Baráttukveðja til baráttufólks

Þá er búið að hafa endaskipti á Halldóru Saleksdóttur og Birni Framsóknamanni í Samherja-Einingunni á Akureyri. Þrátt fyrir langvarandi hatrammar árásir á Villa á Skaganum, Sólveigu Önnu og Aðalstein á Húsvík var öll sú óeigingjarna vinna frú Saleksdóttur, Framsóknarmannsins, Agníesku, Drífu Snædal og Höllu Títu unnin fyrir gýg, svo að nú liggja þau öll sem eitt í foraðinu eins og blindir ánumaðkar og geta ekki hamið innri sálrænar hamfarir og andverkalýðsbaráttuhvatir sínar. Þetta fólk er náttúrlega búið að vera og fer nú á ruslahaug sögunnar sem varhugaverð spilliefni.

Um leið og Starfsgreinasambandið féll í höndur verkalýðssinnum á tólfta tímanum í morgun varð um leið ljóst að ekki verður látið staðar numið og í haust verður ASÍ tekið og flugumönnum, eða öllu heldur flugkvendum, Katrínar og ríkistjórnarinnar og slepjulegum krataeðlisplöntum sem það hafa hreiðrað um sig sópað út á þingi sambandsins. Þannig er blessunarlega sól kerfismenna, krataeðlis og framsóknarmennsku mjök í sæ sigin og ,,Koníaksklúbburinn" fyrir bí. Sennilega mun aunginn maður hafa fyrir því að dysja hinn fallna ófögnuð og því síður verður honum reistur minnisvarði.

Í greni atvinnurekendasambandanna og í þjófagengi stjórnarráðsins ríkir taugaveiklun og niðurgangur vegna taps og flótta hinna meðfærilegu og andbaráttusinnuðu kerfiskalla og kérlínga í samtökum verkafólks. Áður höfðu samtök verslunarfólks sagt Sjálfstæðisflokknum að fara til fjandans og kosið sér róttækt fólk til forustu, þannig að verkalýðssamtökin eru að breytast úr undirförulu og svefndofnu lamadýri í þau stéttabaráttusamtök sem þeim ber að vera. Í dag er full ástæða til að óska verkafólki og Starfsgreinasambandinu til hamingju.

Vilhjálmur kjörinn formaður Starfsgreinasambandsins