Hvernig Hálfdán Varðstjóri þaggaði niður í blaðamannabullum

Ekki datt neinum í hug að rannsaka málið þegar Hálfdán Varðstjóri lumbraði hressilega á nokkrum blaðasnápum að gefnu tilefni. Helvískir blaðasnáparnir höfðu legið á því lúalagi að birta svæsnar lygagreinar um máttarstólpa þjóðfélagsins og bera þeim á brýn stórþjófnað, morð, lygar og fleiri djöfullegar syndir. En þegar eitt blaðamannsskrípið tók sig til að fullyrti að einn þeirra, sem hann og félagar hans voru búnir að dunda sér við að gera ærulausan stórþjóf og morðingja væri kominn í beinan karlegg af húnvetnskum sauðaþjófum, var Hálfdáni Varðstjóra nóg boðið og ákvað að taka þetta skítamál föstum tökum.

Hálfdán Varðstjóri byrjaði á að heimsækja vinnustaði umræddra fréttasnápa og setja ritstjórnum þeirra afarkosti. Því svöruðu dólgarnir með því að kokka upp frétt um Hálfdán Varðstjóra, þar sem honum var lýst sem útsmognum bófa, ruddamenni og fanti, og gefið í skyn að maðurinn gengi ekki heill til skógar á kynferðissviðinu. Þessi greinarstúfur varð til þess, að Hálfdán Varðstjóri heimsókti hvurn og einn þessara blaðamanna einslega á heimilum þeirra. Heimsóknir þessar leiddu af sér þá sáru staðreynd, að blaðamannsbleyðurnar mættu ekki til vinnu í mánuð eða meir; sumir voru sagði liggja á sjúkrahúsum, en aðrir lægju undir rúmum sínum í einni samfelldri dauðaangist og ofsahræðslu við að Hálfdán Varðstjóri birtist aftur um hnefa sína uppreidda.

Upp úr þessu slaknaði mikið á aðför blaðadjöflanna að voldugum forstjórum, bankastjórum og stjórnmálamönnum. Að sama skapi hækkaði gengi Hálfdáns Varðstjóra á æðstu stöðum, og forsætisráðherra bað bysskubb að biðja sérstaklega fyrir Hálfdáni við hátíðarmessu á nýársdag. Brynjar Vondalykt, sem þá var rétt nýbúinn að ná sér eftir nefbrot, sem hlaust af varðstjóralegum atlotum Varðstjórans við Vondulyktina, en lá nú dasaður á dívani heima hjá sér og hlustaði á messulæti bysskubbs á nýársdag. En þegar kom að bæn bysskubbs til Guðs um að hann blessaði og varðveitti Hálfdán Varðstjóra, leið yfir Brynjar Vondulykt og það sem eftir var dagsins og daginn þar á eftir þjáðist hann af hjartsláttartruflunum og andarteppuköstum og sat á toilett með freyðandi niðurgang. Svona getur nú guðlast haft vond áhrif á viðkvæmar sálir.

Rannsaka árás lögreglu á fréttamenn