Í Reykjanesröstina með hexið

Það held ég verði þrifaleg uppákoma að fá stríðshexið Kondólessu Ræs í heimsókn til Íslands. Eflaust munu fulltrúar íslensku ríkisstjórnarinnar nudda sér upp við þennan óvelkomna gest eins og malandi kettir sem eygja von um örlítinn bita úr ísskáp bandarísku hernaðarvélarinnar.

Ef einhver dugur væri í íslendingum, tækju þeir á móti utanríkisráherru Georgs Bush með því að grípa hana strax á Keflavíkurflugvelli og fleygja henni í Reykjanesröstina sem er þar skammt undan. Slíkt væri mikið velgjörðarverk við gjörvallt mannkyn.

Ræðir samskipti landanna

Ríðandi á mjólkurkú innan um gljáfexta gæðinga

Mikið lán væri það fyrir oss íslendinga að eiga fleiri menn á borð við þennan Egil Gillz Einarsson. Hann gerir sér, ólíkt flestum löndum sínum, fullkomlega grein fyrir anda og alvöru Söngvakeppni evrópskra sjónvarpsstöðva. Það er ekki grín, heldur mikið alvörumál, að íslenska þjóðin í heild sinni skuli misskilja þessa mikilsvirtu söngvakeppni; slíkt ástand minnir einna helst á hina mergjuðu talsmenn Samfylkingarinnar sem ætla að redda öllu milli himins og jarðar á Íslandi, að meðtöldu eilífu lífi fyrir alla þegna þjóðarinnar, með því að jarðsyngja Ísland inn í ESB.

Það er náttúrlega afleitt, eins og Egill Gillz bendir réttilega á, að senda óvinsæla hljómsveit með einn gamlan bakraddarsöngvara í pússi sínu til að halda uppi heiðri þjóðarinnar í Serbíu á þeim mikla degi sem evrópska sönvakeppnin fer fram. Þessháttar framferði er líkt heimskum manni sem færi á landsmót hestamanna ríðandi á mjólkurkú.

Framtíðin er sem sé ekki björt fyrir oss sanna, vitiborna íslendinga í eróvísíonsöngvamálum. Má vera að þjóðin vitkaðist í þessum efnum, ef Samfylkingunni tækist blessunarlega að draga hana inn í ESB. En því miður hefir fram að þessu gengið harla illa að hafa vit fyrir þeirr andstyggilegu þjóðarnefnu sem vér heyrum til; henni er víst margt annað betur gefið en að skilja tíðarandann réttum skilningi, hvað þá að velja kórréttar söngsveitir til að sigra í Söngvakeppni evrópskra sjónvarpsstöðva.

Skilja ekki Júróvisjón

Valdið er alltaf á sínum stað

Morgunblaðið og Matti Jó,

mister Benediktsson og Nató.

Ella Hirst og Halli Jó,

herra Oddesson og Seðló. 

 

DV stendur við frásögn sína

Auðvitað átti RÚV að mynda og sýna Jón í járnum

Ég sé nú bara akkúrat ekkert athugavert við það að fréttastofa Ríkissjónvarpsins hafi vilja sýna landsmönnum Jón Ásgeir í handjárnum þann 29. ágúst 2002. Það gerist heldur ekki á hverjum degi að burgeisar séu handteknir þegar þeir koma til landsins með áætlunarflugi. Ég geri ráð fyrir að sama fréttastofa vildi vera nærstödd ef til stæði að leiða Davíoddsson útúr Seðlabankanum, járnaðan á höndum og fótum.

En fyrst yfirvöldum hefur ekki tekist að fanga bankaræningjann góða í Hafnarfirði er auðvitað borin von að þeim takist að færa Jón Ásgeir og Davíoddsson í bönd. Sannleikurinn er nefnilega sá, að yfirvöldum hefur ekkert farið fram að ráði síðan þau handtóku skagamanninn Jón Hreggviðsson fyrir snærisþjófnað fyrir margt löngu síðan.

Fréttastofa Sjónvarps fer fram á leiðréttingu frá DV

Sammála lögmanni Gvendar góða

Mikið er ég innilega sammála lögmanni Guðmundar Jónssonar góða í Byrginu þegar hann segist ósáttur við dóminn yfir Gvendi. Það hefni nefnilega átt að dæma kauða í minnst þrjátíu og þriggja ára fangelsi fyrir meðferðarafrek hans. Um það erum við lögmaðurinn áreiðanlega fullkomlega sammála. Að sama skapi er ég ósammála störnusýslumanninum Stones að dómurinn sé innan þess ramma sem búast hefði mátt við. Það er greinilegt að stjörnusýslumaðurinn er farinn að linast meir en góðu hófi gegnir, sem er náttúrlega afleitt útaf fyrir sig og mikið áhyggjuefni.

