Undirliggjandi tónn stéttasamvinnu og ríkisstjórnarsóttar

Það sem vekur helst athygli við ræðu Steingríms J. á Reykholtsfundi VG eru beilínis þau orð sem þar eru sögð, heldur hinn undirliggjandi tónn borgaralegrar stéttasamvinnu og þráhyggjulegri löngun Steingríms J. að komast í ríkisstjórn með hverjum sem er, ríkisstjórnarþátttökunnar vegna. Þessi veiklun heitir á máli flokkseigendafélags VG og þúfutittlinghópnum sem henni fylgir: ,, að komast í ríkisstjórn til að hafa áhrif" og er einhver sá heimskulegasti páfagaukalærdómur sem á pólitískar fjörur hefur rekið á síðustu árum. Sérstaklega hefur verið spaugilegt að heyra ungviðið kringum Steingrím japla þennann frasa upp hugsunar- og tilfinningalaust. Þessi undirliggjandi skrjóðsháttur VG bendir til þess að best færi á flokkurinn gengi hreint til verks og gerðist undir- eða hliðardeild í einhverjum öðrum stjórnmálaflokki, til dæmis Samfylkingunni eða Framsóknarflokknum. Við það myndi sjálfkrafa opnast eðlilegt og heilbrigt svigrúm fyrir heiðarlegan vinstriflokk sem byggði tilveru sína á sósíalisma og stéttarbaráttu. 

„Menn komi sér að verki“

Ég held maður þekki nú Söru Palín

Ójá, piltar mínir, maður kannast nú við Söru Palín, kerlingarræxnið svorna. Við sem vorum samtíða henni á vetrarvertíð vestur á fjörðum munum seint gleyma þessum ágenga kvenpeningi. Þegar við strákarnir komum af sjónum beið hún á bryggjunni í allri sinni reisn og bauð uppí brattan dans hverjum sem verða vildi. Og vinsæl var hún, það verður ekki af henni skafið og þókti gott að dreypa á óblönduðum vodka, og smellpassar því eflaust í framboð fyrir Repúblíkanaflokkinn í Amríku. Þó var hún almennt ekki vel þokkuð í hópi giftra kvenna og ekki að ástæðulausu, það get ég svarið. Þegar hún mátti vera að því að mæta í vinnu í frystihúsinu snyrti hún og pakkaði eins og ólm tröllskessa með hrossavírus þangað til allur fiskur var upp urinn. Svo einn góðan veðurdag var þessi heillandi valkyrja á bak og burt og í hönd fóru daprir dagar í verstöðinni og okkur strákunum hætti að hlakka til að koma í land.

Hver er Sarah Palin?

Síríus, Þór, Útigangsmenn, Velferðarspjátrungar

Hvern fjárann sjálfan var gamla stríðsskipið Þór að gera mannlaust við akkeri úti á Hvalfirði? Það er helst til óskemmtilegt, að ég ekki segi niðurlægjandi og háðulegt, fyrir aldrað frægðarfley að vera skilið eftir eins og ósjálfbjarga niðursetningur útí horni. Og ekki vantar að fyrrum varðskipið Þór gæti þjónað miklu hlutverki ef allt væri með felldu. Fyrir mörgum árum var stafræktur í Reykjavíkurhöfn togarinn Síríus og hans hlutverk var mikið þá hann var og hét. Þar um borð bjuggu allir helstu gleðimenn Reykjavíkurborgar, áttu þar athvarf og stunduðu kogaraþamb og kökudropanautn af þeirri alúð sem slíkri iðju ber. Því er minningin um Síríus rifjuð upp hér, að fyrir fáum dögum kom upp um fáheyrðan slóðaskap Velferðarsviðs Reykjavíkur í málefnum útigangsmanna. Það kom sem sé á daginn að húsnæði, sem ætlað var þeirri stétt manna sem smáborgaraháttur tíðarandans kallar útigangsmenn, væri gjörsamlega úr sögunni, í bil að minnsta kosti. Það má undrum sæta, að velferðarsérfræðingar borgarstjórnar hafi ekki gripið til þess ráð, að láta sigla varðskipinu Þór til hafnar í Reykjavík og munstra alla ,,útigangsmennina" á dallinn í snarhasti. Þetta vítaverða sleifarlag sannar, svo ekki verður um villst, að velferðarspjátrungarnir undir forsæti Jórunnar Frímannsdóttur eru ekki stafi sínu vaxnir þegar skjótra aðgerða er þörf. 

