Skítadreifarar og haugsugur brátt á vettvang.

Nújá, er ráðherrastóðið og lögreglan farin að hlaupa út og og suður eftir orðrómi, kjaftasögum? Það er augljóst að vörubílakallarnir eru langt komnir með að taka yfirvöldin á taugum, gera þau móðursjúk, koma þeim í óþolandi hlandspreng.

Það hefur líka heyrst orðrómur um að valinkunnir menn séu búnir að útvega sér fáeinar haugsugur og skítadreifara, sem þeir ætli að nota til að gleðja þá sem leið eiga um miðborg Reykjavíkur. Svo það er full ástæða fyrir þá sem völdin hafa og eiga, að hafa uppá umræddum landbúnaðartækjum í tæka tíð. 

Meðfylgjandi mynd er af einum þeirra sem ætlar leggja til hráefni í haugsugurnar og dreifarana. 

Orðrómur um aðgerðir

Íslenskur Aðall af Þotustandi

Ljótt er, ef rét reynist, að Gjeir Haaardi og forstýra sosialdemokratiska frjálshyggjuflokksins hafi horfið úr landi í morgun í einkaþotu og ekki staðnæmst fyrr en í höllu Sjáseskús heitins í Rúmeníu. Þó er þetta einkaþotuferðalag þeirra skötuhjúana eitthvað svo rökrétt og eðlilegt af þeirra hálfu; þau eru nú einusinni Íslenskur Aðall af Elítustandi.    

Þá var ekki síður ljótur öfundsýkistónninn í flokkseigandanum Álfheið Ingadóttur útí Rúmeníufarana á einkaþotunni. Ég efast ekki eitt andartak um, að hin fyrrverandi fiskeldisdrottning hefði þegið far með Gjeir og Ingibjörgu, hefði henni staðið það til boða. En henni stóð það því miður ekki til boða.

Og þar sem frakkar eru í þann veginn að senda heila herdeild til að stríða í Afganistan, þá vona ég að foringjar íhaldskratísku frjálshyggjuflokkana sjái sóma sinn í að gerast sjálboðaliðar við þá herdeild og auðnist að fella sem flesta talíbana á blóðvöllunum þar austurfrá.  

Ferðamáti gagnrýndur

Glaðbeittur félagsskapur

Mikið er nú Gjeir okkar mest myndalegastur allra á þessari glaðlegu mynd. Jafnvel Hopparinn hollenski er eins og bliknað sinustrá við hlið hans, að maður tali nú ekki um þennan hrörlega rúmeníuskarf.

Evrópu ekki skipt

Ósigur ítalska loftflotans í Reykjavík 1933

Fréttin af væntanlegri komu 100 manna franskrar flugsveitar í hernaðartilgangi, minnir mig á heimsókn ítalska lofthersins til Reykjavíkur árið 1933, undir stjórn Pittigrilla herforingja og eyðimerkurhetju. En eins og flestir vita, beið þessi glæsilegi loftfloti hræðilegan ósigur á stéttinni fyrir framan Hótel Borg og flúði í ofboði heim til sín morguninn eftir. (Ósigur ítalska loftflotans í Reykjavík 1933 eftir Halldór Laxness)

Þegar frönsku flugsveitargammarnir verða búnar að bíða sinn ósigur á Íslandi, væri tilvalið fyrir þá að fyrir þá að taka Natóforkólfana Gjeir Haaarde og Ingibjörgu Sólrúnu með sér heim til Frakklands og kenna þeim alminnilegar mannvígakúnstir að hætti vestrænna kapítalista.   

100 manna frönsk flugsveit á leið til landsins

Stígvélabrokkur og nautshali

Þess má geta, í framhaldi af neðangreindri frétt, að hinn mikilhæfi sóknarprestur og prófastur, síra Baldvin, messaði í morgun til minningar um þann burtsofnaða páfa, Jóhannes Pál II.

Mæltist síra Baldvini einstaklega vel, að vanda, því hann kallaði páfann sálaða, sérdeilis stígvélabrokk og nautshala. Kvaðst síra Baldvin heldur vilja hundur heita o.s.frv., en segja eitt einasta fallegt orð um páfa þenna eður aðra stallbræður hans sem vermt hafa páfastól með sínum kaþólska rassi. ,,Kaþjólskan er," sagði síra Baldvin, ,,ekki njéma einn andskotans afleggjari af múhámeðsku og annrri villutrú." Og lauk svo síra Baldvin messu sinni með því að bannfæra gjörvalla kaþólskuna, og enn fremur, að aldrei kæmi til greina, að grafa jarðneskar leyfar kaþólska villumanna í helgum legstöðum í hans sóknum.    

