Þar til farið var að slá í hann

Nú, eitthvað varð lögreglan að gera til að koma þessum leiðindamorðum frá; og var þá ekki nærtækast að taka blaðamannsófétið úr umferð og láta það játa drápin? Ég er ansi hræddur um það. Fyrir nokkrum áratugum ætlaði frómur maður að hjálpa lögreglunni við að upplýsa innbrot í kaupfélag. Og hvað haldið þið hann hafi haft uppúr því? Ójú, hann var handtekinn og látinn dúsa í gæsluvaðhaldi þangað til farið var á slá í hann. Það borgar sig aldrei að skipta sér af glæpamálum sem lögreglan hefur tekið að sér, það hefur bara fangelsisvist í för með sér. 

Framdi morð og skrifaði um þau

Hundurinn sem þoldi ekki drukkna menn

Jaa-há ... blessuð hvolpstuskan átti þá eiganda eftir allt saman. Ég man eftir hundi sem enginn átti og enginn hafði átt. Þessi munaðarlausi hundur var ávallt mikill mannvinur, nema þegar í hlut áttu drukknir menn eða konur. Einusinni bar hund þenna að garði þar sem fermingarveisla var háð. Mikill ölvun var í veislunni og drukknastur allra var fermingabarnið sjálft, sem lá áfengisdautt bak við hús. Þegar hundurinn varð þess áskynja að fermingarveislan bókstaflega iðaði brennivínsnautn, rann á hann æði, sem leiddi til þess að hann réðist á mannsöfnuðinn sem fyrir var og linnti ekki látum fyrr en hann var búinn að bíta um það bil 30 manns til blóðs, þar á meðal föður fermingarbarnsins, en af honum beit hundurinn bæði nef og eyra. Eftir þetta sást hundurinn aldrei á þeim slóðum sem hann vann frægðarverk sitt, en talið er að hann hafi flutt sig í fjarlægan landsfjórðung þar sem hann ku hafa andast í hárri elli og saddur lífdaga.

Eigandi hvolpsins fundinn

Hinn fimmeini Sjálfstæðisflokkur og byltingin

Það er svo sem ágætt útaf fyrir sig að fylgi Sjálfstæðisflokksins dragist saman, gallinn er bara sá, að Sjálfstæðisflokkurinn er margskiptur flokkur þar sem Sjálfstæðisflokkurinn er höfuðból með fjórar hjáleigur í kringum sig sem heitan nú um stundir Samfylking, ,,Vinstrihreyfingin" grænt framboð, Framsóknarflokkur og Frjálslyndi flokkurinn. Á guðfræðilegu máli má með sanni segja að Sjálfstæðisflokkurinn sé fimmeinn, á meðan guðdómur kristinna manna er bara þríeinn. Af því má draga þá ályktun, að guðdómur Sjálfstæðisflokksins sé þeim mun æðri og merkilegri himnafeðgum og Heilögum Anda sem fimm er tveimur einingum stærri en þrír.

Um lítilmennin sem búverka á hjáleigum Sjálfstæðisflokksins má eflaust margt segja, en því miður verðskulda þau ekki langa orðræðu; drýldnir karlar og kerlingar verða seint merkilegra umræðuefni en veðurbarðir girðingarstaurar á túnum höfuðbólsins.

Aftur á móti undrar mig mest, að nokkur lifandi maður skuli ljá sjálfstæðisflokkunum fimm stuðning í skoðanakönnunum, hvað þá alþingiskosningum.

Á Íslandi, eins og víðar, þurfum við fyrst og síðast byltingu en eingar refjar. Alþýða landsins þarf og verður að rísa upp og steypa af stóli hinum fimmeina guði Sjálfstæðisflokksins og ganga svo rækilega frá honum, að hann láti aldrei kræla á sér aftur fremur en Glámur eftir að Grettir handfjatlaði hann á sínum tíma

Fylgi Sjálfstæðisflokksins minnkar í könnun

Dekurdýr borgarastéttarinnar

Alla tíð hefur borgarastéttin, þá ekki síst hin Íslenska, haft sérlegt dálæti á ,,listamönnum" á borð við við alheimssöngvarann Garðar Hólm, sem heillaði meðal annars páfann í Róm og fleiri stórhöfðingja með dýrðarrómi sínum í sönglögum eins og ,,Austan kaldinn á oss blés" og ,,Kindur jarma í kofunum." Síðan Garðar Hólm andaðist á almenningsklósettinu í Reykjavík hefur hann endurfæðst hvað eftir annað. Nú síðast virðist þessi margdáni útrásarlistamaður hafa upprisið í Ólafi nokkrum Elíassyni, sem nú um stundir ber hróður Íslands hvað hæst í listinni á veraldarvísu.

Það fer ekki á milli mála að fíflagangurinn í Ólafi þessum nær innað innstu listrænu hjartarótum hinnar úrkynjuðu Íslensku borgarastéttar, afkomendum Gúðmúndsen sáluga hver mestur var góðgerðarmaður Garðars Hólm um hans hástemmdu daga.  

