Til hvers að hlaða tuskuleppum utaná sig?

Það er sannarlega aðdáunarvert að Jóhanna Guðrún Jónsdóttir skuli hafa verið í bláum kjól þegar hún æfði söng á sviðinu í Moskvu í gær. Þetta minnir mann dálítið á þegar Siggi var í síðum buxum og Gunna í bláum kjól einsog sungið er á jólunum. Þó held ég væri affarasælast fyrir íslensku júrókeppendurna, uppá frægðina, að syngja sönginn sinn öldungis klæðalaus í keppninni sjálfri. Og til hvers á fólk svosem að vera að hlaða tuskuleppum utaná sig? - það er bara til að fara úr þeim aftur, eska, eins og matsveinninn sagði við hjákonu sína. Svo má ekki gleyma að klæðalausir íslenskir stórsöngvarar í júrókeppni myndu ríma svo skelfing vel við nýju fötin sem íslensku útrásarvíkingarnir skörtuðu þegar hæst stóð í stönginni hjá þeim. En ætli Jóhanna Guðrún Jónsdóttir að grenja evruvísjónsönginn sinn kappklædd í bláan kjól verður víst svo að vera, en þá mun Ísland líka lenda í neðsta sæti eins og venjulega.

Jóhanna Guðrún söng í keppniskjólnum

Tilheyrir Halldórsarmi Framsóknarflokksins

Fyrir fáeinum dögum sagði frómur maður og grandvar mér að Barakkur Óbama, forseti Bandaríkjanna, væri framsóknarmaður. Síðar í samtalinu bætti hann því við, máli sínu til stuðnings, að ef Barakkur ætti heima á Íslandi tilheyrði hann Halldórsarmi Framsóknarflokksins. Og auðvitað trúði ég öllu því sem þessi yndislegi spjallvinur minn fullyrti um Barakk og Framsóknarflokkinn, þó það nú væri. En þegar Barakkur forseti tekur uppá að hóta þegnum sínum niðurskurði til hermála er ég ekki jafn sannfærður um að pilturinn heyri Halldórsarmi Framsóknarflokksins til. 

Obama boðar niðurskurð

Sjúklegt einelti af geðkrabbategund

Djöfull er nú alltaf nöturlegt þegar einstaklingar, sem eiga að heita fullorðið fólk, verða fullkomlega helteknir af einni alsherjar þráhyggjustarblindu. En þegar þráhyggjustarblindan brýst út í eineltistilburðum og fúllyndi gagnvart góðu fólki má segja að sjúkdómurinn sé kominn á alvarlegt stig. Á fagmáli er svona kvilli kallaður ,,sálarmyrkvi" og er hvimleitt afbrigði af geðkrabba, sem lýsir sér eitthvað á þá leið að sjúklingurinn fer að líkjast blóðgrimmum rakka sem situr um að bíta húsbónda sinn hvenær sem færi gefst á.

Og nú er semsé orðið lýðum ljóst að Grasa-Gudda Samfylkingarinnar í Kópavogi hefir komið sér upp áunnum sálarmyrkva í garð Gunnars I. Birgissonar borgarstjóra í Kópavogi; hún er með manninn gjörsamlega á heilanum bæði að nótt sem degi. Allt það góða sem Gunnar borgarstjóri gerir, en allt sem hann gerir er gott, lítur Grasa-Gudda á sem spillingu af verstu tegund. Nú síðast gerir hún atlögu að Gunnari vegna viðskipta Kópavogsborgar við fyrirtæki í eigu dóttur Gunnars. Sveimérþá ef hægt er að sökkva dýpra í forarvilpu lágkúrunnar. Ef fram heldur sem horfir verða heilbrigðisyfirvöld í Kópavogi að skerast í leikinn og stöðva einelti hinnar heilsulausu samfylkingarmaddömu á hendur Gunnari I. Birgissyni; maðurinn er hættur að geta um frjálst höfuð strokið fyrir ómálefnalegum svarragangi kerlingarinnar og ofstopa.

Við skulum biðja algóðan Guð um að þessum ósköpum linni.