Þrjú ár liðin frá láti Jóhannesar Páls II páfa

Kauphallarhéðnar að sumbli

Ja, nú hafa kauphallarhéðnarnir aldeilis fengið sér ærlega neðaníðí áður en þeir fóru að gambla með bréfin sín í morgun.

Það er auðvitað ekki nema gott eitt að segja um, að umræddir héðnar hafi drukkið sig svo blindfulla í rauðabítið í morgun, að úrvalsvísitalan er þotin uppí hæstu hæðir. Það verður bara að passa að það renni ekki af köppunum svo þeir fái ekki timburmenn og úrvalsvísitalan hlunkist niður aftur. Það er altso ekkert gamanmál fyrir rottimbraðan kauphallarhéðinn, að fá illvíga úrvalsvísitölu beint ofaní skallann þegar neyðin er stærst - það gæti hreinlega steindrepið hann. 

Mikil hækkun í kauphöllinni

Það þarf víðtækari uppreisn

Ágúst Fylkisson, einn af talsmönnum bílstjóra, segist vera hissa á því að ekkert hafi heyrst í þingmönnum stjórnarandstöðunnar. „Við erum mjög hissa á því að stjórnarandstaðan skuli ekki koma fram og standa með okkur."

Ágúst þarf svo sem ekkert að vera hissa á að samtryggingarvæddir stjónmálamenn eigi í erfiðleikum með að veita aðgerðum atvinnubílstjóra lið með stuðningi sínum. Þó verð ég að segja eins og er, að mér finnst dálítið undarlegt að VG blandi sér ekki í leikinn og hvetji almenning til víðtækrar uppreisnar gegn okur- og misréttistilburðum hinnar gráðugu borgarastéttar. Af nógu er að taka. Eða á maður að trúa því, að VG ætli haga sér eins og værukær geltur fressköttur þegar þjóðfélagið nötrar af uppsafnaðri reiði? Nú er kjörið tækifæri fyrir forustusveit VG að sýna úr hverju hún er gerð. Eða er hún bara samansafn af geltum fressköttum, sem láta sér vel líka að liggja malandi á stofusófum auðvaldsins? 

Mestu tafir hingað til

Þegar 2+2 verða 5 eða 3

Mikill snillingur og veraldarséní er Hanez Holmstone. Það vefst ekki fyrir blessuðum unganum að fá 2+2 til að verða 5 eða 3, svona eftir atvikum.

Auðvitað vill hinn ríkisrekni frjálshyggjumaður, sem harðneitar að láta einkavæða sig, ekki vera minni maður en landsfeðurnir Gjeir og Ingibjörg Sólrún, og leggja sitt að mörkum til að fegra bágt efnahagsástand á Íslandi í augum alheimsins. Í því skyni trúir hann lesendum Wall Street Journal-vefsins fyrir því, að allt sé í sómanum á Íslandi, svo sé kvótakerfi í fiskveiðum og glerfínni einkavæðingu fyrir að þakka. Hinsvegar virðist prófessornum við Háskóla Íslands algjörlega sjást yfir að útskýra fyrir fróðleiksfúsum lesendum Wall Street-vefsins hve græðgisvæðingin getur verið fallvölt, kvótakerfið rotið og skaðlegt sem og einkavæðingin stórbrotna. En það eru nú ef til vill bara smámunir í augum hins góða ríkisrekna prófessors.

Segir Ísland ekki vera að bráðna

Páfagaukasöngurinn um Evru og ESB

Það hefur áreiðanlega ekki verið töluð vitleysan á fundi litla ESB-viðskiptaráðherrans og hinna ESB-sjúklinganna frá ASÍ og Neytendasamtökunum.

Það er alkunna, að þetta skringilið trúir því statt og stöðugt, að allt milli himins og jarðar á Íslandi megi lækna með Evru og ESB. Og sé það spurt að einhverju, t.d. hvort það sé kalt úti eða hvort bátarnir hafi verið að fiska upp á síðkastið, svarar þetta fólk, vélrænt og áreynslulaust eins og páfagaukar: Tökum upp Evru - Göngum í ESB. 

ASÍ og neytendur á fundi í viðskiptaráðuneytinu

Góð skemmtun í vændum

Það verður gaman að sjá hvort vörubílstjórar gera alvöru úr gamni og standi við hótun sína að sturta fáeinum bílförmum af möl fyrir framan Alþingishúsið. Ef svo skemmtilega tekst til að vegarbætur bílstjóranna verða að veruleika verður alþingismönnum ekkert að vanbúnaði að fara í alvöru sandkassaleik og geta þá ausið hverja aðra möl í staðinn fyrir þessara venjubundnu svívirðinga og hortugheita í bland við hroka og lygar.

Sturta möl fyrir framan Alþingi