Og gekk skutullinn útum trantinn á henni að framan ...

Það var vægast sagt vel af sér vikið hjá Stefáni Vagni yfirlögregluþjóni og hans mönnum vega andskotans bjarndýrslufsuna atarna. Samkvæmt mínum heimildum, sem eru mjög áreiðanlegar, var hvítabirnan skotin í rassgatið með hvalbyssu og gekk skutullinn útum trantinn á henni að framan. Mun þetta vera eitthvert glæsilegasta skot íslandssögunnar frá landnámsöld og fram á vora daga.

Það er því sannarlega mikill þjóðhátíðardagur í dag, þó vínsósa veimiltíturnar á kaffihúsunum í 101 gráti ísbjörninn krókódílstárum. 

Ísbjörninn að Hrauni dauður

Svefndrukkin kratasneypa og skutulkanónan

Það er mikið að þessi syfjaði ,,umhverfisráðherra" okkar rumskar eftir rúmlega árs værðarsvefn. En það er ekki nóg fyrir þessa voluðu kratasneypu að rumska og mæla af munni fram einhverja svefndrukkna krataþvælu. Ónei, nú duga engin vettlingatök frú ráðherra. Að ætla sér að ná kvikindinu lifandi flokkast að sjáfsögðu undir framúrskarandi barnaskap og reginheimsku. Það á að kála helvítis hvítabirninum og það stax; það þolir akkúrat enga bið! Ef menn eru svo huglausir að þora ekki að hengja skepnuna, á að skjóta hana undir eins, helst með fallbyssu eða skutulkanónu eins og hrefnuveiðimennirnir nota. Það er einfaldlega ekki hægt að bjóða fjölskyldunni að Hrauni á Skaga uppá að bjarndýrsandskotinn éti upp allt æðarvarpið hjá því og hundinn líka, meðan verið er að bíða eftir einhverjum heimskupörum sem kunna að koma útúr ráðaleysisórum umhverfisráðherra. 

Erfið aðgerð framundan að Hrauni

Teprulegu veimiltíturnar og óargaskepnan

Eins og staðan er nú í hvítabjarnarmálinu, er aðeins ein leið fær: Hengja kvikindið tafarlaust á nauðalíkan hátt og Jón skipstjóri bolvíkingur og áhöfn hans á Guðnýju ÍS gerðu hér um árið. Mjög auðvelt væri að fara á fjórhjóli uppað bjarndýrinu og smeygja snöru um háls þess og herða hressilega að. Þar með væri málið leyst og bjarnarskrattinn dauður án blóðsúthellinga. Það er auðvitað ekkert vit í að skjóta dýrið af færi með byssu, þar eð slíkur framgangsmáti hefur ekki þann sjarma sem nútímafólk tuttugustu og fyrstu aldarinnar gerir kröfu til þegar hvítabjörn skal vegin.

Svo eru það teprulegu veimiltíturnar, sem vilja svæfa óargaskepnuna og flytja hana til síns heima. Um svoleiðis landeyður og vankagemlinga er víst best að hafa sem fæst orð.

Reynt að ná birninum lifandi

Sluppu við vist á fábjánahæli í Kanada

Ég er hræddur um að Færeyingarnir sem höguðu sér eins og fífl, með danstilburðum og öðrum ólátum á flugvellinum í Toronto, megi þakka sínum sæla fyrir að vera ekki teknir úr umferð og vistaðir á fjábjánahæli. En þar sem fárvirði geysaði og sennilega fullbókað á öllum vistheimilum fyrir svona fólk, sluppu Færeyingarnir við að komast undir mannahendur. Ef ég þekki yfirvöld Toroto rétt, hefðu þeir ekki tekið á dansfíflunum með neinum silkihönskum. Og ekki hefði stoðað fyrir Færeyingana að bera fyrir sig að þeir væru Færeyingar, torontoyfirvöld hefðu ekki tekið þessháttar fyrirslátt til greina. En því miður fór svo að lokum, að Færeyingarnir komust leiðar sinnar áður en lögreglan hafði höndur í hári þeirra. 

Stigu hringdans í flugstöðinni

Siðaður og skikkanlegur maður

Það hefir löngum þótt íllt og óskynsamlegt að ónáða þann sem er að njóta góðrar tónlistar. Þessum gömlu sannindum fékk heimilisfaðirinn óvarfærni að kynnast í verki þegar honum varð á að skipta sér af tónlistarnautn nágranna síns; hann var skallaður og lúbarinn. Það verða hinum andtónlistarsinnaða heimilisföður áreiðanlega þung spor að ganga á fund nágranna síns í dag og biðja hann fyrirgefningar á ónæðinu, en það verður hann að gera ef hann vill í framtíðinni teljast siðaður og skikkanlegur maður.

Slagsmál brutust út eftir nágrannaerjur

Vill fremur rauða fána en grámyglulega hottintegla

Ég hygg, að best færi á, að núverandi landsfeður létu það alveg eiga sig að hrella Jón heitinn frá Hrafnseyri næstkomandi þjóðhátíðardag með nærveru sinni. Enda er vitað mál, að Jón hefir hina megnustu skömm á landsfeðrakraðaki þessu. Enn fremur er vitað, að hinum göfuga hrafnseyringi væri mun betur að skapi, að fá íslenska alþýðu undir rauðum fánum í heimsókn til sín á Austurvöll þann 17. júní næstkomandi, en grámyglulega hottintegla hins borgaralega valds.   

Æft fyrir 17. júní

Þjálfaður hópur hryðjuverkamanna að verki?

Fyrst akureyringum þótti viðeigandi að halda þessa helvíska Bíladaga sína var þeim ekki nema fullgott að slást við gesti sína, já, og sjálfa sig líka. Það þarf heldur enginn að vera undrandi, þó ungir, hraustir sveinar fjölmenni til Akureyrar þegar slíkt tækifæri býðst til að herja á lögregluna þar um slóðir.

