Er hann á leiðinni á Litla Hraun?

Vígalundi vallárjarl er ekki af baki dottinn í baráttu sinni við að koma Steingrími J. Sigfússyni bak við lás og slá. Það er útaf fyrir sig góð hugsjón að koma böndum á Steingrím þenna, enda er sá náungi einskaklega viðsjárverð útgáfa af úlfinum í sauðargærunni. Hinsvegar er því miður ólíklegt að lúnir pappírar, sem hinn fallni steypubóndi að Vallá lét einhverja páfagauka snara á íslensku, dugi honum til að koma Steingrími í geymslu hjá Margréti Frímannsdóttur á Litla Hrauni.

Enn ef svo kynlega vildi til, að Vígalunda tækist að draga virkilega baneitraðan gambít uppúr pússi sínu, sem kæmi Steingrími til að svitna, þá myndi hinn síðarnefndi leita umsvifalaust á náðir förðunarstofunnar Argus og kaupa hvítþvott og samherjar hans í útvegsmannastétt tækju upp veskið og borguðu reikninginn. Þessutan hefir Flokkseigendafélag VG orðlagðan stjörnulögmann og rukkara innan sinna raða, sem munar lítið um að snúa einn geðstirðan steypuklump niður eins og blindan kettling.

Það er auðvitað alltaf hægt að hafa lítilsháttar fánýtt gaman að flokkadráttum og innbyrðis þjarki hjá borgarastéttinni. En slíkir samkvæmisleikir fara iðulega eins og blaðran, sem springur þegar of mikið loft er komið í hana. Samt er ljóst, að Kolbeinn Kolbeinsson skrifstofustjóri og framsóknarmaður stendur með Vígalunda. Afturámóti er frú Ingveldur hlutlaus gagnvart hanaslag fyrrgreindra heiðurspilta. En bæði eru þau samt á móti Steingrími, ekki af því að hann sé ekki nógu góður kapítalisti, heldur vegna þess að hann er sköllóttur.

„Haldgóð sönnun“ um brot

Athugasemdir

[Níels A. Ársælsson., 11.3.2015 kl. 19:47]

Voðalegt þetta með geðstirða steypuklumpinn og skallann á Steingrími ............

[Jóhannes Ragnarsson, 11.3.2015 kl. 19:58]

Maður er að vona að þeir félagarnir haldi áfram að skemmta fólki. Ekki veitir af í svona umhleypingatíð.

En hver veit nema að flórmokarinn mikli, Stenngrímur Johoð, verði hraunaður.

[Kassandra, 11.3.2015 kl. 21:08]