Líkur á að Þór strandi

Flokksskírteini, undirgefni, niðurrifsöfl - er nokkuð fegurra?

Ó, hvað það er yndislegt að Guðlaugur Þór ,,heilbrigðisráðherra" skuli vera búinn að ráða forstjóra að Landspítalanum. Ég geri ráð fyrir flokksskírteini hins nýja forstjóra standist þær kröfur sem gerðar eru og tryggt sé að forstjóri þessi kunni að akta á réttan hátt gagnvart sínum yfirboðurum; flækist að minnsta kosti ekki fyrir niðurrifsöflum einkavæðingar og frjálshyggju í heilbrigðiskerfinu.

Hulda forstjóri Landspítala

Ekki eins guðlegs eðlis og óskeikull og áður var talið

Það er dálítið annarlegt að lesa önnur eins býsn og mbl.is hefur eftir Hönnu Birnu íhaldborgarstjóra þess efnis að hún og hennar Flokkur ,,þurfi að gera betur." Ég hef hingað til staðið í þeirri trúarvissu, að Sjálfstæðismennirnir væru fullkomlega þeirrar skoðunar, að allt sem þeir bjástra við, hverju nafni sem það nefnist, sé alls ekki hægt að gera betur. En nú hefur semsé goppast uppúr Hönnu Birnu, að Flokkurinn hennar sé undir þá sök seldur að stunda handabakavinnubrögð og þar með ekki eins guðlegs eðlis og óskeikull eins og haldið hefur verið fram, einkum af Flokksmönnum sjálfum, þar á meðal af fyrrnefndri Hönnu Birnu. Þessi ummæli nýkrýnds borgarstjóra hljóta að vera mikið reiðarslag fyrir þá sem stundað hafa Flokkinn eins og trúarbrögð og benda auk þess til að upplausnarástand kraumi undirniðri á Höfuðbólinu.

„Þurfum að gera betur“

Silfurverðlaunin orðin að vandamáli

Þær eru svo sem fallegar og hugnæmar blessaðar myndirnar af fagnaðarstemmningunni miklu í gær, sem prýða meðfylgjandi frétt. Þó vantar sárlega góðar myndir af brottför og heimkomu menntamálaráðherra frá ferð hennar á ólympísku leikana í Kína, en þar á ég auðvitað við ferð númer 2. sem kostaði 2 stífar milljónir króna. En það var áreiðanlega margt athyglisvert og guðsþakkarvert við þá ferð; meðal annars hjó ég eftir að sá vammlausi þingflokksformaður Sjálfstæðisflokksins, frú Arnbjörg að austan, fullyrti í Kastljósþætti áðan, að silfurdrengirnir frá Peking hefðu sagt að seinni koma Þorgerðar Katrínar á leikana hefði styrkt baráttuanda þeirra til mikilla muna. Þegar Arnbjörg að austan var spurð hvort hún hefð sjálf heyrt þá segja eitthvað þessu líkt, fór hún undan í flæmingi og fór að tauta um að einhver hefði sagt að strákarnir hefðu sagt þetta ... 

Ég er eiginlega komin á þá skoðun, að handboltalandsliðið og silfurverðlaunin séu orðin að hálfgerðu eða hábölvuðu vandræðamáli innan Flokksins góða, Sjálfstæðisflokksins; og ekki bætir herra Ólafur Ragnar Grímsson geð guma á Höfuðbólinu þessa dagana, nema síður sé.  

