Framfarirnar eru gífurlegar

Þá er neyðin knýr dyra og öll sund lokuð, ferillinn á enda runninn og í rauninni ekki annað eftir en að snáfa heim með skottið millum lappanna, knén brostin og fúnandi fætur óumflýjanlegir þá gjörast endrum og sinnum kraftaverkin hin meiri. Og nú hafa þeir fundið upp ekta krossbönd úr ofurtógi sem þola meira að segja hlaup og hopp og hí á gervigrasvelli. Það sem meira er, er hin gleðilega staðreynd, að nú verður frá og með deginum í dag hægt að skipta út ónýtum mennskum krossböndum fyrir krossbönd úr ofurtógi í hálfleik og leikmaðurinn, eða leikkonan, hleypur út á völl eins og nýfæddur kálfur á eftir. Eftir allt saman þá er þetta ekki eins ömurlegt fyrir Margréti Láru eins og hún vill vera láta.

Og blessunarlega er ofurtógið til fleiri hluta brúklegt en að flétta úr því endingargóð krossbönd. Til dæmis er gráupplagt að græða það á hárlaus höfuð, semfarið er að gera í amríku. Meðal frægs fólk með hárlubba úr ofurtógi má nefna Dónald Trump og Teresíu May. Enn fremur hefir frægur próféssor og doktor, Hemann Ginkel að nafni, sem missti skegg sitt af taugaveiklun út af siðferði eiginkonu sinnar, látið gæða á sig ofurtógsskegg sem vex fimm sinnum hraðan en venjulegt skegg.

Framfarirnar eru svo gífurlegar, að brátt verður hægt að endurlífga löngu steindauða menn sem ekkert er eftir af annað en grindin. Það væri dásamlegra en allt sem dásamlegt er ef við findum gröf Egils forföður okkar Skallagrímssonar rétt í þann mund sem endurlífganir þessar væru að koma á almennan markað, að ekki sé talað um hvílík umbylting það væri ef Íslendinga bæri gæfa til að öngla saman beinum okkar ástsælasta morðingja, Bjarnar bónda frá Öxl. En nú ku allt vera að gerast og varla langt að bíða þess að fólk geti keypt farmiða til Hymmnaríkis þegar það nennir ekki lengur að vafsast um hér á jörð.

Ég vil ekki loka sögunni svona

Þar er nú upplýst að þeir fóru fánavillt

Það hefir nú komið í ljós að þeir sem migu á breiðbliksfánann í gærkvöldi fóru fánavillt. Að sönnu vóru gerendurnir drullufullir við þetta tækifæri, og þegar við bættist náttmyrkur og íllt skyggni, þá þarf aungann að undra þótt þeim hafi sýnst breiðabliksfáninn vera fáni Framsóknarflokksins, enda eru báðar þessar dulur grænleitar. Á meðan félagarnir töppuðu af sér á fánan, er þeir hugðu framsóknarfána, þá sagði einn þeirra frá því þegar hann meig innum glugga hjá framsóknarmanni og beint framan í hann. 

Svo kom í ljós að hin útmígna tuskudrusla var ekki einkennisveifa þeirra í Framsóknarfjósinu heldur fáni veleðla íþróttafélags í Kópavogi. En þá höfðu bæði Máría Borgargagn og búrtík hennar sett svip sinn á niðurlægðan fánann. Þess ber að geta, að Borgargnið vissi vel hvaða fáni þetta var, en hún góð framsóknarkvinna og hefði aldrei gert neitt þessu líkt við virðingarmerki Framsóknar, hinsvegar hatar hún Breiðablik og það gjörir búrtík hennar líka, auk þess var hún ódrukkin, andstætt við drengfjandana sem missýndist. 

HK-ingar pissuðu á fána Breiðabliks

Hugaður garpur Kolbeinn knattspyrnukappi.

Hann er svei mér hugrakkur hann Kolbeinn okkar hérna knattspyrnukappi, að vaða eins og blindur kettlingur beint í ginið á Erdógan og hinum hundtyrkjunum. Vonandi að Erdógani detti ekki skyndilega í hug, að þessi ljóshærði Íslendingur sé áhangandi og kommissar þess arma þrjóts Gúlens, sem Erdógan kennir um meint valdarán í Tyrklandi í sumar. 

