Sá yðar sem syndlaus er ...

Þá Kolbeinn hafði verið fjarverandi um hríð, varð þráfaldlega vart mannaferða kringum heimili hans og frú Ingveldar. Ekki bar mönnum saman hvort ætíð væri um sama mann að ræða eða hort þeir væru fleiri. Óx mjög kvittur og hríðféll um leið veraldargengi frú Ingveldar. Dag einn var svo mönnum nóg boðið og króuðu þeir frú Ingveldi af á götu úti, er hún var fótgangandi á leið til verslunar. Þegar hún sá að í óefni var komið, hrópaði hún svo hátt að heyra mátti vítt um völl: -Sá yðar sem syndlaus er, kasi fyrsta steininum!!! Laut þá síra Baldvin niður og tók upp af strætinu hnefastórann hnullung og einhenti í frú Ingveldi, og fullnægði þar með réttlætinu í prestakallinu.

Sveinn Jörundur Lostahrókur.

Þeir eru heldur betur hugrakkir þarna hjá Manchester City, að ráða Svein Jörund Eiríksson sem knattspyrnustjóra, en Sveinn þessi Jörundur er alræmdur kvennaflagari og lostahrókur, sem ekki vílar fyrir sér að gilja allt kvenkyns, sem í það og það skiptið er undir sama þaki og hann. Sérlega ku kallfjandinn stórtækur og gírugur til skrifstofukvenna svo hrein hörmung er að.

Það má vel vera, að Sveinn geti kennt Citymönnum að sparka í fótbolta, en þegar tillit er tekið til hroðalegrar kvensemi hans er áhættan af ráðningu hans allt of mikil.

Eriksson gerir þriggja ára samning við Manchester City

Friðflytjandinn Tony Blair.

Það er víst í engu logið þegar sagt að hræsnin ríði aldrei við einteyming. Hvað er það annað en hræsni af svörtustu sort, að láta sér detta í hug að gera ódæðismanninn Tony Blair að sérstökum friðarerindreka fyrir botni Miðjarðarhafs? Og hvað á maður eiginlega að segja við yfirlýsingu Blair við fréttamenn, þess efnis, að hann sé reiðubúinn að gera það sem í hans valdi stendur til að koma á friði milli Ísraelsmanna og Palestínumanna? Í mínum eyrum hljómar þetta ógeðfellda orðagjálfur Tony Blair á svipaðan hátt og að Osama bin Laden léti hafa samskonar þvætting eftir sér.

Heimurinn verður að fara gera sér ljóst, að menn eins og Tony Blair og Georg Bush, og sú hirð sem að þeim stendur, eru ekkert minna en stóhættulegir glæpamenn, sem hika ekki við að ögra mannkyninu alla daga eins og ekkert sé sjálfsagðara - og komast upp með það.

Blair lýsir áhuga á að vinna að friði í Miðausturlöndum

Sveitaball 59.

Á dansleiknum þandi Arnfreður Lyngdalh harmónikkuna í beljandi rælum og skottísum. Þegar á leið skrallið, varð Arnfreður ölvaður og fóra leika svo skrykkjótt að takturinn riðlaðist og stórárekstrar urðu á dansgólfinu, sem aftur leiddu til hörkuáfloga. Mátti Hálfdán lögregluþjónn hafa sig allann við, að ganga milli manna og stilla til friðar, ýmist með fortölum eða með handjárnum. Hina járnuðu geymdi Hálfdán í illa lyktandi afhýsi að húsabaki. Var vistin þar dimm og rök með skorkvikindum, nagdýrum og draugum. En inni á dansleiknum fimbulfambaði Arnfreður Lyngdalh algjörann glundroða á hljóðfærið, án þess að nokkur gæti rönd við reist.

Var Jónas Hallgrímsson kona?

