Lögreglan á Selfossi felldi jólasvein í fyrra.

Þarna er déskotans jólasveinunum rétt lýst. Þeir eru nefnilega upp til hópa ódámar og hryðjuverkasveinar, það liggur í eðli þeirra. Enda ekki við öðru að búast af mönnum sem eru undan öðrum eins skaðræðisgripum og Grýlu og Leppalúða, heimsfrægum mannætum og ofbeldisfólum svo sem glöggt má sjá í ljóði Jóhannesar frá Kötlum.

Það þarf því engum að koma á óvart að tveir af sonum dáindishjónanna, Grýlu og Leppalúða, hafi látið sverfa til stáls við vaktmann sænsku komungsfjölskyldunnar, misþyrmt honum og haft af honum byssuna. Hvað jólasveinar ætla að gera við byssu er ekki beinlínis fyrirsjáanlegt á þessari stundu, en því miður hafa þeir, ef ég þekki þá rétt, ekkert fallegt í huga. Sennilega ætla þeir að nota hið konungleg skotvopn til að auka matarforðann í búrinu á Grýlustöðum og allir vita hverskonar matvæli eru þar mest í hávegum höfð.

Og dykkfelldir eru þessir sveinar og andstyggilega kvensamir og sjást ekki fyrir í þeim efnum, svo sem kokkálaðir eiginmenn mega best vita.

Í fyrra felldi lögreglan á Selfossi jólasvein sem gerði sig líklegan til að brjótast inn til konu nokkurrar sem hann bar girndarhug til. Vonandi tekst lögreglunni í Stokkhhólmi jafn vel upp við að vinna á sínum jólasveinum og stéttarbræðrum þeirra á Selfossi. 

Jólasveinar réðust á vaktmann við sænsku höllina

Þáttur vatns í kristnum dómi

Í hinum kristna dómi kemur vatn mikið við sögu. Þetta röru lærisveinarnir til fiskjar útá Genesaretvatn, sem er mikill sjór og gjöfull. Það var líka einmitt á Genesaretvatni sem Frelsarinn hastaði á útsynninginn og brælan koðnaði niður og hann datt á með dúnalogn svo að lærisveinarnir gátu haldið áfram að draga netin sín. Og á sama vatni spásséraði Kristur eins og hann hefði fast land undir fótum, en Pétur kapteinn sökk á augabragði uppfyrir haus þegar hann ætlaði að leika vatnsgöngu meistara síns eftir.

Það er því sannarlega mikill búhnykkur fyrir þá í Neskirkju að fá vatnsleka í musteri sitt á sjálft aðfangadagskvöld; eru þeir sannarlega öfundsverðir af slíku Drottins tákni. Og vonandi hafa kennimenn Neskirkju getað gengið á vatninu sem heiðraði gólf þeirra í kvöld og ennfremur að þeim hafi tekist að hasta svo kröfuglega á lekann að hann hafi stöðvast svo syndugur söfnuðurinn færi sér ekki að voða í allri þessari rokna bleytu þegar hann mætti til aftansöngs.

Vatnsleki í Neskirkju

Frumlegir jólasiðir og ófrumlegir

Sem betur fer er ekki enn orðið alsiða að gleðja náungann á aðfangadag jóla með því þruma af haglabyssu á útidyrnar hjá honum. Þó má segja að þessi jólagjöf sé í vissum skilningi frumleg, þó hún sé útaf fyrir sig býsna harkaleg og töluvert hávaðasöm ef ekki er notaður hljóðdeyfir á skotvopnið.

Í gærkvöldi og fram eftir nóttu var all sukksamt á heimili sæmdarhjónanna, frú Ingveldar og Kolbeins Kolbeinssonar skrifstofustjóra, og beinlínis orustugnýr undir morgun. Mest var þó um dýrðir þegar frú Ingveldur taldi sig hafa staðið Kolbein eiginmann sinn að hjúskapar- og siðferðisbroti inni í búri með þeim illa kvenmanni Máríu borgargagni, sem undanfarið hefur lífgað uppá heimilslíf þeirra hjóna uppá með ósæmilegu hátterni. 

