Hryllingsóperan Finnur í græðgislandi

Mikið er nú viðkunnanlegt að Framsóknarflokkurinn í Reykjavík sé að opna kosningaskrifstofu í dag með ræðuhöldum og skemmtidagskrá. Það verður áreiðanlega ósköp notalegt að hlýða á rokkarana úr Borgarholtsskóla flytja nokkur númer úr söngleiknum um Lísu í Undralandi. Þá verður ekki síður upplífgandi að heyra sjálfann Framsóknarkórinn syngja valdar aríur úr hryllingsóperunni,, Finnur í græðgislandi", sem fór eins og menn muna, frægðarför um Ísland fyrir fáeinum árum.

Nú, svo verða frambjóðendur Framsóknaflokksins á svæðinu með blöðrudýr, en það munu vera fyrrverandi ráðherrar flokksins. Hinsvegar ku næsta erfitt orðið að halda lofti í umræddum frafsóknarráðherra-blöðrudýrum sökum þess hve götótt þau eru orðin og músétin og sum þeirra auk þess þung á sér af offylli eftir græðgisvæðinguna miklu þegar Halldór og Finnur léku aðalhlutverkin fyrir hönd Framsóknarmaddömunnar heitinnar.

Að öllu samanlögðu er eitthvað óhugnarlega móðuharðindalegt við að Framsóknarflokkurinn skuli enn þann dag í dag, á þí herrans ári 2010, vera að opna kosningaskrifstofur.  

Framsókn opnar kosningaskrifstofu

Fémínískar systur slái skjaldborg um Steinunni Valdísi

Illa trúi ég því að efri-millistéttarfémínístarnir bregðist ekki til varnar vinkonu sinni Steinunni Valdísi, sem á undir högg að sækja um þessar mundir. Engann skyldi undra, þó hinar fémínísku systur Steinunnar, með Sóleyju Tomm og Ingibjörgu Sólrúnu í fararbroddi, hysji uppum sig brækurnar annað kvöld og slái skjaldborg um heimili hennar til að bægja frá kumrandi karlasvínum í mótmælahug. Enda eiga þessir groddalegu karlrembubelgir ekkert með að abbast uppá fémíníska stjórnmálaskörunga af kvenkyni, þó svo að þær hafi þegið myndarlega styrki frá auðvaldinu.

Mótmælt við heimili þingmanns

Bjarni fær ekki hvaða umboð sem er

Það hlýtur að era hægt að láta Bjarna fá eitthvert andskotans umboð. Hann gæti, trúi ég, orðið þokkalegur umboðsmaður hljómsveita, t.d. Ljótu Hálfvitanna. Nú, bílaumboð færi Bjarna ekki vel, en umboð til að flytja inn sárabindi og aðra slíka vafninga kæmi til greina. Ekki kemur til mála að gera þennan hrunasvein Sjálfstæðisflokksins að umboðsmanni byskubs, því hann væri vís með að flækja Þjóðkirkjuna í einhver háskaleg krosseignatengsl og veðsetja byskubinn fyrir skuldabréf frá Fons eða Wernersbrothers með veði í bréfunum sjálfum.

En ef Bjarni óskar eftir umboði til að leggja Sjálfstæðisflokkinn niður, er það alveg sjálfsagt. Enda eru landsmenn unnvörpum að komast á þá skoðun, að umræddur flokkur sé endalaus uppspretta sjónhverfinga, spillingar og glæpa og þar með sú hægdrepandi meinsemd sem þjóðarlíkaminn verður að losna við sem fyrst ef hann á ekki að andast fyrir aldur fram.

Bjarni vill fá nýtt umboð

Sósíalískt þjóðfélag er það sem koma skal

Það er hárrétt hjá Steingrími, að Bjarni Benediktsson ætti að rifja upp hernig Icesave er tilkomið. Og það eru fleiri en Bjarni sem ættu að hressa uppá heilasellurnar hvað varðar icsave-glæpinn og aðra stigamennsku sem fékk að vaða uppi á frjálshyggjutímabilinu 1991 til 2009. Eins og komið hefur fram, þá er skýrsla Rannsóknarnefndar Alþingis einn alsherjar áfellisdómur yfir Sjálfstæðisflokknum og liðsmönnum hans. Í því ljósi væri eðlilegt, að Sjálfstæðisflokkurinn og kjósendur hans væru látnir borga skaðann af umræddu frjálshyggjutímabili. Og auðvitað tækju auðvirðilegu hækjurnar, Framsókn og Kratar, þátt í að greiða glæpinn á einhvern hátt.