Mikil þó djöfulsins bölvuð karlremba er fólgin í kjaftæðinu um þessa svokölluðu Fjölnismenn. Og nú bætir innantómur pokaprestur við vitleysuna með því að halda fram, að Tómás Sæmundsson hafi verið faðir Fjölnismanna. Með þessu rislitla innleggi er pokapresturinn tvímælalaust að gefa i skyn eitthvað vafasamt og ósiðlegt um mæður Fjölnismanna; eða hefur t.d. einhverjum áður dottið í hug að Jónas Hallgrímsson hafi ekki verið Hallgrímsson heldur Tómásson? Ég held nú síður, hinn forpokaði musterishöfðingi er fyrstur manna að viðra slíkar dylgjur.

Nei drengir mínir. Það þýðir ekkert að bera svona karllægan óþverra á borð fyrir mig. Löngu liðnar heiðurskonur bíða ekki skaða í mínum huga þó karlrembuprestur reyni að sletta á þær óorði undir rós. En minni fémínízku siðferðiskennd er stórlega misboðið. Því segi ég skýrt og skorinort: Fjölnismenn voru líka Fjölniskonur, eða eru einhverjar skotheldar sannanir til fyrir því að Jónas Hallgrímsson (ekki Tómásson) hafi ekki verið kona? 

Föðurímyndar Fjölnismannanna minnst

Meðferð á látnu fólki.

Jæja já, eru þeir nú farnir að geyma jarðneskar leyfar okkar kæru burtsofnuðu meðbræðra í kælum innanum grænmeti og dauða kjúklinga! Mig hefur lengi grunað að þetta mundi fara svona. Það nær auðvitað ekki nokkurri átt, að bjóða fólki, lifandi eða dauðu, upp á svona svívirðilegar traktéringar. Ég er algjörlega brand sjúr á, að ekki fyrirfinnst á landinu ein einasta sál, sem vill taka við kistu síns nánasta angandi af sláturlykt og kartöflum, svo lítið dæmi sé tekið.

Annars langar mig mest að vitna í Eddu Þórbergs Þórðarsonar, fyrst meðferð á líkkistum með réttu innihaldi er hér til umræðu. En þar segir Þórbergur meðal annars: ,,Hann (þ.e. Þórbergur) óskar að geta gert háttirtum lesendum það skiljanlegt, að hann telur allar serimoníur með rotnandi hræ, hversu geníalt sem innihald þess hefur verið, ógeðslegt vitni um bjánaskap og innantómleika, ef ekki illmennsku. Og hann álítur í fyllstu einlægni alla þá menn, sem fást við slíkan fábjánahátt, sálsjúka og andlega blinda auðnuleysingja, ef ekki fúlmenni."

Samskip segjast fylgja nákvæmlega reglum um líkflutninga

Hinn kynhverfi nýnazisti.

Kynhverfingurinn, sem auk þess var nýnasisti, sat inni á kaffihúsi og kroppaði kruðirý ofan af sætabrauði sem hann hafði látið færa sér. Fölskvalaust og innilega hataði kynhverfingurinn útlendinga, að maður nefni nú ekki litaða ættbálka. Í jólaboði hjá ömmu sinni og afa, sagði hann stundarhátt og í allra áheyrn: -Það vildi ég amma mín, að þú hefðir notað alvöru júða í þessar gyðingakökur! Og amman varð undurglöð að heyra þessi ummæli, því sjálf var hún gömul nazistísk tík sem alla tíð hafði tilbeðið Hitlir á laun.

