Þeir sem dauðir eru fara út af listanum

Auðvitað eru þeir aðilar sem sannarlega eru steindauðir teknir út af hryðjuverkalistanum. T.d. færi Al-kæjeta út af listanum á sömu stund og síðasti liðsmaður samtakanna félli í valinn.

Hitt er aftur annað mál hvort okkar menn, sem voru á hryðjuverkalista bresku ríkisstjórnarinnar, séu algjörlega dauðir úr öllum æðum.

Landsbankinn af hryðjuverkalista

Þegar hún var borin í burtu dauð

Þessi ofur sorglega frétt af kveðjustund og brotthvarfi Hreiðars Más úr Kaupþingi í gær minnir mig þægilega á húsganginn góða:

Hún Heiða gamla var að baka brauð,

en brenndi sig og gerði skyssu slíka,

að þegar hún var borin í burtu dauð

var brauðið ónýtt líka.

Hreiðar Már yfirgefur Kaupþing

Primo þjófóttir; secundo lygnir ...

,,Minn herra hefur lesið í frægum bókum að íslendingar séu primo þjófóttir; secundo lygnir; tertio montnir; quarto lúsugir; quinto drykkjurútar; sexto saurlífismenn; septimo ragir og dugi ekki til hernaðar."

HKL-Íslandsklukkan

Það mætti halda að þetta forna álit útlendinga á íslendingum sé gengið í endurnýjun lífdaga, a.m.k. í Glasgow.

 

Óvelkomnar í gæludýraverslun í Glasgow

Hlægilegt þrugl

Talið er, talið er ...

Það er alveg sama hvað einhverjir hlandprestar og mykjulæknar telja, þeir hafa ekki hugmynd um hvort fossakjánaskapurinn í New York hafi skilað borginni einum einasta eyri. Svona kjaftæði minnir óneitanlega á meinta söngsigra Garðars Hólm erlendis í Brekkukotsannáli. Það er í mesta lagi hægt að hlægja að þvílíku endemis þrugli.

Og að halda því fram að Ólafur þessi Elíasson sé listamaður er ekki einusinni hlægilegt. Það ber einungis dapurlegt vitni um andlega fátækt og úrkynjun borgarastéttarinnar.

 

 

Mikill áhugi á fossum Ólafs

Júdasar líkar lenda ...

,,Júdasar líkar lenda, leiksbróður sínum hjá" segir síra Hallgrímur sálugi Pétursson í Passísálmun sínum. Og síra Hallgrímur vissi hvað hann söng. Í sömu sálmum segir enn fremur: ,,Undirrót allra lasta, ágirndin kölluð er."

Það getur orðið mönnum dýrt spaug að skella skollaeyrum við aðvörunum síra Hallgríms. Þeir sem það gera lenda í vondum félagsskap. Annað er óumflýjanlegt.

Landsbanki í slæmum félagsskap

Á hjólbörum inní ESB fyrir 30 silfurevrur

Merkileg greinin um ,,krónuna sem tifa á mjóum fótum." Greinin er þó ekki merkileg fyrir að vera frumleg að neinu leyti, upplýsandi eða gáfuleg. Merkilegheitin felast í tali samfylkingarforingjanna I. Sólrúnar og Össurar. Þessar vesalings ræfilstuskur svara fréttamanni mbl.is eins og krakkagrey í 1. bekk grunnskóla sem ónáðuð eru í miðjum handavinnu- og föndurtíma.

Að baki einfeldningslegra viðbragða þeirra, býr samt sem áður vonin um að þeim takist fyrr en varir að aka þjóðinni á hjólbörum inní hymmnaríki ESB. Sem sagt: Undir barnslegu yfirbragðinu vakir slóttugur ESB-höggormur, þess albúinn að fórna sjálfstæði Íslands fyrir 30 silfurevrur. 

Krónan tifar á mjóum fótum

Tími Ingibjargar er liðinn líkt og frjálshyggjunnar

Það var heldur ekki við því að búast, að hinn hægrisinnaði formaður Samfylkingarinnar kæmi til með að sjá einhver óaðgengileg skilyrði Alþjóða gjaldeyrissjóðsins í ,,samningaviðræðum" sjóðsins við íslendinga.

Tími Ingibjargar Sólrúnar er liðinn í stjórnmálum, og er þannig líkt á komið með henni og frjálshyggjunni. Enda hafa samfylkingarforinginn og frjálshyggjan daðrað hvort við annað af mikilli vinsemd.

