Hann vann fáheyrðasta afrek sem unnið verður innan íþróttahreyfingarinnar

Það hafa fleiri en Przemyslaw pólski sem hlaupið hafa langsum eftir Íslandi og það á mun styttri tíma en hann. Eitt sinn fór Jón Íþróttamaður í æfingabúðir vetur á Bjargtanga, en þar stóð til að láta olympíjufara víðavangshlaupi spretta úr spori á brúnum Látrabjargs. Annan morguninn í æfingabúðunum hvarf Jón Íþróttamaður eins og jörðin hefði gleypt hann. Var æfingin felld niður það sem eftir lifði dags og hafi leit að Jóni, sem engan árangur bar. Þá var kallað eftir aðstoð björgunarsveita og var sigið víðsvegar niður í Látrabjarg, því langlíklegast þókti að Jón Íþróttamaður hefði hlaupið fyrir björg. En því miður fannst hvorki ofan bjargs eða neðan svo mikið sem smá-vísbending um hvað orðið hefði af honum.

En fjórum og hálfum sólarhring eftir hvarf Jóns, barst víðavangsþjálfaranum, Frjálsíþróttasambandi Íslands og olypíjunefndinni skeyti þess efnis að Jón Íþróttamaður væri fundinn í Neskaupstað austur. Hafði hlaup hans verið stöðvað á aðalgötu bæjarins og hann spurður hvert hann væri að fara, en hann svarað því til að hann væri að leita vinum sínum í olympíjusveitinni í víðavangshlaupi. Er talið að þetta afrek Jóns Íþróttamanns sé með eindæmum og bæri hiklaust að veita honum að minnsta kosti tuttugu og fimm olypíjupénga gulls í verðlaunaskyni.

Þegar Jón Íþróttamaður kom til Reykjavíkur eftir að hafa unnið fáheyrðasta afrek sem unnið verður innan íþróttahreyfingarinnar, tóku dólgar frá Frjálsíþróttasambandinu á móti honum og fóru með hann í höfuðstöðvar sambandsins og börðu hann þar lamabarningi. Eftir það fór Jón Íþróttamaður að leggja stund á hnefaleika til að geta svarað í sömu mynt ef hann hitti dólgana aftur. Ekki er því að neita að heldur brátt varð um dólgana, sem voru fjórir; einn fannst dauður og nefbrotinn í húsasundi, annar var dreginn upp úr skurði með innyflin hvellsprungin í tætlur, þriðji hafi farið til dyra heima hjá sér eftir að drepið hafði verið á dyr en komið fljúgandi eins og geimskutla til baka og var tryggilega dauður, þá að var gáð, komið var að þeim fjórða önduðum fyrir utan hesthúsið hans og var engu líkara en eitthvert hrossið hefði gefið honum drag sem dugði með öðrum afturfætinum. Og lýkur hér að segja frá afreki Jóns Íþróttamanns í víðavangshlaupi og eftirmála þess.   

Hljóp þvert yfir Ísland á 17 dögum

Athugasemdir

[Sigurður I B Guðmundsson, 19.8.2021 kl. 09:21]

Ætli Jón þinn hafi verið skyldur Jóni Trölli eða Jónki Tröll sem Guðmundur Jónsson söng um hér um árið??

[Jóhannes Ragnarsson, 19.8.2021 kl. 11:55]

Ég held ég fari rétt með, að Jónki Tröll hans Guðmundar hafi verið afabróðir Jón Íþróttamanns. Og guðmundur Jónsson söngur var var náskyldur þeim báðum.

[Sigurður I B Guðmundsson, 19.8.2021 kl. 13:21]

Alveg datt mér það í hug!