Það verður fróðlegt fá fregnir af því hvernig aðfangadakvöldið fer í sæmdarhjónin og hvort þeim tekst að rétta sig nægilega af áður en klukkur landsins hringja inn jólin.

Skotið á hurð í Bústaðahverfi

Hörmulegur atburður á Ísafirði í gærkvöldi

Í gærkvöldi varð sá hörmulegi atburður á Ísafirði að köttur sá er kallaður er ,,jólakötturinn," og er á stærð við fullorðinn griðung, veiddi sér sjö ára barn til matar. Talið er að köttur þessi hafi komið innan úr Ísafjarðardjúpi og hafi orðið lítt til fanga þar um slóðir og verið orðinn mjög hungraður er hann bar að garði í Ísafjarðarkaupstað. Þeir sem urðu vitni að veiðiskap kattarins eru sammála um að hann hafi borið sig líkt að og þegar venjulegur heimilisköttur jagar sé mús eða rottu sér til gottgjörelsis og heilsubótar.

Hafði ekki húmor fyrir gamanleik

Ætti mikið frekar að biðja aðra afsökunar

Björn Valur Gíslason komst inná Alþingi á atkvæðum sem fólk greiddi Vinstrihreyfingunni grænu framboði. Fljótlega eftir að Björn Valur hafði skáskotið sér inná hið háa Alþing kom í ljós að þar fór þingmaður útgerðarfélagsins Brims og LÍÚ. Innan þingflokks VG gerðist þessi skrýtni náungi helsta búrtík Steingríms J. og flokkseigendafélagsins ásamt hinum kýrskýra Árna Þór Sigurðssyni. Og saman hafa endemin Steingrímur, flokkseigendafélagið, Árni Þór og Björn Valur klofið VG til að þóknast kapítalistunum, AGS, LÍÚ, SA, fjármagnseigendum og samtökum um endurreisn gamla Íslands. Á þessum alvarlegu hlutum væri Birni Val og hans sálufélögum í VG-klofningnum nær að biðja kjósendur VG afsökunar á í stað þess að liggja hundflatir í ausökunarkasti fyrir skítugum löppunum á hrunasteggjum og Samherja eins og Kristjáni Þór Júlíussyni. En það er víst borin von að svo verði.

Sagði ekki Pétur þríhross, þegar hann var í stuði, að hann væri bæði sósíalist og skú fanen gale mæ ingen islandsmann ?

Biður Kristján Þór afsökunar

Rangt, Saari minn, rangt. VG vill ekki losna við Lilju.

Það er heldur langt seilst hjá Þór Saari að fullyrða að VG vilji losna við Lilju Mósesdóttur. Hið rétta er að  það er einungis hið hægrisinnaða flokkseigendafélag VG, ásamt búrtíkum og dekurdýrum þess, sem vilja losna við Lilju. Almennir flokksfélagar og kjósendur VG standa með Lilju.

Og umrætt flokkseigendafélag og vesalingar þess vilja losna við fleiri úr VG en Lilju Mósesdóttur. Ögmundur Jónasson, Jón Bjarnason, Guðfríður Lilja, Atli Gísla og Ásmundur Einar eru líka á dauðalistanum hjá flokkseigendafélagi Steingríms, Álfheiðar piff og Svavarsfjölskyldunnar. Sömuleiðis er fjöldinn allur af óbreyttum flokksfélögum á dauðalistanum hjá elítunni.

Þannig er nú það.

Í stöðunni eru aðeins tveir leikir: Að hið hægrisinnaða klofningslið með Steingrím J. í fararbroddi hverfi á braut, eða að vinstri armurinn segi skilið við klofningsliðið og flokksræningjana og stofni ný stjórnmálasamtök. Hin nýju samtök gætu sem best borið nafnið ,,Alþýðufylkingin.

2

„VG gera allt til að losna við Lilju“

Krataeðlið segir til sín

Eitthvað er þessi Jónína Rós, sem sögð er vera þingmaður Samfylkingarinnar, á hliðinni varðandi einelti og óþverraskap þessarar sömu hægrisinnuðu Samfylkingar á hendur heiðarlegu og róttæku fólki í VG. Þó svo að þessi nýuppfundni þingmaður, Jónína Rós, sé ekki í sambandi við umheimin, þá hafa alvarlegar íhlutanir Jóhönnu Sig og fleiri Samfylkingarhöfðingja í málefni VG ekki farið fram hjá venjulegu fólki útí í þjóðfélaginu.