Í kjölfar Bíladagaátakana á Akureyri þarf að staldra við og taka sólarhæðina. Það er varla tilviljun, að þjálfaður hópur hryðjuverkamanna geri sér ferð norður fyrir land til að efna til átaka við valdstjórnina. Þetta ískalda, grafalvarlega mál hlýtur að koma inná borð Ríkisstjórnarinnar strax eftir helgi. Það er krafa almennra, blásaklausra borgara þessa lands, að kannað verði í þaula hvort einhver tengsl séu á milli hryðjuverkamannana, sem beittu m.a. skoteldum á lögreglu Akureyra, og hinna alræmdu Al-kaída hryðjuverkasamtaka. Það er skoðun óvilhallra manna, sem vitni urðu að hildarleiknum, að mjög hafi borið á múhámeðskum tilburðum hinna terrorísku aðilja, sem sást best á því, að einn aðíljinn bar arafatískan hryðjuverkatrefil um hálsinn.

Nú þarf svo sannarlega að bergðast fljótt og hart við og leysa upp alla vafasama hópa á Íslandi með illu eða góðu. Það verður eflaust erfið prófraun fyrir dómsmálaráðherra, að vinna með skjótum hætti bug á þeim illvirkjasamtökum sem grunur leikur á að stafi hér á landi. En það má dómsmálaráðherra vita, að hann á stuðning allra sannra og sjálfstæðra íslendinga vísan í baráttunni við hryðjuverkaógnina, jafnvel þó það kosti snörp vopnaviðskipti og mannfall.  

Erfið nótt á Akureyri

Drottinn styrki og varðveiti hr. Stones í baráttunni við illþýðið

Það er óskiljanlegt hve miklu magni af blýþungu oki Guð Almáttugur lætur sig hafa að leggja á herðar störnusýslumannsins Stones á Selfossi, og hreint með ólíkindum maðurinn skuli ekki fyrir löngu hafa kiknað undan því ofurfargi, sem Hymmnafaðirinn hefur af einkennilegu örlæti sínu, úthlutað honum. En það er sama hvað á gengur, ekki haggast störnusýslumaðurinn um millimeter. Þó veröldin skjálfi, hús hrynji, jörðin opnist og mannfólkið geri hr. Stones allt til miska sem hugsast getur, stendur hann uppúr hamförunum eins og sá klettur sem síðast stendur þá veröldin hrynur.

Nú í morgunsárið berast fregnir af því að óyndishrottar hafi lagt eld að bifreiðum, svo gott sem uppí nefinu á yfirvaldi árnesinga; sömuleiðis hafi menn hr. Stones þurft að standa í stórræðum við að yfirbuga vopnaðan eiturlyfjavarg sem ók um vegi Árnessýslu með djöfulsglott á vímuðu trýninu.

Og mér er spurn: Hvað gjörir þessi óþjóðalýður næst til að ergja og hvekkja störnusýslumanninn Stones? Efna til terrorískra sprenginga í Þollákshöfn eða Stokkseyri, eða jafnvel fyrir framan höfuðstöðvar sýslumannsembættisins á Selfossi? Hér eftir kemur ekkert á óvart sem þessum óþjóðalýð dettur í hug að framkvæma í óbilgjörnum skæruhernaði sínum gegn stjörnusýslumanninum Stones, okkar mesta og besta löggærsluyfirvaldi.

Megi Drottinn Alsherjar létta okinu af herðum hr. Stones og senda honum Mick Jagger í heimsókn í staðinn.

Kveikt í bílum á Selfossi

Faðir nútíma femínisma

Hvernig má það vera að 82 ára karlódráttur, sem fyrir löngu er farinn að vega salt á grafarbakkanum, skuli vera þriggjakvenna maki? Það hefur svo sem ekki farið framhjá neinum, að Hugh þessi Hefner hefur löngum verið í miklum metum hjá fémínískum kvenréttindasamtökum um allan heim, enda af mörgum álitinn faðir nútíma-fémínísma. Hver man t.d. ekki eftir þegar Hugh var heiðursgestur landsfundar Kvennalistans sáluga? Þar flutti sá gamli slíkan tímamótafyrirlestur að gjörvallur Kvennalistinn varð að gjalti. Í fyrirlestrinum brýndi hann m.a. kvennalistakonur til að gefa sig auðhyggjunni á vald, giftast óhræddar til fjár, sækjast eftir sætum í stjórnum auðvaldsfyrirtækja, og yfirleitt að sleikja sig upp við auðvaldsfyrirkomulagið með öllum ráðum naktar sem ónaktar.

En vel á minnst: Hvað átti 82 ára karluglan að gera við súkkulaði rassinn með krossfiskinn í miðjunni? Varla hefur verið ætlast til að hann æti þessa forsmán í kökulíki? 

Súkkulaðirass í afmælisgjöf

Myndi siga á þau öllum hundum í götunni

Mikið skil ég þennan Mark Wahlberg vel, að vilja losna við jafn fáránlega nágranna og Beckhámhjónin eru. Ekki beið séra Alex Ferguson boðanna þegar hann sparkaði Davíð eins og ónýtum fótbolta burt af Óld Traffordvelli, þegar honum varð ljóst til hverskonar hjónabands Davíð hafði stofnað með ókindinni Viktóríu. Ef þessi leiðindahjón kæmu askvaðandi hingað til Ólafsvíkur og settust að í næsta húsi við mig, myndi ég umsvifalaust siga á þau öllum hundum götunnar, sem ekki eru ófáir.   

Vill losna við Beckhamhjónin