Allir blýgráir í framan af sorg

- Þetta var dásamlegur fundur og mikil stemmning og stórar opinberanir. Þetta var svona eins og frábær blanda af samkomu í Krossinum og meðvirkninámskeiði, sagðu frú Ingveldur eftir að fangafundinum lauk á Hilton. Og fleiri tóku í sama streng.

Þarna vóru, samkvæmt áreiðanlegum heimildum, saman komnir allir helstu mógúlar Framsóknarflokksins, allir blýgráir í framan af sorg, nema Sigmundur Davíð sem sat á knæpu útí Kaupmannahöfn og söng ,,Yfir kaldan eyðisand" með tilhlýðilegum rokum og falsettum og þögnum í lok hverrar ljóðlínu. Þarna voru, að sjálfsögðu, Kolbeinn Kolbeinsson framsóknarmaður, Brynjar Vondalykt, Jón Steinar ex dómari, Indriði Handreður, Máría Borgargagn og Óli Apaköttur, öll með tár á hvarmi og umbrot í görnunum. Að þessu sinni var látið nægja að spila Elton John með aðstoð glymskratta. En á góðærisöld kom Elto sjálfur, sem kunnugt er, og söng Gúddbæ jellóbrikkród í afmæli Ólafs stórbónda og skipakóngs.

Eftir fundinn lögðu frú Ingveldur, Borgargagnið og Kolbeinn leið sína á barinn á Hilton hóteli og drukku stíft. Skipti aungvum togum, þegar fleiri vóru sestir að drykkjunni, að úr varð veisla ekki ólík þeirri sem Egill Skallagrímsson og Ármóður kóngur slógu upp og fræg varð. Hæstum hæðum náði gleðskapurinn þegar Brynjar Vondalykt vék sér að erlendum ferðamanni á barnum, það var skeggjaður rauðvínssmjattari, og spjó framan í hann á sama hátt og þegar Egill, samkvæmt Egilssögu, gubbaði í andlit Ármóðs kóngs í virðingar- og þakkarskyni fyrir góðar veitingar. En mikið lifandis ósköp voru fundarmenn á Hilton hóteli hamingjusamir með fundinn og ekki síður með tilþrif Vondulyktarinna og voru sammála um að hvort tveggja stuðlaði að því að hinir dæmdu verði sýknaðir og frelsaðir fyrir páska.

Hafa verður í huga, að með ,,meðvirkninámskeiði" átti frú Ingveldur að sjálfsögðu við fræðslu eða námskeið í því hvernig fólk að verða almennilega meðvirkur.

Fóru yfir Al Thani-dóm með aðstandendum