Dugnaðurinn launaður með mannorðsmissi

Mikið á Sjálfstæðisflokkurinn gott að eiga mann eins og Gvöðlaug Þór Þórðarson í sínum röðum. Þeim manni munar ekki um ræsa út sérdeilis gríðarlega dugnaðarfanta þegar mikið liggur við og tómahljóð komið í péníngakassann í Valhöll. Vikapiltarnir Steinþór og Þorsteinn eru aungvir þúfutittlingar þegar safna þarf saman nokkrum tugum milljóna á svipstundu; þar fara svo sannarlega menn sem ganga hreint til verks og kunna sitt fag. Og nú er öll íhaldshjörðin í öngum sínum, já og sumir hverjir í losti, útaf fyrirhyggju Gvöðlaugs Þórs og dugnaði Steinþórs og Þorsteins. Það ríður ekki við einteyming vanþakklætið í Valhallarkoti; þeir andskotar sem þar búverka eiga ekki skilið að fá eina einustu krónu í kassann hjá sér meir, fyrst atorkusömustu peningasöfnurunum er launaður dugnaðurinn með mannorðsmissi og öðrum álíka kræsingum.

Söfnuðu fé fyrir flokkinn

Öll vissu þau um styrkina - að sjálfsögðu

Bjarni litli Ben ,,telur" að báðir fyrrverandi framkvæmdastjórar Sjálfstæðisflokksins hafi vitað af risastyrkjunum frá FL Grúppinu og Landsbanka Björgólfana. Það er akkúrat það já.

Þess utan er jafn öruggt og nótt fylgir degi, að þingmenn og ráðherrar Sjálfstæðisflokksins vissu allir sem einn að þessum höfinglegu styrkjum. Að halda öðru fram er eins og hver önnur fáránleg og illa ort öfugmælavísa. En hér sannast hið fornkveðna: að ekkert er glæpur nema það sem upp kemst. Á meðan allt lék í lyndi og almenningur hafði ekki hugmynd um rausnarskap um FL-inganna og Björgólfana við fjárhirslur Sjálfstæðisflokksins, flökraði ekki að Bjarna Ben, Thorgerði Katrínu, Stjána Júl og Gvöðlaugi Þór, að nokkuð væri athugavert við að láta peninga úr fórum útrásarfanta og fjárglæframanna standa undir kaupum á eldsneyti til að keyra áróðursmaskínu Sjálfstæðisflokksins áfram af fullum krafti með tilheyrandi mengun af lygum, óhróðri, óréttlæti, yfirgangi og undirferli.

Ég geri mér vonir um að loks sé farinn að læðast inn grunur hjá kjósendum Sjálfstæðisflokksins fyrr og síðar hvers eðlis Sjálfstæðisflokkurinn þeirra er og hefur ætíð verið. Ef svo er, þarf ekki að spyrja að leikslokum í komandi kosningum.Kjósendur munu ganga hreint til verks gegn Sjálfstæðisflokknum á kjördag.

Segir báða framkvæmdastjóra hafa vitað af styrkjunum

Þúfutittlingurinn staðfastur eins og blágrýtisurð

Skelfilega er gott til þess að vita að enn skuli uppi með þjóðinni staðfastir menn, sem standa á sínu og viðurkenna aldrei neitt, allrasíst eigin mistök og axarsköft, jafnvel þó þeir séu hengdir uppí flaggstöng á afturlöppunum og króki með lóði neðaní borað í gegnum miðnesið á þeim. Svona járnbentur últrajötunn er okkar ástkæri Gvöðlaugur Þorn Þórðarson: ekki lætur hann bilbug á sér finna þó andstyggileg ofstækisöfl í Sjálfstæðisflokknum sæki að honum af offorsi með þungum höggum undir beltisstað. Best gæti ég trúað að leikar fari svo að Gvöðlaugur leggi gjörvalla Náhirðina að velli og standi að lokum með pálmann í höndunum, en Illugi, Bjarni Ben, Davíð, Hannes Hólmsteinn, Jón Steinar, ásamt fleiri mannvænlegum köppum, liggi í valnum með slitnar brynjur og sundruð sverð og ógreiddar efnahagssyndir.

