að þeir líta á almenning sem samansafn fábjána og hlandaula, ef ekki eitthvað þaðan af verra sem eigi að éta allt hrátt sem hinum háu herrum þóknast að sulla yfir hann. Hvernig í ósköpunum dettur t.d. Gjeir Haaarde forsætisráðherra að bjóða fólki uppá kjaftabull eins og það, að síðustu aftrek umskiptinganna í nýja borgarstjórnarmeirihlutanum hafi ekki áhrif á ríkisstjórnarsamstarfið? Ég er nefnilega þeirrar skoðunnar, eins og fjölmargir aðrir, að kaup herra Haaarde og VillVill á Ólafi F-lista hafi heilmikil áhrif á ríkisstjónarsamstarfið, m.a.s. svo mikil að þessi ill-lyktandi subbuskapur kann að verða banabiti ríkisstjórnar Gjeirs Haaarde. Ég þykist vita að samfylkingarfólk er þessar mínúturnar að hugsa sitt ráð og það ætti engum að koma á óvart þó þreifingar séu þegar komnar í gang um myndun nýrrar ríkisstjórna - án Sjálfstæðisflokksins, Gjeirs Haaarde, VillaVill, Davíðs Oddssonar, Hannesar Hólmsteins og Guðlaugs Þórðarsonar.  

Engin áhrif á stjórnarsamstarf