Er Lily Allen haldin hryðjuverkaáráttu eða perrafýsn?

Hún er verulega kúnstug þessi frétt á mbl.is af kvenmanninum Lily Allen, sem svipt hefur verið starfsleyfi í Bandaríkjunum. Það kemur nefnilega ekkert fram í fréttinni hver ástæðan er fyrir leyfissviptingunni, svo ekki er hægt að álykta annað en hin breska Lily, sem sögð er vera söngkona, hafi eitthvað verulega óhreint í pokahorninu, eins og til dæmis hryðjuverkaáráttu eða ókristilega perrafýsn. Að vísu er minnst á í fréttinni, að Lily hafi fyrir skemmstu lent í fimm tíma yfirheyrslu í Bandaríkjun fyrir meinta líkamsárás í Englandi. En varla getur verið að einhver kráarslagsmál séu ástæðan fyrir starfsleyfissviptingunni. Hér er því bersýnilega eitthvað skuggalegt á ferðinni og miður þrifalegt, að minnsta kosti fæ ég það á tilfinninguna við lestur fréttarinnar.

Frestar tónleikaferð til Bandaríkjanna

Kaldastríðsórabelgir stukku hæð sína í loft upp.

Það er víst ekki laust við að íhaldsæskan og gamlir kaldastríðsórabelgir hafi stokkið hæð sína í loft upp af gleði þegar þeir fréttu af Pútím-flugvélunum í dag. Þetta aumkunarverða hugsjónafólk hefur nefnilega sárvantað hernaðarlegan óvin um hríð til að geta haldið uppi gamla hernaðarsníkjulífshugarfarinu sem grasséraði höfðum auðvaldslabbakúta af öllu tagi frá 1940 og þangað til í fyrra þegar Bush-herinn hypjaði sig af landi brott.

Rússneskar vélar í íslenskri lofthelgi

Leiftrandi kvæði um Sjálfstæðisflokkinn.

Okrarans höfuð, hrokkið og grátt,

hvimaði´um syllur og snaga.

Melrakka-augað var flóttaflátt,

flærðin rist í hvern andlitsdrátt

og glottið ein glæpasaga. -

Hann hafði ævinnar löngu leið

leikið sér frjáls að tárum og neyð

og óheftur ginið við gróðans veið,

geymdur helvítis aga.

(Einar Benediktsson)

Betur verður Sjálfstæðisflokknum, og því sem hann stendur fyrir, ekki lýst í stuttu erindi. 

Sjálfstæðismaðurinn Dónóvan og leigumorðingjarnir.

Það má til sanns vegar færa, að Sjálfstæðisflokksmaðurinn og auðvaldskurfurinn Jón J. Dónóvan sé sannkallaður snillingur, enda ekki á færi annarra en afburðamanna, að skálda upp á syni sína að þeir sendi á vettvang leigumorðingja til að vinna á feðrum sínum. En Jón J. Dónóvan er kræfur karl og hraustur og ekki flokksbræðum sínum til skammar, nema síður sé. Og þar sem þessi sanni sjálfstæðismaður, Dónóvan frá Cambridge, er mjög eftirsóttur fyrirlesari væri tilvalið fyrir hina ungu stuttbuxnasperrileggi Sjálfstæðisflokksins, sem ætla að hrella Seyðfirðinga um miðjan september næstkomandi, fá þetta roskna fórnarlamb leigumorðingja til að lesa þeim fyrir hugvekju og bæn í nafni Mammons, drottins þeirra allra.

Milljarðamæringur laug til um skotárás

Faraldur og plága yfirvofandi á Seyðisfirði.

Hvað ætli Seyðfirðingar hafi svo slæmt til sakar unnið, að þeir verðskuldi að fá yfir sig 500 heilaþvegna, stuttbuxnaða smádrengi úr Sjálfstæðisflokknum dagana 14. - 16. september næstkomandi? Svona heimsókn má hiklaust líkja við faraldur eða plágu og er engu byggðarlagi bjóðandi. Og að Borgar Þór hafi ákveðið að gefa ekki kost á sér til endurkjörs er í besta falli kátbroslegt, ef ekki hlægilegt. En aumingja Seyðfirðingarnir að eiga þennan andskota yfir höfði sér dagana 14. - 16. sept. er hræðilegra en tárum taki.  

Gefur ekki kost á sér til endurkjörs sem formaður SUS

Vaknaði við ókunna hönd ofan í nærbuxum sínum.

