Frú Víðis lætur vaða á súðum

Djöfull held ég frú Sigríður Víðis láti vaða á súðum í greininni um hamingju og snilld Íslendinga í greininni sem nú er búið að snúa á ítölsku og birta í hinu virta vikublaði L´Espesso. Ekki er t.d. um of að ætla, að frú Víðis tíundi efnahags- og fjármálasnilld Íslendinga, drykkjuskap þeirra og einkavinavæðingu í ritverki sínu. Trúlega drepur frú Víðis líka á hvernig örfáir heiðursmenn sölsuðu undir sig fiskveiðiauðlindina, þrátt fyrir að hún sé sameign fólksins í landinu, og hvað Ítalska mafían gæti lært af þeim snilldarvinnubrögðum. Þá vona ég að frúin hafi ekki látið undir höfuð leggjast, að gera Baugsmálum og REI rækileg skil, sem og örlögum dansherrana Davíoddssonar og H. Ásgrímssonar og timburmannana sem þjóðin er að taka út þessa dagana eftir buslugang þeirra og ólæti þegar allt lék í lyndi í ríkisstjórn þeirra félaga.

Viðurkennum ekki annað en hamingju

Gamall forhleramaður forframast

Nú hefur sýslumaðurinn í Belgrad heldur betur stungið fingri í rangan þumal. Karluglan sem handtekinn var í gær er ekki Radovan Karadzic fremur en Britney Spears heldur gamall göturóni af íslensku bergi brotinn. Ég held ég muni nú eftir honum Kidda kölska, var með honum á síðutogara í gamla daga; hann var álitinn besti forhleramaður flotans þegar hann var uppá sitt besta. En þegar skuttogararnir komu til sögunnar var Kidda kölska nóg boðið og hann gekk götunni á vald; fíngert sálarlíf hans þoldi nefnilega ekki skuttogaravæðinguna. Þegar framúrskarandi íslendingar stukku hver sem betur gat í útrás, tók Kiddi kölski sig upp líka, kvaddi Hlemm og Kaffi Skít, og hélt út í hinn stóra heim til að græða pééénínga. Og auðvitað bar útrásaraðilinn Kiddi kölski niður í Austur Evrópu því þar var gróðavonin mest. Hann ætlaði semsé að gera það gott í Serbíu og nota gróðann til að koma upp brennivínsbanka á Íslandi. En það verður víst lítið úr frómum fyrirætlunum Kidda kölska, fyrrverandi forhleramans, fyrst hann er á leið fyrir stríðsglæpadómstólinn í Haag. Með þessari óvæntu uppákomu má segja að nokkuð hafi ræst betur úr Kidda kölska en nokkurn óraði fyrir.  

Karadžic skrifaði um heilsu

Útskitin stássstofa auðvalds- og arðránselítunnar

Það er óneitanlega broslegt, ef ekki beinlínis hlægilegt, að horfa uppá hina vísu fjármálasnillinga gærdagsins laumast þessa dagana með veggjum eins og illa tilhafðir fresskettir sem núbúnir eru að skíta á fínustu mublurnar í stássstofu hinna guðumlíku íslensku auðvalds- og arðránselítu. Þegar staðan er orðin eins skuggaleg og hún er, þá er fátt skynsamlegra í stöðunni en að ríkið leysi bankana til sín þegar í stað, áður en gáfuðu fjármálaspesíalistarnir í jakkafötunum gera meira af sér.

Allt að 200 missa vinnu við samruna SPRON og Kaupþings

Bush, Karadzic og Drottinn fyrir dómstól alþýðunnar

Bölvaður leppalúði og fjörulalli er þessi Karadzic að láta góma sig eins og kettling; ég hélt það væri meira spunnið í þann mann. En fyrst svona er komið verður víst að rétta yfir karlsvíninu í nafni Drottins og Georgs Bush. En fyrst og fremst er þó þörf á draga Bush fyrir dómstól alþýðunnar ásamt þessum Drottni hans, sem mun vera Drottinn þeirra beggja, Bush og Karadzic, stytta þeirra og stoð og sérlegur ráðunautur í myrkraverkum. Alþýða heimsins er nefnilega löngu búin að fá yfir sig nóg af morðsjúkum ráðamönnum og þeirra drullusokkahyski og tíkarsonum, þessa heims og annars. 

Karadzic handtekinn í Serbíu

Endurreisn heilbrigðrar samfélagsvæðingar

Það var nú meira déskotans asnasparkið þegar Davíoddsson myrti Þjóðhagsstofnum með fulltingi skutulsbróður síns ólánlegum, Halldóri Ásgrímssyni. Og þetta var ekki eina asnasparkið þeirra félaga. Einkavæðing bankanna og símans eru afglöp af því tagi sem líkleg eru til að halda nafni þeirra á lofti meðan land byggist.

En það þarf ekki einungis að endurreisa Þjóðhagsstofnun. Það ber skilyriðislaust að samfélagsvæða bankakerfið, símann, eldsneytisdreifinguna, tryggingakerfið og flutningakerfið innanlands, að ekki sé minnst á auðlindir lands og sjávar, og þannig koll af kolli.

Það ætti hverjum manni að vera ljóst, að tími einkavæðingarglæpanna er, sem betur fer, að líða undir lok og því tímabært að stjórnmálamenn víki af villu síns vega hefji þegar í stað undibúning að endurreisn heilbrigðrar samfélagsþróunnar.  

