Jóhannes Ragnarsson

18.12.2019 | 15:15

Hraunburður Levís og hugsanleg hefnd Ása

Þá hefir píratapilturinn Leví látið sig hafa að ,,hrauna yfir Ása", sem aftur leiðir hugann að ljóði sem hefst á eftirfarandi verklýsingu: ,,Hann lagði hana á bakið í blágrýtisurð og buxunum fleygði hún lengst út í skurð." Með þessu er þó ekki verið að gefa í skyn neitt afbrigðilegt eða ósiðlegt um innilegt samband Leví og svokallaðs Ása. Neinei, fjarri fer því.

Nú, hraununin, sem Leví gortar sig svo mjök af, felst þó ekki í því að hann kasti hraungrýti í Ása og linni ekki látum fyrr en karlinn er kominn undir farg af hrauni. Ekkert soleiðis, nei. Hraunburður Levís felst eingöngu í skriftum, kjaftbrúki á netinu, þar sem strákurinn leyfir sér að tala ljótt um Ása, eins og hann sé einhverskonar ófreskja, dýrbítur, en það er Ási auðvitað ekki.

Og hvað ætli valdi svo þessu hraunstandi á píratapjakknum? Það veit svo sem aungin. En eitthvað mun það þó standa í sambandi við annað bréf, bréf sem margnefndur Ási ku hafa sent frá sér út í Evrópu þar sem hann kvartar sárt undan píratatunnunni Þórhildi Sunnu. Það skal tekið fram, að full þörf var á öllum þeim bréfaskriftum sem hér eru til umfjöllunar, þó ekki væri til annars en að skemmta einkennilegu fólki í skammdeginu. Ekki fer hjá því að mikill stígandi er í sögunni af bréfum Levís og Ása og vissulega mun draga mjök til tíðenda er líða fer að þorra. Er ekki örgrannt um, að stórmæli nokkur liggi í loftinu með mannvígum að fornum sið. Það er til dæmis fullyrt, að enn og aftur margnefndur Ási lumi á atgeiri nokkrum, ágætu vopni flugbeittu, sem upp kom þegar grafið var fyrir einhverju mannvirki í Fljótshlíð. Nú er bara og bíða og sjá hvort Ási laumi atgeirnum inn um glugg Levís og komi þar með fram grimmri hefnd fyrir hraununina.