Griðkona yrkir bragarbót

Einn merkasti þingmaður Alþingis, Vigdís Hauksdóttir griðkona úr Framsóknarfjósinu, ku, samkvæmt frétt mbl.is, lagt fram frumvarp til laga, sem ætlað er að sigta út og eyða hortittum og skothendum í lagasentningu í framtíðinni.

Sú var tíðin að flokksystkyni griðkonunnar úr Framsóknarfjósinu sömdu lög allt hvað af tók á Alþingi Íslendinga og létu hvorki stuðla eða endarím tefja kveðskaparlist sína svo sem þjóðskáldum gömlu Framsóknarmaddömunnar er siður. Hvað hæst hefur kveðandi Framsóknarflokksins risið þegar Halldór Ásgrímsson, Finnur Ingólfsson og Valgerður Sverrisdóttir, ásamt minni hagyrðingum, orktu í félagi við frjálshyggjuprestana í Sjálfstæðisflokknum hin alræmdu ,,Frjálshyggjulög" hver höfðu virkjun græðginar að leiðarljósi. Að vísu tókst ekki betur til hjá frjálshyggjuskáldunum en svo, að þeir kváðu efnahagslíf þjóðarinnar niður, að svo miklu leyti sem hægt er að kveða þessháttar líf niður í svaðið.

En nú hefur hin merka griðkona Vigdís tekið sér leyfi frá störfum við hlóðirnar í eldhúsi Framsóknarmaddömunnar til að yrkja bragarbót fyrir lagasetningar Halldórs, Finns og Valgerðar og skuggalegar afleiðingar þeirra.     

Vilja sigta gölluðu lögin út

Uppvakningurinn af Pimlico og Sigurveig dræsa

Það er alltaf eitthvað sem er að koma manni á óvart í henni veröld. Í óafsakanlegri fáfræði minni hef ég lengi verið þeirrar trúar, að barónessur væri löngu útdauð dýrategund, hafi jafnvel aldrei verið til nema í lygasögum sem voru skrifaðar handa börnum fyrir tvöhundruð árum eða fyrr. En nú bregður svo við, að ljóslifandi barónessa skýtur upp kollinum á mbl.is. Og meir en það: baróessan kveður uppúr með, að ekkert sé óeðlilegt við að Bretar og Hollendingar krefji íslenskan almenning um milljarða á milljarða ofan fyrir glæpaverk nokkurra stórbilaðra kapítalista sem ættaðir eru af Íslandi. Mér sýnist á öllu, að umrædd barónessa sé ekki minna siðblind og rotin en icesaveódámarnir, enda af sömu rót runnin og þeir.

Annars minnir lygileg tilvist barónessunnar af Pimlico og forvitnileg speki hennar óneitanlega á stjórnmálakonuna Sigurveigu dræsu, en Sigurveig dræsa flutti merka ræðu á lokuðum aðalfundi fulltrúaráðs sjálfstæðiskvenna á dögunum. Í erindi Sigrurveigar dræsu kom sem sé fram, að allir væru skyldugir að virða og taka þátt í hinu stórlýðræðislega og alfrjálsa kapítalíska gangverki ef ekki ætti illa að fara; meðal annars, að auðvitað ætti almenningur á Íslandi að borga Icesaveskuldir sínar svo ekki skapaðist fordæmi sem raskað gæti ró auðhyggjunnar í heiminum. Orðrétt sagði Sigurveig dræsa: ,,Við sjálfstæðiskonur og menn, getum af stjórnmálalegum ástæðum líðandi stundar, af því við erum í stjórnarandstöðu um þessar mundir, leyft okkur að vera á móti icesavesamningum ríkisstjórnarinnar ef það mætti verða til að að ríkisstjórnin segði af sér. En auðvitað myndum við samþykkja allar kröfur Breta og Hollendinga undir eins og við værum komin í stjórnarráðið aftur, annað væri ófyrirgefanlegt út frá grundvallarhugsjónum hinnar kapítalísku sjálfstæðisstefnu."  

Barónessa segir kröfur á Íslendinga hæfilegar

Sko minn kall

Sko minn kall, það er bara ekkert stóráfall þó þjóðin segi svavarssamningum ofurgóða til andskotans á laugardaginn! En máske er Steingrímur að vinna úr áfallinu hjá sérfræðimennuðum áfalladoktorum, enda hefur hann haft tíma til þess frá því Ólafur Ragnar, fornvinur hans, neitaði að skrifa uppá ávisunina frá Svavari Gestssyni.

Hinsvegar trúi ég mátulega látalátunum í Steingrími varðandi umrætt áfall. Það lítur nefnilega út fyrir að Steingrímur hafi fórnað öllu, flokki, ríkisstjórn og þjóð, fyrir orðstýr Svavars sem samningamanns og súpersnillings og telji það skyldu sína að hanga eins og grimmur rakki á Icesave-roðinu, ef það mætti forða því að stór og andstyggileg skítaklessa lenti á hvítu skyrtubrjósti gamla sósíalistaloddarans sem þáði sendiherrastöðu úr gjafmildum höndum Davíðs Oddssonar og Halldórs Ásgrímssonar. En það þýðir auðvitað ekkert að hanga á roðinu, skítaklessan er löngu farin að þorna framaná belgnum á herra Gestsson.

Í dag kaus ég utankjörstaðar um Icesave-lögin, því ég fer út á sjó á morgun og verð úti í ballarhafi í hálfan mánuð. Að sjálfsögðu sagði ég NEI við lögunum; NEI, NEI, og aftur NEI ... og þvert NEI!

Ef aftur verður samið við Breta og Hollendinga um að þjóðin greiði fyrir stórglæpi forhertra afbrotamanna, krefst ég þess að sá samningur verði líka lagður í þjóðaratkvæðagreiðslu; það er nefnilega þjóðin, fólkið í landinu, alsaklaust fólk, sem á að borga fyrir glæpina í beinhörðum peningum, ofan í aðrar búsifjar sem það hefur mátt þola vegna framferðis glæpamannana

Viðræður geta haldið áfram