Kjósa köttinn í sekknum

Það gengur víst mikið á í ormagryfju bófaflokkanna tveggja sem enn hafa stjórnarráðið á valdi sínu í mikilli óþökk þorra landsmanna. Nákvæmlega ekkert hefir gerst þótt einhverjum klámhundum hafi tekist að koma böndum á Sigmund litla Dávíð og dregið hann inní Framsóknarfjósið eins og hvurn annan stagkálf og undir sæng gömlu Maddömunnar sem ku ætla að geyma hann undir gumpi sínun þar til um hægist þrátt fyrir að hún sé svo dauðvona að ekkert blasir við henni annað en framsóknarleg hymmnaríkisvist í fjóshaugnum.

Hvort sem kosið verður fyrr eða síðar er hætt við að einhver óæskileg niðurstaða komi uppúr kjörkössunum. Ríkisstjórnarflokkunum er umhugað að vinna tíma til að laga stöðu sína með hefðbundnu lýðskrumi, sjálfshóli og yfirboðum að ógleymdum væntingum þessara aðila til gleymsku og gullfiskaminni kjósenda. Hinumegin borðsins eru fjórir vandræðaflokkar, jafn kapítalískrir í grunninn og bófaflokkarnir, sem berjast við að telja kjósendum trú um að þeir geti framkvæmt kapítalismann betur en kapítalistarnir sjálfir. Það er því ekki um auðugan garð að gresja ef aðeins er litið til flokksendemana sem eiga fulltrúa á Alþingi nú til dags. Að kasta atkvæði sínu á einhvern þessara er kjósa köttinn í sekknum, - kapítalíska sekknum.

Í mínum augum er aðeins einn stjórnmálaflokkur á Íslandi, þótt lítill sé og þingmannslaus, sem gerir sér grein fyrir að engar raunverulegar þjóðskipulagsbreytingar verða nema að kapítalisminn verði settur uppá hillu og geymdur þar eins og sögulegur gripur sem ekki verður notaður meir. Þessi flokkur er Alþýðufylkingin.   

Gengið til kosninga 8. október?

Athugasemdir

[Aztec, 6.4.2016 kl. 21:26]

Skv. þessari skoðanakönnun frá því í dag,

http://mmr.is/frettir/birtar-nieurstoeeur/531-framsoknarflokkurinn-med-naest-minnst-fylgi

mælist Alþýðufylkingin með 0,1%, nokkurn veginn það sama eða minna en hinir litlu flokkarnir utan þings. Svo að þig eigið á brattann að sækja. En það er ráð við því. Ef þið getið vélað þessi 4,9% sem upp á vantar frá Framsóknarflokknum og frá Bjartri framtíð (sem skv. þessari könnun fengju annars vegar 8,7% og hins vegar 5,8%) yfir til ykkar, þá munuð þið komast á þing og fyrrgreindir flokkar detta af þingi.

Hvernig þig gerið þetta er smáatriði. Aðalatriðið er að viljinn sé fyrir hendi.  

[Jóhannes Ragnarsson, 6.4.2016 kl. 21:28]

Nú ætli ég viti ekki að á brattann er að sækja.