Trekantur til forna í Dölum vestur

Þau ku hafa stundað trekant þau Guðrún, Bolli og Kjartan og skömmuðust víst ekkert fyrir það. Nútíma skaðmenntaðir ofurfræðingar í íslenskum fornsögum hafa komist að þessu hátterni þeirra þriggja eftir langar og strangar rannsóknir og yfirlegur og gríðarmiklar kannabisreykingar. Fræðingarnir okkar halda því blákalt fram, að piltarnir Bolli og Kjartan hafi verið á báðum áttum, beggja blands og framúrskarandi stútfullir af frygðarlosta. Guðrún hafi heldur ekki verið öll þar sem hún var séð, enda klámfengin í hugsun, svo sem títt er um kvendi af hennar tagi.

Nú hafa fyrrum ráðherrar og sendherrar Sjálfstæðisflokksins, þeir Einar Kr. og Swavar Sendiherra, tekið trekant Guðrúnar og strákanna upp á sinn eigin eyk, en með því vilja þeir auka veg og orðstýr trekantsins almennt meðfram því að halda á lofti hetjudáðum Bolla, Kjartans og Guðrúnar í lokrekkjum og fjósbásum, sem þau áttu aðgang að. Þá hafa fræðingar okkar komist að því, sem hefði auðvitað átt að liggja ljóst fyrir frá upphafi, að Guðrún hafi ekki verið Ósvífusdóttir, heldur hafi hún verið kölluð Guðrún ósvífna sökum blygðunarleysis í kallamálum, enda heitir aunginn maður ,,Ósvífur" eða ,,Ósvífinn."

Og fornfræðingarnir okkar hafa ekki gert það endasleppt í Laxdælumálum að þessu sinni. Til viðbótar öðrum fróðlegum uppgötvunum, hafa þeir í samvinnu við skörungana Einar Kr. og Sw. Sendiherra, fundið skýr ummerki eftir ástaratlot þeirra þriggja, Bolla, Gunnsu og Kjarra, í túninu í Hjarðarholti, akkúrat þar sem minnismerkið um trekantinn hefir verið sett upp. Reyndar minna umrædd verksummerki helst til jafn mikið á uppgróin hjólför frá síðari tímum og ummerki eftir ástarlíf þriggja ungmenna í fornöld, þó þau hafi verið mikið fólk og bæði hjól og spól.

Ástarþríhyrningur á fyrsta söguskiltinu