Þingmenn vilja Þjóðhagsstofnun

Þegar býður þjóðarsómi

Mikið vildi ég að þjóðin sæi sóma sinn einu sinni og veitti félaginu Saving Iceland lið í baráttu þess gegn samviskulausum glæframönnum og eiturspúandi óþverrafabrikkum. Í stað þess að hugsandi fólk þurfi að hlekkja sig við tæki og tól ódámanna ætti Íslenska þjóðin að leggja alla álogvirkunarsjúklinga, sem í kann að nást, í hlekki. Þessvegna krefst ég þess af þjóð minni, að hún sýni á afgerandi hátt hvað í henni býr, og stormi öll uppá Grundartanga og jafni ærlega um þá örmu misyndismenn að súrálsglæpum og annarri náttúruskemmandi viðurstyggð.

„Allt fer friðsamlega fram"

Berjumst gegn Björk, Sigur Rósu og rjúpunni

Fjárans ástand er á fólki, að vera að rembast við að hnubbast unaní Bubb Moreteins þjóðskáld til orðs og tóna. Svona skítaháttalag er náttúrlega forkastanlegt og öllum sem að koma til háborinnar skammar. Við vitum öll, að Bubbur er mestur vinur bláfátæka verkamannsins sem landið hefir alið; hann er aukinheldur meiri vinur friðar en aðrir menn; ennfremur slíkur vinur boxara, sem hafa að markmiði að dauðrota alla andskota sína, að annan eins vin í véum hefir aunginn átt. Þá er ótalin staðfesta Bubbs í stjórnmálum og fölskvalaus vinátta hans við stórar jeppabifreiðar og hlutabréf og baráttu hans við grimmar rjúpur, sem hann deyðir af harðfylgi á jólaföstunni.

Að þessu sinni vil ég ráða ykkur heilt: Látið Bubb Moreteins í friði andskotarnir ykkar og skammist ykkar. Sá yðar sem syndlaus er kasti fyrsta steininum. Berjumst bræður, berjumst! Berjumst fyrir jeppafrelsi og hlutabréfafrelsi! Berjumst! Útaf með síðhippana í Sigur Rósu og dóttir Guðmundar í Rafiðnaðarsambandinu.

Bubbi liggur undir ámælum

Þegar Ármann ætlaði heim en hafnaði á Grænlandi

Þau hafa ekki haft nema gott af því hjónin Johannessen, að fara til Rieka í Króatíu í stað Reykjavíkur. Það leynir sér nefninlega ekki hverskonar höfuðsóttargemlingar Áki þessi og frú hans eru að fara slíkar villur vega. Að minnsta kosti hefi ég aungvan áhuga á að fá svona ultravankað fólk hingað til lands.

Annars kom það fyrir Ármann kunningja minn Kolbeinsson að lenda í svona hafvillu. Hann kom á sínum tíma í höfn á togara, eftir þriggja mánaða saltfiskirí við Grænland. Því miður vildi svo illa til, að í stað þess að fara beina leið heim í faðm eiginkonu og barna, steðjaði Ármann yfir þvera bryggjuna og um borð í botvörpunginn Gretti Ásmundsson, sem beið þess albúinn að sigla til Grænlands og fiska þar í salt í þrjá mánuði. Um borð í Gretti settist Ármann að dykkju með vinum sínum og drakk svo fast og óaðfinnanlega að hann rankaði ekki við sér fyrr en Grettir Ásmundsson hafði lagt að baki sólarhrings siglingu frá Reykjavík. Þessi ferðatilhögun Ármanns varð til þess að hann sá hvorki tangur né tetur af fjölskyldu sinni í liðlega hálft ár. Svo vel vildi þó til, að Ármann tók örlögum sínum af aðdáunarverðu æðruleysi og fjölskyldan saknaði hans ekki nema í meðallagi, ef hún saknaði hans þá nokkuð. 

Ætluðu til Reykjavíkur - lentu í Rijeka

Hver er frægasti glæpamaður Íslands?

Það má vel vera að þessi Clark Olofsson sé frægasti glæpamaður sem Svíar geta státað af. Hinsvegar leikur mér meiri hugur á að vita hver sé frægasti glæpamaður okkar Íslendinga. Mér detta í fljótu bragði þó nokkrir valinkunnir herramenn í hug, en ég get þó ekki gert mér alminnilega grein fyrir hver sé þeirra fremstur og frægastur. Máske geta lesendur hjálpað uppá með að finna út þann frægasta og þann mesta því ekki er sjálfgefið að þar sé um sama manninn að ræða. Sömuleiðis væri vel þegið að fá ábendingar um hver sé nafntogaðasta glæpakona Íslands.

Nú er bara að bíða og vona að lesendur taki vel við sér og leiði mig og fleiri í allan sannleikann um hver sé frægasti glæpamaður okkar Íslendinga og hver sé mesta glæpakonan.

Frægasti glæpamaður Svía enn í klandri

Gönguhópur étinn upp til agna

Nú síðast fann horngöngugarpur heilmikinn ísbjarnarskít í Remmuvík á Horni og bendir allt til þess að björninn sem þar var á ferð hafi fengið nýverið fengið ætan bita í maga svo um hefur munað. Það leiðir svo aftur hugann að gönguhópnum sem ekki hefur skilað sér og ekki hefur náðst sambandi við. Nú verðurm við að bíða og vona og biðja til Guðs, að hinn djöfullegi ísbjörn hafi ekki étið hinn týnda gönguhóp upp til agna. Annað eins hefur víst gerst. Fyrir 200 árum át hvítabjörn heila fjölskyldu á Melrakkasléttu, en það uppgötvaðist því miður ekki fyrr enn 25 árum síðar, svo engin tök voru á að bjarga fólkinu, hafi staðið til þess einhver vilji af hálfu heimamanna.

Ísbirnir á Hornströndum?