Byltingin vofir yfir; stríðandi aðila búa sig undir lokaorrustuna

Það er farið að hylla undir lok kjaradeilu Eflingar við Reykjavíkurborg og brátt verður Dagur borinn úr húsi, sem og Holuhjallurinn, einnegin Líf og Lóa og píratadaman með rauða varalitinn. Eyþór Árvakur og hans slekti, ásamt Vígdísi Hauks og Kolbrúnu þerri sem Flokkur fólsins fékk lánaða hjá Sjálfstæðisflokknum, verða og tekin með valdi og feykt út fyrir dyr ráðhússins og þess beðið að þau megi aldrei þrífast. Þá loks geta borgarbúar byrjað nýtt líf án spjátrunga og sperrileggja. Það verður mikill munur. Og loks fær allt starfsfólk borgarinnar laun sem hægt er að lifa af, praktuglega. Já og já.

Það verður gaman að sjá til hinna gagnslausu borgarfulltrúa rolast eins og gamalær heim til sín eftir að hafa verið kastað út úr ráðhúsinu. Satt að segja verður það sprenghlægilegt. Þetta verður nefnilega bylting og flokkunum, sem sköffuðu þá alónýtu borgarfulltrúa sem nú verða í brottu reknir, verður harðbannað að stíga fæti inn í ráðhúsið aftur. Já, piltar mínir, ráðhúsið í Reykjavík verður skohh aflúsað núna og öllum eftirlegukindum og dekureðlum Dags verður stuggað út fyrir dyr svo hægt sé að draga andann inni í ráðhúsinu atarna.

Frú Ingveldur er uggandi yfir byltingarástandinu sem er að skapast og vill freista þess að Degi og Eyþóri Árvakri verði bjargað áður en byltingin étur þá upp til agna. Nú í eftirmiðdaginn var Indriði Handreður sendur til að sálusorga Dag og stappa í hann stálinu, en í fyrramálið mun Handreðurinn gefa Eyþóri Árvakri væna innspýtingu til þess að hann standi í lappirnar en troðist ekki undir þegar lokaorrustan um ráðhúsið hefst, en það er náttúrlega afar stutt í það.  

Samninganefndir á aðskildum fundum