„Kom verulega á óvart“

Graðhestajafninginn á sorphauga sögunnar

Að sjálfsögðu munu Steingrímur J. og Jóhanna fyrna kvótagemlingaauðvaldið á þann hátt sem það hefur til unnið. Nema hvað? Og ég geri ráð fyrir að þau láti kné fylgja kviði og leggi frumvarp til laga fram á vorþingi þar sem kveðið verður á um að LÍÚ-samtökin verði leyst upp og starfsemi þeirra bönnuð. Á haustþinginu á ríkisstjórnin síðan að stíga skrefið til fulls og afgreiða Sjálfstæðisflokkinn á sama hátt og LÍÚ-óskapnaðinn. Ef við viljum búa í siðaðra manna þjóðfélagi verður að uppræta öll helstu arðráns- og sóðabæli landsins af fullri einurð. Á nýju Íslandi sósíalismans verður ekkert pláss fyrir graðhestajafning eins og Samherja, Granda og önnur slík fyrirbæri. Þeirra framtíðarheimili verður á sorphaugum sögunnar.

Fyrningarleið víst farin

Þvílík býsn og villuboðskapur

Fljótt á litið virist Níels Hafsteinsson Danskennari Til 30 Ára heldur betur vera utan við sig og austan. Ég hefi að minnsta kosti ekki lesið önnur eins býsn í háa herrans tíð og ummæli Níelsar Danskennara þess efnis að sá sem ekki geti dansað verði utangátta í samfélaginu. Hefur manngarmurinn aldrei heyrt þess getið að fólk hafi dansað sig út úr samfélaginu? Hann hefur að minnsta kosti ekki veitt því eftirtekt að íslensku auðvaldsstéttinni tókst af dæmafáu harðfylgi að stíga djöfladans frjálshyggjunnar svo skart að nú stendur Ísland utangátta,eitt og yfirgefið, í samfélagi þjóðanna. Fyrir mína parta frábið ég mér boðskap og kenningar Níelsar Hafsteinssonar Danskennara Til 30 Ára. 

Dansað af lífi og sál

Óvönduð blaðamennska á The Guardian

Það engu logið með það að Vestfirðir séu einhver fallegasti og merkilegasti hluti landsins. Hinsvegar hefur hinu veleðla dagblaði The Guardian orðið hryllilega á í messunni í upptalningu sinni á því merkilegasta sem fyrirfinnst þar vestra. The Guardian dregur fram Finnboga á G-strengnum, reiðtúr kringum Drangajökul og fuglagarg í Látrabjargi, svo eitthvað sé nefnt, en láist alveg að minnast á Jón Herbertsson sem vann sér til frægðar í síðustu Alþingiskosningum að vera eini maðurinn á gjörvöllum vestfjarðakjálkanum sem að kaus Sjálfstæðisflokkinn. Jafn staðfastur vestfirðingur hefur ekki verið uppi síðan Jón sálugi Sigurðsson frá Hrafnseyri leið.

Fyrsti G-strengur heims á Vestfjörðum

Glæpsamlegt ábyrgðarleysi

Svo sem margsannast hefur er stórhættulegt að stunda hjólreiðar, og af öllum reiðhjólakúnstum er langhættulegast að hjóla í vinnuna svo sem kunnugt er. Í annálum má finna mörg hræðileg dæmi um hroðalega útreið hjólreiðamanna; þeir hafa hjólað niður börn og gamalmenni; lent undir trukkum og strætisvögnun; hitt annað hjólreiðafólk og farið að drýgja hór með því; rennt sér á ofsahraða á girðingar og ljósastaura með hlálegum afleiðingum. Þannig má áfram lengi telja. Af framantöldum sökum er hrein glæpamennska að hvetja fólk til að stunda hjólreiðar og réttast væri að sækja þá aðila til saka sem standa að slíku ábyrgðarleysi. Ég vona heilshugar að Steingrímur J. og Jóhanna stigi skrefið til fulls og setji blátt bann við notkun reiðhjóla inn í stjórnasáttmálann sem þau eru að semja þessa sagana.

Aldrei fleiri sem hjóla í vinnuna

Frjálshyggjulúserar að aðstoða frjálshyggjuæskuna?