En þó að Rannsóknarskýrsla Alþingis felli alvarlegan dóm yfir Sjálfstæðisflokknum, láist henni alveg að geta þess, að grunnurinn að Hruninu mikla, rótin að óförunum, er ekki minni ismi en sjálfur kapítalisminn. Sem segir okkur, að skýrslan er þrátt fyrir allt borgaralegur samsetningur og okkur ber að umgangast hana sem slíka.

Ef þjóðinni er mjög umhugað að gera Hrunið rækilega upp og ganga svo frá hnútunum, að slíkir hlutir endurtaki sig aldrei, verður hún að skipta algjörlega um þjóðfélagskerfi, afsegja kapítalismann og fleygja honum útí hafsauga og taka upp sósíalískt þjóðfélagskerfi í staðinn. Það er hið eina eðlilega svar við Hruninu, Sjálfstæðisflokknum, Framsókn og Krataselskapnum.     

Engin fyrirheit gefin

Lausaganga sjálfstæðismanna ólíðandi

Þó að lausaganga grimmra hunda sé hvimleið þá er lausaganga ágjarnra sjálfstæðismanna mikið ámælisverðari. Það er vitað að búrtíkur auðaldsins hafa um áratugaskeið smogið eins og rottur um banka, lífeyrissjóði og aðrar fjárhirslur landsmanna og étið og nagað allt sem fyrir þeim hefur orðið. Hæstum hæðum náði þessi plága í október 2008, þegar í ljós kom að helvítis ófétin voru búin að éta þjóðina svo gott sem útá gaddinn. Þá kom semsé í ljós og lausaganga þessara óféta hafði orsakað gjaldþrot fjölda banka, sparsjóða, seðlabankans og ríkissjóðs auk aragrúa einstaklinga og heimila. Hefur, samkvæmt skýrslu Rannsóknarnefndar Alþingis, annar eins óþverri ekki gengið yfir landið síðan í móðuharðindunum miklu á átjándu öld.  Af því má sjá, að lausaganga venjulegra hunda með fjóra fætur og eitt skott er ekki neitt neitt miðað við háskalega lausagöngu óseðjandi sjálfstæðismanna og búrtíka þeirra. 

Kvartað yfir lausagangi hunda

Flokkurinn lagður niður á aukalandsfundi

Það er gleðilegt að höfuðpaurar Sjálfstæðisflokksins skuli ætla að sjá að sér og leggja til við aukalandsfund, að Flokkusinn verði lagður niður, áður en til þess kemur að hann verði bannaður með lögum frá Alþingi, sem félagi Ólafur Ragnar Grímsson myndi staðfesta með ánægju.

Vitanlega sjá allir, sem á annað borð eru með fullu viti, að leikur Sjálfstæðisflokksins er gjörtapaður; það komst nefnilega uppum strákinn Tuma því þegar allt kom til alls var Sjálfstæðisflokkurinn ekki stjórnmálaflokkur í þeirri merkingu sem fólk leggur almennt í það orð, heldur sóðaleg peninga- og valdagræðgissamtök, fleytifull af hættulegum gallagripum á bæði borð. En það ar ekki fyrr en auðaldsmafían var komin upp að vegg og öll spjót stóðu á henni, að fór að rofa til milli eyrnanna á höfuðpaurum Flokksins og þeir sáu að þeim voru allar bjargir bannaðar.

Það verður mikið um dýrðir þegar Sjálfstæðisflokkurinn verður lagður niður í sumar, eða öllu heldur lógað, og hræið af honum urðað í sorpeyðingarstöðinni að Fíflholtum á Mýrum. 

Boða til aukalandsfundar

Barátta stjörnusýslumannsins við þrjóta og þorpara ber árangur

Þeir halda það, þorpararnir, að þeir geti leyft sér hvað sem í umdæmi sjálfs stjörnusýslumannsins Stones í Árnessýslu. En þar skjáltlast böluðum þrjótunum illilega, því stjörnusýslumaðurinn Stones er með haukfrán augu, mörg á hverjum fingri, og er ekkert uppá það kominn að gera gælur við ósvífna götustráka og annað hraksmánarlegt illþýði. Enda eru glæpir orðnir afar fátíðir í Árnessýslu nú orðið. 

Ef ég þekki stjörnusýslumanninn rétt, þá hefur hann hýtt dópgöltinn, sem ók á 136 kílómetra hraða, vel og vandlega með eigin hendi, ekki síst fyrir það forkastanlega framferði að reyna að fela sig bak við öskutunnu við hliðina á samkomuhúsinu á Eyrabakka. En svona eiga yfirvöld náttúrulega að láta höndur standa fram úr ermum og refsa afbrotajúðum svikalaust.