Guðlaugur ítrekar fyrri yfirlýsingar

Atla Gíslason í kynskiptiaðgerð - strax

Ég er mest hissa á að VG-urnar á Suðurlandi skuli ekki hafa gengið alla leið og sent Atla Gíslason í kynskiptiaðgerð fyrir kosningar svo flokkurinn gæti státað af hreinræktuðum yfirstéttarfémínístum í þremur efstu sætum listans þar syðra.

Og ekki skil ég í jafn góðum manni og Þórbergi vini mínum Torfasyni að láta pakka sér niður í sjötta sæti eftir að hafa hreppt það fimmta.

Framboðslista VG í Suðurkjördæmi breytt

Páskajólasveinarnir þrettán, Grýlusynir af Gvöðlaugs náð

Þeir láta ekki ganga í verkin sín páskajólasveinarnir þrettán sem páruðu nöfnin sín undir stuðningsyfirlýsingu við sinn bestmann, Gvöðlaug Þorn Þórðarson. Þessir framandlegu Grýlusynir eru af einhverjum ókunnum ástæðum furðu lostnir yfir að hans blessaða nafn skuli hafa verið dregið inní óskiljanlega umræðu um dýrlegar gjafir sannkapítalískra ofurmenna til Flokksins góða. Fyrirfram hefði mátt ætla að mikill heiður væri af að vera viðriðinn burð á gulli og silfri inní Valhöllu, Flokknum til eflingar; en nú kemur í ljós að svo er ekki. Þvert á móti er svo að skilja að sjálfstæðismenn séu allt í einu móti peningum, einkum miklum peningum, og vilji fremur saur og ýldu inní stofu hjá sér en þau óþrif sem verða af peningum, gulli, silfri, kvóta, hlutabréfum og jöklabréfum. Ég held svei mér þá að sjálfstæðismenn séu á hraðferð inní há-kommúnískann þankagang; komir á hörkutripp eins og þeir hafi étið ofaní sig einhver ókjör af LSD, sveppum og rottueitri.

Lýsa stuðningi við Guðlaug

Samband ungra sikileyinga

Í morgun var mér sagt að skammstöfunin SUS stæði í raun og veru fyrir ,,samtök ungra sikileyinga." Sikiley í þessu tilfelli væri bein táknræn tilvísun í mafíueðlið sem er svo samofið ,,sjálfstæðisstefnu" SUS og móðurflokksins. Þetta eru auðvitað nokkrar fréttir útaf fyrir sig, en þegar betur er að gáð fellur allt eins og flís við rass, mafíustarfsemi, Flokkurinn og barnahreyfing hans. 

Vilja upplýsingar um alla óvenjuháa styrki

Júdasar líkar lenda leiksbróður sínum hjá

Það verður eflaust glatt á hjalla á þingflokksfundi Sjálfstæðisflokksins í dag, mikið um faðmlög, kossa og glasaglaum hvar drukkið verður minni litla sósíalistans sem sjálfstæðismenn í Austurlöndum nær krossfestu fyrir hart nær 2000 árum. Þarna verður áreiðanlega mættur frjálshyggjuklerkurinn síra Hjálmar Jónsson dómkirkjuprestur með messuvín og fyrirbænir; ef ég þekki hinn frjálshyggna kennimann rétt mun hann leggja sérstaka áherslu á að blessa guðdómleg fjárframlög banka og stórfyrirtækja í sjóði Sjálfstæðisflokksins að fornu og nýju. Það er heldur ekki á hverjum degi sem einni dauðlegri prestsskepnu auðnast að signa mörg tonn af 30 silfurpéníngum í einu lagi.

