Hann var á sínum æskuárum sannarlega héraðsósómi

Það er þriflegur djöfull atarna ef svo er komið að íslenskir héraðssaksóknarar séu farnir að gjöra sér ferðir til útlanda í þeim tilgangi einum, að reyna að þefa uppi ávirðingar um duglega og útsjónarsama menn af norðlenskum kynstofni. Hver ætli hafi gefið þessum ,,héraðssaksóknara" leyfi fyrir þessari sóðaferð til Haag í Hollandi? Og hver borgaði undir afturendann á honum? Oss er nær að halda að sá er fót til Haag hafi verið einhver alræmdur héraðsósómi en ekki héraðssaksóknari.

En fyrst minnst hefir verið á héraðsósóma er ekki úr vegi að taka til athugunnar þann valdamikla mann, Kolbein Kolbeinsson skrifstofustjóra og framsóknarmann, þá er hann var æskumaður heima í héraði. Mér segja kunnugir, að ekki hefði leynt sér hvurn mann Kolbeinn Kolbeinsson yngri hefði að geyma um leið og hann skreið upp úr vöggunni í frumbernsku. Það voru vitni að því þegar þetta drengkerti var að leika sér að því á öðru ári berja ketti með smíðahamri; soleiðis gera aðeins þeir sem haldnir eru Djöflinum frá upphafi. Svo kom piltur með öxi og hjó skottið af ketti, sem amma hans átti. Þegar afi Kolbeins frétti af verknaðinum sagði hann að réttast væri slá strákskömminni við hestastein svo hann fremdi ekki fleiri glæpi.

Þegar Kolbeinn var tólf ára gekk hann nokkuð svo fram af þroskuðu fólki, já og óþroskuðu líka, með brennivínsdrykkju og drögum af afbrigðilegri kvensemi. Það var ekki eins og hann væri að eltast í meinleysi við jafnöldrur sínar. Ónei. Þetta krakkakvikindi reyndi eins og fullorðinn dólgur við fullorðnar konur og vel stálpaðar stúlkur, sem þóktu léttar á bárunni, eins og Móði Moj skipstjóri og útgerðarmaður orðaði það þegar hann þurfti að úttala sig greiðviknar konur. Og það var aunginn flóarfriður fyrir helvítis endeminu og fór svo, að giftur maður sást koma með Kolbein tólf ára út úr húsi og flengja hann stórhýðingu og hóta að reka hann í gegn með girðingarstaur, ef hann léti ekki af brenglun sinni; kallgreyið, gifti karlinn, hafi víst komið að kérlíngu sinni þar sem hún var í óðaönn að klappa Kolbeini strák og kjassa hann.   

Funduðu í tvo daga vegna Samherjamálsins