Jóhannes Ragnarsson

4.6.2016 | 20:28

Það verður jafnað um ódæðismennina með heyhvíslum og grjótkasti

Bölvaðir ekkisens ódámar eru þetta hjá Reykjavík Medía, Kastljósi og Uppdrag Gránskníng að vilja ekki kannast við að hafa stett Wintrisfélagið á laggirnar til að koma dauðahöggi á a) Framsóknarflokkinn, b) Sigmund Dávíð, fjölskyldu hans og tengdafjölskyldu, c)Gömlu Framsóknarmaddömuna, Fjósið, Fjóshauginn, húskarla og griðkonur Maddömunnar. Það liggur svo í augum úti, að helvístis endemin léku sér að því að búa þetta andskotans Wintris til, til að veiða Sigmund í gildru, gera hann að athlægi og láta múginn ganga frá honum eins og einhverskonar galdranorn.

Það féllu mörg tár í Framsóknarfjósinu í dag á meðan á messugjörð hins fallna, smáða og úrbrædda Sigmundar Dávíðs stóð. Fólk lá höggdofa og í stórhysterísku grátkasti í flórnum meðan á ræðubrögðunum stóð og meira að segja gamla Maddaman skreiddist uppúr körinni til að heyra betur í ráðsmanni sínum. Að ræðu lokinni vóru allir Framsóknarmenn sannfærðir. Þeir höfðu heyrt meistarann tala og sögðu hverjir við aðra, að þennan dreng fengi lýðurinn ekki að krossfesta því hann væri líkast til Barabam endurborinn - þeir eru nefnilega svo vel að sér í Ritningunni Framsóknarmennirnir.

Eftir stendur nú, að Framsóknarmenn eru tilbúnir í kosningar, tilbúnir að veifa wintrisfánum, panamafánum og jómfrúareyjafánum. Og þeir sammæltust líka í dag um að veita andskotunum hjá Reykjavíkur Medíu og þeim öðrum sem staðið hafa að því að myrða mannorð Sigmundar Dávíðs, Kögunar og Wintris, þvílíka ofsaráðningu að þeir gleymi aldrei Reykjavíkur Medíunni sinni. það er að segja þeir sem kunna að lifa ráðninguna af, því það verður ekki farið neinum silkihönskum um kvikindin heldur gengið að þeim með heyhvíslum, sleggjum og grjótkasti.