Og mikið ósköp á eftirfarandi vers eftir sálmaskáldið á Hvalfjarðarströnd vel við um Sjálfstæðisflokkinn um þessar mundir:

Sjá hér, hvað illan enda

ótryggð og svikin fá;

Júdasar líkar lenda

leiksbróður sínum hjá;

andskotinn íllskuflár

enn hefur snöru snúna

snögglega þeim til búna,

sem fara með fals og dár.

(Hallgrímur Pétursson)

Þingflokkur fundar í dag

Í dag er krossfestingardagur

Í dag láta sannpápískir filipseyingar krossfesta sig unnvörpum í því skyni að finna á eigin skinni þjáningar Frelsarans þá hann var krossfestur endur fyrir löngu á Hausaskeljahæð og einnig til að sýna heiminum að enn eru uppi hraustir menn stútfullir af trúarhita og heilögum anda.

Þá Jesús Kristur var embættaður af auðvaldi og afturhaldi þeirra tíma voru tveir óvinsælir ræningjar krossfestir honum til samlætis til að gera aftöku hans blessaða blóðs sem háðulegasta.

Því miður erum vér íslendingar svo ólánssamir að eiga engann frelsara í augnablikinu til að krossfesta í páskavikunni árið 2009. En sem vöntun á krossfestingarhæfum frelsara er tilfinnanleg á landi voru þá er enginn hörgull á ræningjum til slíkra nota, raunar offramboð af þessháttar kónum svo útaf flóir. Í dag, föstudaginn langa, hanga hin illræmdu samtök, Sjálfstæðislokkurinn, ein á krossinum í hlutverki ræningjanna, frelsaralaus og alslaus, sjálfum sér til ævarandi háðungar. 

 

Þrjátíu krossfestir

Þúfutittlingur steytir görn

Þegar vitrir og góðgjarnir menn í Sjálfstæðisflokknum höfðu komist að þeirri viturlegu niðurstöðu, að best væri að kenna Guðlaugi Þór Þórðarsyni um að hafa betlað nokkra tugi miljóna útúr FL-Grúppinu og BjörgólfsLandsbankanum fyrir fjárvana Flokkinn, bregður svo við að nefndur Guðlaugur Þór rýkur upp eins og grimmur þúfutittlingur og neitar blákalt að hann hafi staðið í miljónabetlinu. Af þessu framferði Guðlaugs Þórs má ráða að hann er ekki reiðubúinn að fórna sér fyrir Flokkinn og Málstaðinn og ætti því að vera brottrækur gjör úr helgidómi Sjálfstæðisflokksins; svona manni er ekki treystandi þegar mikil vá steðjar að. Og af því að páskahátíðin er að ganga í garð, er ekki nema sjálfsagt að minna á að ekki baðst Kristur undan að verða krossfestur fyrir sinn flokk og sinn málstað. Það verður þó að taka fram í því sambandi, að Guðlaugur Þór Þórðarson, fyrrverandi mentamálaráðherra, er ekki haldinn guðlegri náttúru af neinu tagi og þar af leiðandi enginn Kristur. Gáum að því lesendur góðir.

Guðlaugur Þór: Ég óskaði ekki eftir styrk

Hin skuggalegu samtök verði bönnuð með lögum

Í kjölfar tímabærra uppljóstrana um tilkomumikla penigastyrki FL-Grúpp og Landsbankans til Sjálfstæðisflokksins hlýtur að koma fram krafa um að þessi skuggalegu samtök verði lögð niður með lögum frá Alþingi. Það er með öllu ólíðanlegt að samansúrruð samtök siðvillta péingagéðsjúklinga, Sjálfstæðisflokkurinn, fái að starfa áfram eftir allt sem á undan er gengið, slíkt væri algjör fásinna og stórhættulegt.

Guðlaugur Þór hafði forgöngu um styrkina