Svo ómerkilegt sem það er, þá sást hópur af frjálshyggjuungum úr Heimdalli á vakki í Grímsnesinu einhverntímann í dag. Þó að þessi tegund ungsveina sé endranær upprifin og kunni að ganga í takt þá er borin von að þeir hafi þá krafta í kögglum sem útheimtast til að bera á milli sín 40 tommu flatskjá á milli herbergja. Þó má vera að einhver fullorðinn hafi rétt þeim hjálparhönd við burðinn því vitað er um nokkra roskna frjálshyggjulúsera sem hafa fátt annað að gera en að aðstoða hina aðþrengdu frjálshyggjuæsku við að framkvæma hugsjónir sínar.

	Fjörutíu tommu flatskjá stolið
Ábyrgðarmaður færslu Tenging við þessa frétt hefur verið rofin vegna kvartana.

Telja það jafngilda grófri móðgun

Í borgarstjórn Reykjavíkur hafa ævinlega setið framúrskarandi kempur og öðlingar sem í engu hafa mátt vamm sitt vita. Svo heppnir eru reykvíkingar, nú sem endranær, að hafa á að skipa aldeilis mergjað sómafólk í bæjarstjórn sinni, gamansamar persónur og óspilltar sálir. Nú dettur þessum greyjum, sem stundum geta verið seinheppin, í hug að einhverjar bæjar- og borgarstjórnir í útlöndum vilji slá til og ganga í ,,alþjóðarsamtarf" við hina frægu borgarfulltrúa Reykjavíkurborgar. Þessi kostulega hugdetta Hönnu Birnu, selskapsstjóra í Ráðhúsinu, og hennar fólks er ekki síst brosleg fyrir þær sakir að borgarstjórn Reykjavíkur er enn rúmliggjandi og stórheilsulaus eftir REI-vírusinn illvíga sem gekk nær að borgarstjórninni dauðri fyrir fáeinum misserum. Ég er mest hræddur um að sveitastjórnir í öðrum löndum telji það jafngilda grófri móðgun ef borgarfulltúarnir í Reykjavík gera alvöru úr gamni og fara að senda þeim beiðnir um alþjóðasamstarf. Útlendingar líta nefnilega þessa dagana á íslenskt stjórmálafólk sem samansafn af illa þefjandi pestargemlingum sem hættuleg tsé að koma nærri     

Borgarfulltrúar vilja alþjóðasamstarf

Sjakalarnir á alþýðukontórunum

Það er naumast hann finnur til sín í dag, 5. maí, yfirskrifstofusjakalinn á ASÍ kontórnum, sem var baulaður um koll þegar hann reyndi að koma ESB-boðskap sínum á framfæri í hátíðar- og barátturæðu á Austurvelli þann 1. maí síðastliðinn. ,,Það er ekkert við okkur að tala ef ekki verður gengið í þessar bráðaaðgerðir, helst strax á morgun" segir þessi innantómi vindbelgur eins og einhverjir hafi yfir höfuð lyst á að eyða orðum að honum og Kristjáni í Keflavík. Hvar í andskotanum voru þessir ómerkilegu baulurassar allan frjálshyggjutímann, að maður tali nú ekki um síðustu tvö til þrjú árin fyrir auðvaldshrunið? Jújú, iðulega sást til þessara kynlegu baráttujaxla hvar þeir dilluðu skottum sínum uppvið gilda leggi Davíðs Oddssonar, Halldórs Ásgrímssonar og annarra ámóta snillinga. Og hvar héldu fyrrnefndir stórsjakalar verkalýðsforystunnar, Gylfi Arnbjörns og Krisján í Keflavík, til þegar alþýða manna gerði byltingu síðla janúar í vetur? Að sjálfsögðu skriðu þeir eins og stéllausir hanar undir eikarpúltin sín og höfðu þar vetursetu. Það er loks núna, þegar farið er að vora, að Gylfi og hans helstu giljagaura þora að stinga út nefjunum og eru þá bara helvíti góðir með sig; brúka belging og hortugheit, að ógleymdum ESB-söngnum góða, og halda sjálfsagt að þeim sé óhætt. En þar fara skrifstofusjakalarnir villir vega því önnur bylting liggur í loftinu og þegar hún brestur á er hætt við að eikarpúltin í Alþýðuhöllinni við Sætún 1. í Reykjavík verði þein sama góða skjólið og á byltingardögunum í vetur.

ASÍ vill bráðaaðgerðir á morgun