Ósáttur við dóminn

Ótrúlegur munnsöfnuður

Mikið er nú alltaf sorglegt þegar varðstjórar fara lítlisvirðingarorðum um viðskiptavini sín sína. Að kalla duglegan og útsjónarsaman borgara ,,bullukoll" fyrir það eitt að ætla að auðga sig er þyngra en tárum tekur. Fyrir þennan ótrúlega munnsöfnuð ætti auðvitað að loka varðstjórann inni í fangaklefanum með manninum sem hann talaði svo óvirðulega um. Veit varðstjórinn máske ekki að auðgunargirnd og tilburðir til auðgunar er mesta dyggð sem þekkt er í heiðarlegu frjálshyggjuríki? Það mætti halda að maðurinn sé kommúnisti eða eitthvað þaðan af verra.

Bullukollur braut rúðu

Ómerkilegur þorpari

Nú, fyrst þessi ómerkilegi þorpari vill ekki koma til Íslands þá held ég sé best hann láti sér nægja að garga heima hjá sér. Hann er hvort eð er lítið skárri öskrari en Kristján Jóhannsson, Egill Ólafsson og Bubbur Morteins. 

Meat Loaf aldrei aftur til Íslands?

Lögreglukona en ekki lögreglutík

Þessar frétt trúi ég nú rétt mátulega.

En getur einhver frætt mig um hvenær sá siður komst á að kalla konur sem stunda löggæslutörf lögreglutíkur? Í meðfylgjandi frétt segir að Mbl sjónvarp hafi fengið að fylgjast með einni lögreglutík að störfum. Hvern þremilinn á svona orðbrag að þýða? Er máske verið að gefa í skyn á ósmekklegan hátt, að umrædd kona, sem kölluð er tík, hafi verið undir áhrifum amfetamíns við störf sín? Og er ekki óviðeigandi að kalla helsjúka fíkniefnaneytendur ,,fíkniefnahunda" eins og gert er í fréttinni? Nóg er nú samt fyrir ólánssaman mann að berjast við djöful eiturlyfjanna þó hann sé ekki kallaður hundur í þokkabót.

Fíkniefnaleit við Rauðavatn

Hárrétt ákvörðun borgarstjóra

Hann veit nú uppá hár hvað hann er að gera hann Ólafur Sckans hjá Borginni og á einkar auðvelt með að sjá hvar skóinn kreppir í miðbænum. Þar af leiðir að þeir sem hafa verið að fjargviðrast útí karlinn fyrir að ráða Jakobb Frímann Magnússon í stól miðborgarstjóra hafa með yfirlýsingum og rakalausu kjaftabulli gert sig að auðvirðilegum ómerkingum. Eða dettur þessu fólki ef til vill í hug að Jakobb Frímann sé ekki 860 þúsund krónu maður? Þeir sem leggjast svo lágt, og hafa nú þegar lagst svo lágt, að véfengja eða dylgja með, að stuðmaðurinn ógurlegi sé ekki verðugur verklauna sinna eru annað hvort illgjörn og illkvittin kvikindi eða veruleikafirtir erkiheimskingjar, nema hvort tveggja sé.

Ég er yfirleitt brandsjúr og fullkomlega handviss um, að ákvörðun Ólafs Sckans hjá Borginni að ráða Jakobb til miðbæjarembættis er bæði nákvæm og fullkomin og auk þess stórt heillaspor í framfaraþróun borgarinnar. Jakobb Frímann mun svo sannarlega láta verkin tala og rífa miðborgina uppúr dauða og djöfli og gera hana að helgireit íslenskra menningar á hálfum mánuði. 

„Ráðning í samræmi við reglur Reykjavíkurborgar"

Al-Amji, Halim-Al, Al Gore og Alfreð

Það má með sanni segja að Abdullah Al-Ajmi hafi launað Bushstjórninni rauðan belg fyrir gráan og þakkað henni um leið fyrir góðan viðurgjörning í Guantanama með því að sprengja tvær bifreiðar, drekkhlaðnar af sprengiefni, í loft upp. Fyrr má nú gagn gera! Annars er ég að velta fyrir mér hvort þessi maður Al-Ajmi sé eitthvað skyldur þeim forstönduga sómamanni Halím-Al. Að minnsta kosti heita þeir báðir Al. Í þokkabót gætu þeir síðan báðir verið náskyldir Al Gore og Alfreð Þorsteinssyni. Þokkalegur frændgarður það, eða ....

Fyrrum fangi í Guantanamo framdi sjálfsvígsárás í Írak