En víkjum aftur að kaffihúsinu þar sem vinur okkar, hinn Nationalsocialíski kynkverfingur, naut lífsins og sjálft við lá að hann væri búinn að bora sig í gegnum kaffið og kökurnar. Skyndilega og án nokkurs fyrirvara, snarast inn á kaffihúsið ægilegur blendingur, að hálfu leyti blámaður af Zúlúkaffaætt og að hálfu leyti gyðingur. Við að líta þessa feiknstafi varð kynhverfingurinn nýnazistíski gjörsamlega lémagna og leið meðvitundarlaus undir borð. Starfsstúlkurnar héldu að hann hefði fengið bráðkveddu og væri látinn. Þær hringdi þó eftir sjúkrabíl, furðu ástríðulaust að vísu, og tilkynntu andlát viðskiptavinar. Á meðan sjúkrabíllinn var á leiðinni, rifaði sá látni annað augað, en féll samstundis í dá aftur, því hið eina sem fyrir auga hans bar var nefstórt trýnið á blendingnum hræðilega. Að lokum báru sjúkramennirnir hugsjónamanninn meðvitundarlausann og fölann sem nár út í bíl og óku í brott undir blikkandi ljósum og sírenublæstri.   

Félagar í kvótamafíunni handteknir.

Hugsanleg frétt einhverntímann í framtíðinni:

,,Lögreglan á Norður-Atlandshafseyjunni Íslandi handtók í gær níu mans, sem taldir eru félagar í kvótamafíunni svonefndu. Eru mennirnir grunaðir um að hafa að yfirlögðu ráði drepið niður fjölda sjóþorpa og og einyrkja í útgerð, sem starfað hafa á yfirráðasvæði kvótamafíunnar. Búist er við fleiri handtökum næstu daga vegna þessa máls. Meðal annars er talið óhjákæmilegt að nokkir fyrrverandi og núverandi valdamiklir stjórnmálamenn verði hnepptir í varðhald í dag. Þá er reiknað með, að ríkisstjórn Íslands leysi upp á næstunni a.m.k. 5 til 10 stórútgerðir sem viðriðnar eru kvótamafíuna."

Níu liðsmenn mafíunnar handteknir á Sikiley

Samkvæmisleikir glaðsinna fólks.

Mikið er nú alltaf indælt að vakna á sunnudagsmorgnum og hlýða á fréttir af drykkjulátum og drykkjuafglöpum borgaranna. Barsmíðar, hnífsstungur, skothríð, ölvunarakstur, nauðganir, allt eru þetta viðurkenndir samkvæmisleikir í skemmtanalífi glaðsinna fólks sem hefur svokallaða vínmenningu að leiðarljósi. Ofan á þetta bætist, að enginn er lengur maður með mönnum nema hann brúki hvítt duft í nefið með rauðvíninu og bjórnum enda gerist æ algengara að ökumenn sem lögreglan stöðvar séu hvort tveggja í senn: dauðadrukknir og uppdópaðir. Þetta er sko nútímafólk sem kann að skemmta sér.

Fjórir í haldi lögreglu eftir fjöldaátök

Að banna loðnuveiðar og veiðar með flotvörpu.

Vangaveltur Össurar um stjórnun á fiskveiðum eru svo sem góðra gjalda verðar svo langt sem þær ná. En því miður dettur Össur, eins og við var að búast, í sama drullupyttinn og aðrir spekingar af stjórnmála- og LÍÚ-kyni, sem hafa leikið sér að því, að rugla og afvegaleiða alla umræðu um sjávarútvegsmál í því skyni að varðveita kvótakerfið ásamt mafíustarfseminni sem því fylgir. Frá mínum bæjardyrum séð, er tómt mál að velta sér mikið upp úr aflareglum til eða frá, eða hvort Hafró heyrir undir sjávarútvegsráðurneyti eða eitthvert annað ráðuneyti, meðan fiskurinn í sjónum fær ekki nóg að éta.

Ég bota t.d. ekkert í, af hverju ekki er búið að banna loðnuveiðar fyrir löngu og af hverju í ósköpunum er ekki búið að banna alfarið veiðar með flotvörpu. En líklegasta skýringin á þessu tvennu er taumlaust ábyrgðarleysi stjórnmálamanna og veiklun þeirra gagnvart öflugum stórkvótaútgerðum. 

Össur vill færa Hafró frá sjávarútvegsráðuneytinu