Í gömlum fræðum segir, að einn af helstu hugsuðum á fyrstu áratugum síðustu aldar hafi sagt, þegar hann frétti af morðinu á Ferdínandi heitnum úti á götu í Sarajevó, að þetta væri Tyrkjans verk, og í framhaldi af því spáði hann stríði. Þetta með stíðið rættist svo sannarlega, því friðardúfur evrópsk kapítalisma gerðu út tvær sallafínar heimstyrjaldir á 30 árum þannig að Evrópa var ein rjúkandi rúst á eftir, sem aftur tryggði auðvaldinu framúrskarandi hagvöxt, einkum eftir að mestu stríðslátunum var lokið og rústabjörgunin hófst.

Nú, þá þarf varla að minna á Tyrkjaránið á sautjándu öld. Það var nú heldur en ekki dægileg framkoma við oss Íslendinga. En uppúr Tyrkjaráninu spratt Tyrkja-Gudda og hann Hallgrímur sálugi Pétursson og Passíusálmarnir og síðar Hallgrímskirkja á Skólavörðuholti, sem illkvittnir unglingar kölluðu ,,Drottins dýrðar drelli" allt fram á áttunda áratug tuttugustu aldar. Reyndar var alltaf eitthvað málum blandið með ábyrgð Tyrkja á Tyrkjaráninu, því sumir fullyrða að það hafi verið hollenskir auðvaldsbelgir og þorparar sem hafi átt og gert út tyrkjaránsskipin og áhöfnin hafi verið allra þjóða kvikindi með fremur vafasama fortíð og bakgrunn. En þar eð Kolbeinn knattspyrnukappi er vel kunnugur hollendingum og haft þá tvívegis undir á vellinum, þá er ég ekkert hræddur um hann í Tyrklandi, enda hefir hann skellt þeim líka. 

Þess skal getið hér af augljósri ástæðu og gefnu tilefni, að Kolbeinn á knattspyrnuvellinum er lítið, svo vitað sé, í ætt við Kolbein Kolbeinsson skrifstofustjóra og framsóknarmann. 

„Gat ekki sagt nei“

Stórhættulegur leikur

Það kann að vera ódrengilegt að karlmaður fari höndum hreðjar annars karlmanns inni á fótboltavelli fyrir allra augum, en verra væri þó ef þetta hefði verið kvenmaður sem dóninn hefði káfað á. Svona framkoma í drengilegri íþróttakeppni er í senn óhæfa og viðbjóður og verðskuldar rautt spjald. Réttast væri að dæma þennan óprúttna þorpara frá allri íþróttaiðkan um aldur og ævi. Því miður er þetta ekki í fyrsta skipti sem karlkynið gjörist bert að kynferðislegri áreitni, en þau kvikindi ráða víst ekki við sig þegar því býðst dónaleg framkoma.

Þá ber að geta þess að barsmíð á miðvígstöðvarnar er stórhættulegur leikur og getur auðveldlega leitt til þess að sá er fyrir ofbeldinu verður limsbrotnar og ber þess menjar æ síðan. Soleiðislagað kom til dæmis fyrir vin okkar allra, hann Kolbein Kolbeinsson skrifstofustjóra og framsóknamann, með þeim afleiðingum að hann hefir verið hálfvitlaus síðan. Reyndar varð Kolbeinn ekki fyrir sinni limlestingu í knattspyrnu heldur í hörðum villuleik sem lauk með því að frú Ingveldur sparkaði af alefli í blessaðann punginn á honum. Á eftir lá Kolbeinn á spítala með leyndarlim sinn í gifsi og var það honum mikil kvöl og pína því hjúkkurnar og sjúkraliðkerlingarnar gerðu óspart gys að honum og gáfu honum selbita í gifsið svo að sjúklingurinn gargaði og veinaði af sársauka og skelfingu.

Einnig er minnisstætt þegar Brynjar Vondalykt glopraði níðþungu straujárni á trallann sinn. Það var opið brot. Og allri hlógu. Meiri niðurlægingu er vart hægt að hugsa sér. Annars var þetta með straujárnið helber lygasaga. Hið sanna var að Vondalyktin og Indriði Handreður vóru eitthvað að leika sér, eitthvað sem aunginn mátti vita af. En svo fór sem fór. Þessir paurar létu samt óhöpp sín og slysfarir sér ekki að kenningu verða og hafa síðan telft á tæpasta vað í tiltektum sínum óguðlegum.