Fossar vígðir á fimmtudag

Þá níðingurinn verður kviksettur

Meðferðin á hvolpinum í Kúagerði er djöfullegri er orð fá lýst Og satt að segja á sá sem gróf kvikindið lifandi fátt betra skilið en að verða kviksettur sjálfur. Ég geri ráð fyrir, ef svo vel verkast að þrjóturinn verði með lífsmarki þegar hann verður jarðaður og vakni til lífsins niður á sex fetunum, að honum verði hugsað til hvolpsins sem hann gróf lifandi í Kúagerði á sínum tíma. En sem betur fer verður þá enginn til staðar að bjarga hundsníðingun hvað svo sem hann öskrar neðanjarðar. Og þó svo honum takist að sparka gaflinum úr kistu sinni mun það ekki koma honum að nokkru gagni. 

Dýraníðings leitað

Persónunjósnir Sjálfstæðismanna

Það er ekki á þá logið, Sjálfstæðismennina, hvort sem þeir heita Georg Bush eða eitthvað annað, að þeim er í blóð borin óslökkvandi árátta til að hlera síma, ásamt að halda uppi njósnum um almenna borgara á allan hátt með sjúklegu snuðri. Skemmst er að minnast uppljóstrana Kjartans Ólafssonar fyrrverandi ritstjóra og alþingismanns um njósnastarfsemi Sjálfstæðisflokksins á árum áður. Og auðvitað brást Björn Bjarnason við með því að afsaka Flokkinn sinn með því að símar Kjartans og fleiri hefðu verið hleraðir vegna skoðanna þeirra og gjörvallur Sjálfstæðisflokkurinn tók undir. Barnalegur maður Björn Bjarnason. Það var nefilega þannig í pottinn búið, að á sama tíma og Sjálfstæðismenn gagnrýndu Sovétmenn fyrir að snuðra um fólk gerðu þeir sjálfir hið sama. Nú mætti ætla að liðsmenn Sjálfstæðisflokksins blygðuðust sín fyrir ómennskuna, en það virðast þeir hvorki vilja né kunna og þar af leiðandi er ekki til neins að segja þeim að skammast sín fyrir tiltektirnar.   

Aukin heimild til símahlerana

Forhert en framúrskarandi nærbuxnaárátta Ísfirðinga

Ísfirðingar hafa löngum getið sér gott orð fyrir að vera framúrskarandi nærbuxnaþjófar. Og alveg er þeim sam hvort nærbuxurnar sem þeir stela eru hreinar eða skítugur, nýjar eða gamlar. Hinsvegar er nokkuð á huldu hverjar hvatir liggja að baki þessari frumlegu iðju Ísfirðinga, en talið er að þær tengist eitthvað sexúölum rétttrúnaði þar vestra og ýmsum afbrigðum af broslegu typpakomplexum þeirra.

Gott væri að einhver greinargóður heimamaður gæfi nánari skýringar á hinni forhertu nærbuxnaáráttu Ísfirðinga.

Þjófur leikur lausum hala á Ísafirði

Helvítis endemi

Helvítis endemi eru þessir þrjótar í Covent Garden, að reka kerlingarangann hana Debóru af höndum sér fyrir hlunkslegt ásigkomulag. Ég hefi fram að þessu haldið að ópérusöngvarar þyrftu bara að geta öskrað nógu ámáttlega, fita eða hor kæmi þeim djöfulskap ekkert við.

En nú hefur Debóra snúið við blaðinu, kvatt fituskvapið og lítur nú út eins og slægður þorskur um borð í ísfisktogara. En djöflana í Covent Garden ætti að snúa úr hálsliðnum fyrir framkomuna við Debóru. 

Of feit óperusöngkona snýr aftur eftir megrun

Uppvakningum og hvolpum sigað á Samfylkinguna

Hvaða helvítis uppvakningur er þessi Jón Gunnarsson, sem sagður er þingmaður Sjálfstæðisflokksins? Ég hefi bara aldrei heyrt minnst á þann huldumann fyrr en nú. En sennilega er þarna um að ræða einn af þessum þingmönnum Íhaldsins sem hafa þann starfa að vera fyrst og fremst áskrifendur að launum hjá ríkinu. 

En nú hefir Jóni þessum verið falið það hlutverk að bauna óþrifapillum á Samstarfsflokkinn, sem hét reyndar Samfylking síðast þegar ég vissi. Sennilega verða fleiri labbakútar gerðir út af örkinni á næstunni til að væla opinberlega undan meinlausum og værðarfullum samfylkingargörmum. Og sjálfsagt gera flestir sér grein fyrir hverjir það eru sem standa fyrir því að siga hvolpunum á hæla ,,Samstarfsflokksins."

Harðari tónn í garð samstarfsflokksins

16 þúsund dauðyfli og vandræðaskáld á Strútstúni

Það er hreint unaðslegt, að 16.000 manns hafi komið saman á Strútstúni í Kópavogi í dag til þess að láta bæjarstjórann hrauna yfir sig. Ef þetta er rétt, sem ég vona svo sannarlega ekki, er óhætt að segja að 16 þúsundir Kópavogsbúa kunni ekki að sjá sóma sinn, en séu þess í stað albúnir að hlaupa útá Strútstún til að kyssa vöndinn í hvert skipti sem bæjarstjórinn sveiflar svipunni. Ef kjósendur í Kópavogi eru almennt jafn mikil dauðyfli og vandræðaskáld og þessi 16 þúsund á Strútstúni, fær ekkert bjargað þeim frá að sitja uppi með bæjarstjórann Gunnar I. Birgisson til eilífðarnóns. En það er svo sem gott á þá, fyrst svona er í pottinn búið.  

16 þúsund manns á Rútstúni í Kópavogi