Engin óaðgengileg skilyrði

Hræðsla sjálfstæðismanna við kosningar á ekki að ráða för

Tími frjálshyggjunnar er liðinn, það er óþarfi að setja spurningarmerki við það. Eins og gefur að skilja, er tími þeirra stjórnmálamanna sem stóðu fyrir frjálshyggjupólitíkinni á Íslandi líka liðinn. Það er ótrúleg óskammfeilni af því fólki sem keyrði á hinum græðgisvædda frjálshyggjukapítalisma að rembast enn við að hanga á stjórnartaumunum eins og hundar á roði; þetta lið ætti, að öllu eðlilegu, að vera búið að segja af sér og láta sig hverfa af sjónarsviðinu. Ef til stendur á annað borð að byggja íslenskt upp að nýju kemur ekki til mála að þeir sem sigldu þjóðinni í strand komi þar nokkurs staðar nálægt. Fólkið í landinu er búið að fá meir en yfir sig nóg af lýðnum sem ráðið hefur ferðinni, lýðnum sem talið hefur að hann eigi allt og megi allt.

Í mínum huga er það fullkominn dónaskapur af hálfu stjórnmálamannana, að ekki sé búið að boða til alþingiskosninga. Það er svo sem vitað að innan valdaflokksins mikla, Sjálfstæðisflokksins, ríkir mikil hræðsla við kosningar nú. En að sjálfsögðu á hræðsla sjálfstæðismanna við kosningar ekki að stöðva lýðræðislegan vilja kjósenda.

Er tími frjálshyggjunnar liðinn?

Kona veitist að ráðherrum á óviðurkvæmilegan hátt

Hún er þokkaleg þessi Brynhildur Pétursdóttir, að vaða að saklausum ráðherrum, sem eru að ,,gera sitt besta," og bera þeim á brýn að þeir séu óuppdregnir rustar, kunni ekki mannasiði og séu í þokkabót ekki svo mikið sem mellufærir í ensku. Ef skoðun Brynhildar á ráðherrunum á við rök að styðjast þarf engan að undra hvernig komið er. En er skoðun hennar rétt? Ja, því ekki það. Er svosem við öðru að búast úr þeirri átt? 

Það er huggulegt fyrir eina þjóð, eða hitt þá heldur, að halda úti stjórnmálamönnum af þeirri tegund manna, sem ekki hefði þótt forsvaranlegt að taka með í siglingu á Grímsbý og Húll á síðutogurunum í gamla daga. Það er jafnvíst og nótt fylgir degi, að svona drengir hefðu með engu móti getað komist skammarlaust frá að stofna til heiðvirðra kynna við stúlkurnar á Rauða ljóninu og öðrum valikunnum knæpum í útgerðarbæjunum við Humberfljót. Slíkar tilfæringar hefðu vitaskuld endað með ófyrirsjáanlegum ósköpum.

Annars held ég sé mun hygglilegra að senda Gjeir Haaarde, Össur, Ingibjörgu, Árna Matt, Thorgerdi Kattrínu og þau hin á málaranámskeið í stað málanámskeiðs. Það væri þá ef til vill von að hægt væri að brúka þau á eftir til að tjarga húsgrunna og skipsbotna, þó ekki væri annað. 

Vill senda ráðamenn á tungumálanámskeið

Fávitaskapur af talíbönskum frjálshyggjutoga

Samkvæmt fréttum heimtar Alþjóða gjaldeyrissjóðurinn ekki að Íbúðarlánasjóður verði einkavæddur. Enn fremur, að ekki séu sett fram tímamörk um einkavæðingu á bönkunum þremur: Landsbanka, Glitni og Kaupþingi!!!

Ekki nema það þó. Íslendingar ættu varla annað eftir en að einkavæða bankana uppá nýtt. Mér skilst að jafnvel ólíklegasta fólk sé farið að taka sér í munn frasakenndar bjargráðssetningar eins og: ,,við skulum læra af reynslunni," og eitthvað fleira í þeim dúr. Ef stjórnvöld ætla að fara að brasa við að einkavæða (einkavinavæða, því það getur aldrei orðið annað en einkavinavæðing) bankana, hafa þau hin sömu stjórnvöld ekkert lært af neinni reynslu.

Að sjálfsögðu eiga bankarnir, eftir það sem á undan er gengið, að vera áfram í eigu ríkisins, og reknir á forsendum alþýðunnar. Allt annað er hreinn og klár fávitaskapur af talíbönskum frjálshyggjutoga.

Óska eftir 6 milljörðum dala