Fyrir aldarfjórðungi var Aribjörn karlhólkurinn, sem þá var á lang-besta aldri, handtekinn og færður í gæsluvarðhald, ásakaður fyrir ekki minni glæp en að hafa brotist að næturlagi inn á heimili frú Ingveldar og Kolbeins þegar þau voru í fastasvefni. Sagan segir, að Kolbeinn hafi þessa nótt vaknað, þar sem hann lá undir sæng í rúmi þeirra hjóna, við ókunna hönd ofan í nærbuxum sínum. Kolbeinn ákvað á láta kyrrt liggja um stund og sjá hverju fram færi. Hann þurfti þó ekki bíða lengi, því eftir nokkrar þreifingar og þukl ofan í nærbuxunum var hinni ókunnu hönd kippt snögglega í burt og Kolbeinn heyrði að einhver tautaði við sjálfann sig í myrkrinu: Puufffs ... andskotinn ... þetta er ekki hún ! Þá var Kolbeini nóg boðið og hann kveikti ljósið á náttborðslampanum og hringdi síðan í Hálfdán lögregluvarðstjóra, sem kom að vörmu spori ...

Pínulitlar framsóknarmaddömur ganga aftur.

Ja hvur bröndóttur, eru ekki nema framsóknarkvinnur komnar á stúfana - og í þetta sinn eins og draugar úr Þjóðsögum Jóns Árnasonar. Og auðvitað eru þetta ekkert nema reimleikar því Framsóknarflokkurinn sem slíkur steindó í vor; það voru einhver hjartahlý góðmenni sem gengu fram á hræið af andaðri Framsóknarmaddömunni á flötinni fyrir framan Stjórnarráðið í vor og báru það til moldar í kyrrþey.

En nú hafa semsagt borist af því fregnir, að fáeinar pínulitlar framsóknarmaddömur séu gengnar aftur og hafi hug á að halda landsþing þann 18. ágúst. Það verður eflaust hinn snotrasti andafundur og trúlega fróðlegt fyrir skyggna íslendinga að líta þar við á ráfi sínu á Menningarnótt Reykjavíkur, sem einmitt verður haldin sama dag og pínulitlu framsóknarmaddömurnar fara á stjá.

Býður sig fram til formennsku í Landssambandi framsóknarkvenna

Ætli Mette-Marit fái reykingakrabba.

Skohh ... ef allt væri með feldu, væri búið að draga þessa andstyggðar krónuprinsessu út á götu og rass-skella hana þar opinberlega. Ég hygg að það myndi duga til að reka úr henni tóbaksdjöfulinn fyrir fullt og allt. Það hlýtur að vera ægilegt að hafa á samviskunni, að hleypa heilu krabbameinsfélagi í uppnám með ófyrirgefanlegum dáraskap í brúðkaupsveislu.

En hvað um það. Leiðir tóbaksreyksins eru í mörgu órannsakanlegar,ekki síður en guðdómsins, því ítrekað hefur það gerst að reykingafólk hefur lokið ævi sinni án þess svo mikið sem fá vott af krabbameini. Einnig hefur það þráfaldlega komið upp á, að manneskjur, sem aldrei hafa reykt hafa fárveikst af krabba og jafnvel dáið. Enn fremur má geta þess, að til hefur verið fólk sem hefur dáið drottni sínum án þess að hafa reykt eða fengið krabbamein.

Mette-Marit krónprinsessa átalin fyrir reykingar

Öndvegisrit um glæpi gegn mannkyni.

Það er vel til fundið hjá Tony Blair, að gefa minningar sínar út á bók. Ég geri ráð fyrir, að í því höfuðriti tíundi Tony vel og vandlega glæpina sem hann og Georg Bush félagi hans hafa í unnið í sameiningu gegn gjövöllu mannkyni. Ég býst fastlega við, að öndvegisrit þetta verði mikið lesið og stúderað af aðdáendum Tonys í framvarðarsveit Samfylkingarinnar. 

Blair felur lögmanni að semja um útgáfurétt á endurminningum sínum

Annálaður ritsnillingur og andans jöfur.

Það er ekki á hverjum degi, sem maður fær fréttir af því, að óumdeilt bókmenntastórvirki sé í vændum. Þetta er álíka upplifun fyrir unnendur fagurbókmennta og hjá trúarhópi nokkrum sem fagnar fæðingu frelsara síns eftir aldalanga bið. Ég mun t.d. ekki láta nokkurs ófreistað, jafnvel leggja mig í bráðann lífsháska, til að ná sem fyrst í þessa miklu Bók þegar hún kemur út.

Því hafði aunginn spáð fyrir fám vikum síðan, að Viktóría Beckhám, yrði á haustdögum orðin annálaður ritsnillingur og andans jöfur.

En skjótt skipast veður í lofti ...

Viktoría fær 350 milljóna króna úttektarheimild