Landsliðið kemur heim - myndir

Djöfullegur ásetningur

Það má hreint vera djöfullegur ásetningur ,ef rétt reynist hjá Pútín, að Bandaríkjamenn hafi framleitt ólguna í Georgíu sem leiddi til þess að Rússar neyddust til að taka í lurginn á óeirðaseggjunum í þar um slóðir. Og Pútin veit nokk hvað hann syngur. Og glæpaillgresinu í stjórnkerfi Bandaríkjanna er að sama skapi til alls trúandi þegar heimyfirráðahyggjan er annars vegar. Í ljósi margítrekaðra glæpa kapítalismans, með ránfuglana í Wasington í broddi fylkingar, er vægast sagt dapurlegt og andstyggilegt, að Ísland skuli enn í dag tilheyra sóðafélagsskapnum NATÓ. Það væri við hæfi að baráttan gegn aðild Íslands að NATÓ öðlaðist að nýju þann kraft sem slíku þjóðþrifamáli ber hjá sjálfstæðri, friðsamri þjóð og ég vænti þess að svo verði. 

Pútín segir Bandaríkjamenn hafa „framleitt" átökin í Georgíu

Tímabært að loka sjoppunni

Það er dálaglegt ástandi á heilsubótarstofnun frjálshyggjubesefanna, Heilsuverndarstöðinni ehf. ef þeir sem þar ráða ríkjum geta ekki borgað launatengd gjöld starfsfólksins. Þegar svo er komið, að fyrirtæki svíkjast um að greiðastéttarfélgs- og lífeyrissjóðsgjöld er um það bil tímabært að loka viðkomandi sjoppu og lýsa hana gjaldþrota.

Starfsmenn hlunnfarnir

Athyglissjúkar brussur

Nú leikur illur grunur á að einhverjar athyglissjúkar brussur hafi komið í veg fyrir að herra Ólafur Ragnar sæmdi handboltahetjurnar okkar Fálkaorðunni í viðurvist manngrúans á Arnahóli í gær. Þess í stað hafi honum verið gert að framkvæma krossfestinguna í einhverju skúmaskoti á Bessastöðum þar sem enginn sá til nema fáeinar hræður. Það er náttúrlega með öllu ótækt að athyglissjúkar brussur fái að komast upp með gípugang og graðhestalæti þegar ríður á að sameina þjóðina í eitt alsherjar bræðra- og systralag um handknattleik og aðra holla iðju.

Orðuveiting á Bessastöðum

Álverssótt er hættulegur sjúkdómur

Það getur varla kallast fallegt af félaga Guðna Ágússyni ,að gera ferð sína norður í land til að æsa upp álverssóttina í Norðlendingum. Það er orðið tímabært að Guðni og fleiri stjórnmálamenn fari að gera sér grein fyrir og viðurkenni, að álverssótt er hættulegur sjúkdómur sem lýsir sér með óstöðugri geðheilsu þeirra sem sóttina hafa tekið, ranghugmyndum og þráhyggjuhugsunum sem ganga útá að þeir geyspi beinlínis golunni fái þeir ekki álver, helst inná lóð til sín. Ennfremur að þeir séu ofsóttir af heimsku og illa gerðu fólki, sem þeir telja að leggi sig í líma við að koma í veg fyrir að álversdraumarnir rætist. Það þarf því ekki að fara í neinar grafgötur með hve slæmt ástandið getur orðið ef Guðni, og fleiri málsmetandi menn, láta ekki af þeirri skemmtan sinni að æra álverssjúkdómin upp í veiku fólki. Það er eins og að veifa eiturlyfjum framaní forfallinn dópista í óskemmtilegum fráhvörfum.   

Kreppa af völdum ráðherra