Mikið væri óskandi, að ríkisstjórnin hefði vit á að gera stjörnusýslumanninn Stones að dómsmálaráðherra. Sá væri nú ekki lengi að uppræta hrunaglæpalýðinn og koma honum inn fyrir rimlana

Á ofsahraða undir áhrifum fíkniefna

Stórkostlegt þjóðfélagslegt vandamál

Ekki er að sjá að hinir ,,þrír nýju þingmenn" sem sagt er að taki sæti á Alþingi eftir helgina, eigi meira erindi á þing en þeir sem hurfu af vettvangi fyrir helgina. Það er ljóst að Sjálfstæðisflokkurinn er gjörónýtur niður í rót og á varamannabekknum húka samskonar spillingarpésar og þeir sem fengið hafa að sprikla í aðalliðinu.

Raunar er Sjálfstæðisflokkurinn meir en gjörónýtur; hann er stórkostlegt þjófélagslegt vandamál, sem nauðsynlegt er að taka til einhverskonar gjaldþrotameðferðar. Þegar fólk fær krabbamein er reynt að nema meinsemdina burt með skurðaðgerð, sem fylgt er eftir með lyfja- og geislameðferð. Á sama hátt og krabbameinsæxli eru meðhöndluð á þjóðin að hreinsa sig af þeirri lífshættulegu óværu sem Sjálfstæðisflokkurinn er.  

Þrír nýir þingmenn

FFF og ormaveika tíkin í Skotakoti

Engan þarf að undra að Flokksráðs- Formanna og Frambjóðendasamkoma (FFF) Sjálfstæðisflokksins skuli lýsa yfir eindregnum stuðningi við formanninn Bjarna Benediktsson. Það hefði heldur ekki komið á óvart þó FFF hefði lýst yfir jafn eindregnum stuðningi við Davíð Oddsson og Gjeir Haaarde. Og hefði verið borin upp stuðningsyfirlýsing á fundinum við Hanez okkar hérna Holmstone og ormaveiku tíkina í Skotakoti, hefði hún einnig verið samþykkt með eindregnu lófaklappi og húrrahrópum.

Í bókinni Atómstöðin, eftir Halldór Laxness, kemur félag eitt við sögu hvers nafn er skammstafað FFF, alveg eins og Flokksráðs- Formanna og Frambjóðendasamkoman, sem haldin var í Reykjanesbæ í morgun. FFF. Reyndar heitir stofnunin ,,FFF" í Atómstöðinni ekki Flokksráðs- Formanna- og Frambjóðendasamkoma, heldur FaktúruFölsunarFélagið, FFF. En á þessum tveimur FFF-fyrirbærum er aðeins örlítill stigsmunur en ekki eðlis.

Lýsa yfir stuðningi við Bjarna

Krafan á hendur sjálfstæðismönnum er ...

Flokkurinn minn, Flokkurinn minn. Ekki voru Torgerður Kattrín og félagar mikið að hugsa um orðspor Flokksins síns þegar græðgisvæðingin stóð sem hæst. Hinsvegar er þessum ræflum nokkur vorkun því græðgi og ójöfnuður eru tvær af helstu grunnstoðunum í eðli Flokksins, sem er langtum æðri Guði Almáttugum í vitundarlífi Torgerðar og annarra sjálfstæðishrossa; hann er einhverskonar ofurjólasveinn sem gefur börnum sínum gjafir í krafti eðlis síns. Ef þessi ofurjólasveinn geyspar golunni verður grátur og gnístran tanna í ríki græðgis- og ójafnaðarsinna, ekki síðri en gerist og gengur í heimkynnum fordæmdra í sjálfu Víti.

En það er ekki nóg að Torgerður segi af sér sem varaformaður Sjálfstæðisflokksins og taki sér leyfi frá þingstörfum ásamt Illuga Gunnarssyni. Krafan á hendu sjálfstæðismönnum er að þeir leggi Flokkinn sinn niður orðalaust, áður en hann verður bannaður með lögum eins og hver önnur illræðis- og glæpasamtök.

Skýrsla Rannsóknarnefndar Alþingis sannar svo um munar hvert eðli samtakanna, sem kenna sig við sjálfstæði, er. Skýrslan er einn alsherjar áfellisdómur yfir þessum illræmda flokki og í raun ákall um að hann verði fjarlægður af sviði íslenskra stjórnmála.

Þorgerður stígur til hliðar