„Hann sló mig í punginn“

Ill ummæli útlendra sérfræðinga um íslenska landsliðið

Ekki er nú allt með felldu með veslings fotboltalandsliðið okkar sem á að fara á evrópumót í Frans í sumar. Mjög virtur knattspyrnusérfræðingur á Englandi ku hafa sagt við kunningja sinn að hann skildi ekki neitt í veru Íslands í úrslitakeppninni því að svokallair leikmenn liðsins væru hlálegt samsafn af stekkjastaurum og fituhlunkum og sagðist hafa eftir þjálfara knattspyrnuliðs, svo hefði verið svo óheppið að fá Íslending í sínar raðir, að umræddur Íslendingur væri svo feitur að hann væri meira að segja með hnakkaspik og stirður eins og ryðguð vél sem ekki hefur verið hreyfð í mörg ár.

Þá voru ummæli gamallar fótboltastjörnu frá Spáni ekki þriflegri. Sá útlifaði snati sagði sem svo að þátttaka íslenska landsliðsins í úrslitakeppni Evrópumótsins í knattspyrnu væri hneyksli, hreint og klárt hneyksli, því að landslismenn þessarar skítaþjóðar væru álíka fimar í fótboltakúnstinni og aldurhnignar og gigtveikar beljur sem biðu þess eins að vera leiddar undir hnífinn. Það er ljóst að ríkisstjórn Íslands verður að gera út flokk handrukkara til að hafa uppá þessum spánverjafugli og veita honum verðskuldaða ráðningu.

Það er semsé útlit fyrir að Ísland sé á leiðinni í úrslitakeppnina í Frakklandi einungis til að verða alheimshláturefni fyrir þær stórflengingar sem það á í vændum úti þar, ef marka má orð sérfræðinganna. Til að afstýra þeirri skömm er aðeins eitt úrræði: Að draga landsliðið útúr keppninni og láta því nægja að spila vináttulandsleiki við Grænlendinga, Færeyinga og Hjaltlandseyinga.

Sautján sæti frátekin

Kolvitlaust reiknað hjá KSÍ

Það hlýtur að vera einhver misskilningur að Breiðablik hafi orðið íslandsmeistarar í knattspyrnu karla: þeir hafa lagt vitlaust saman þarna hjá KSÍ þegar þeir voru að reikna stigin hjá liðunum.

Það er nefnilega margsannað náttúrulögmál, hvorki meira né minna, rétt eins og þyngdarafl jarðar, að Breiðablik fellur alltaf þegar það spilar í úrvalsdeild. Og auðvitað féllu Blikarnir þetta haustið eins og venjulega. 

Þetta ægilega stigamagn hjá Breiðabliki er svo fjarstæðukennt að það mætti halda að Tryggvi Þór Herbertsson hafi reiknað stigin fyrir KSÍ.

Breiðablik er Íslandsmeistari

Litlu munaði að Víkingur Ó hampaði bikarnum

Fyrir skömmu síðan varð ég vitni að því þegar Víkingur Ólafsvík tapaði á afar ósanngjarnan hátt fyrir FH í fjögurra liða úrslitum bikarkeppni KSÍ, sem menningarsnauðir fábjanar kalla ,,VISA-bikarkeppni." Ef og hefðu Víkingar sigrað í þeim leik, eins og þeir áttu skilið, hefði það fallið í þeirra hlut að rassskella KR á Laugardalsvellinum í kvöld og þar með væri bikarinn þessa stundina á leið heim í Ólafsvík.

En óheppnin og ranglæti örlaganna varð til þess að nú eru Hafnfirðingar að þamba brennivín uppúr umræddum bikar af sinni heimsfrægu áfengisfýsn í staðinn fyrir að hann ætti að vera í höndunum á góðu fólki af Snæfellsnesi.

FH bikarmeistari karla

Og FH á eftir að tapa meira og stærra

Þeir hafa gott af því FH-ingarnir að fá smá æfingu í að tapa áður en kemur að leiknum gegn Víkingi Ólafsvík þann 28 júli; tapið í kvöld gerir þeim auðveldara að með takast á við tapið gegn Ólsurum þegar þar að kemur. En svo mikið er víst, að Víkingarnir frá Ólafsvík ætla ekki að taka Hafnfirðingana neinum vettlingatökum í næstu viku, enda lið FH skelfingu lostið og sumir leikmanna þegar farnir að væta buxurnar af hræðslu við að mæta örlögum sínum.

En mikið verður gaman að fá þennan bikar hingað til Ólafsvíkur. Það verður áreiðanlega hægt að nota hann til að skíra krakka uppúr honum.

 

FH úr leik eftir annað tap gegn BATE