En þar sem krataeðlið grundvallast á fylgispekt við kapítalismann, óheiðarleik og almennum pólitískum krypplingshætti, er svo sem ekki við öðru að búast úr herbúðum hinnar rótfúnu Samfylkingar.

Jónína Rós segir ekki um níð að ræða

Hin kýrskýra blók hefur baulað út

Það er rétt á mörkunum að það sé verjandi að eyða prentsvertu og tíma á ómerkingsdindil eins og Árna Þór Sigurðsson. Það er eins og hvert annað ólán að þessi auma blók skuli af einhverjum ástæðum hafa álpast útí stjórnmál og enn verra ólán að skepnan skuli hafa lent undir verndarvæng Svavarsfjölskyldunnar og í framhaldi af því gerst önnur helsta búrtík hins siðlausa formanns úr Þistilfirði ásamt Birni nokkrum Vali, sem situr á þingi fyrir útgerðarfélagið Brim og LÍÚ.

Það er alveg dagljóst og kýsrskýrt, einkum kýrskýrt, að Árni Þór á ekki heima í vinstriflokki af nokkru tagi, allra síst flokki sem heitir Vinstrihreyfingin grænt framboð, enda var Árni Þór víðsfjarri þegar sá flokkur var stofnaður. Í þá daga var hin kýrskýra blók að basla í Samfylkingunni, en þar á bæ þótti hann svo ómerkilegur og tækifærissinnaður að honum var ýtt til hliðar eins og hverjum hverjum öðrum óþrifum.

Árni Þór, Björn Valur, Svandís Svavars, Steingrímur J. og  Álfheiður Ingadóttir ættu að sjá sóma sinn í að hypja sig úr VG á stundinni, helst fyrir hádegi í dag. Íslenskir sósíalistar hafa engin efni á að burðast með jafn fráhrindandi auðvaldslík í lestinni. Við höfum fengið nóg af klofningsliði eins og ykkur.

Óhætt að trúa fréttinni

Gakktu í Framsókn og gamnaðu þér við ...

Steingrímur J. Sigfússon er meiri vinur ASG en íslenskrar alþýðu; hann er miklu meiri vinur sægreifanna og kvótakónganna en verkafólksins sem þeir arðræna; honum er margfallt meira umhugað að hafa ráðherrastól undir rassinum á sér en að standa við stefnu VG varðandi Evrópusambandsaðild; honum geðjast mun betur að því falla í ónáð þeirra sem vilja raunverulegar og gagngerar breytingar á þjóðfélaginu en að styggja auðvaldið með því að berjast á móti því að íslenskur almenningur borgi Icesave-glæpi þess.

Þessi viðhorf Steingríms hafa svo sannarlega flokkast undir ,,visst" áfall fjölmargra liðsmanna og kjósenda VG.

Nú, þegar þessi stórundarlegi, að ég ekki segi nauðaómerkilegi, stjórnmálamaður hefur svo gott sem vísað þremur alþingismönnum VG úr flokknum og veit minnsta kosti þremur til viðbótar sem eru á sömu línu og Lilja, Atli og Ásmundur, er komið að leiðarlokum í VG. Vinstri armur VG, sósíalistarnir, verkalýðssinnarnir munu lifa góðu lífi áfram án Steingríms, Álfheiðar og Svavarsfjölskyldunnar, innan VG eða utan.

Steingrímur getur auðvitað haldið áfram í ríkisstjórn þó uppundir helmingur þingflokks VG hverfi á braut. Þingflokkur Framsóknarflokksins bíður í forstofunni eftir að komast uppí hjá Steingrími og Jóhönnu eftir að þau hafa rekið Ögmund Jónasson og Jón Bjarnason öfuga útúr á Stjórnarráðinu.

Já, Steingrímur minn J. Sigfússon, ráð vil ég yður gefa: Gakktu í Framsókn og gamnaðu þér við að geta uppá hvað þú átt marga mánuði eftir með ráðherrastól undir rassinum. Það er hæfileg iðja fyrir mannkynsfrelsara eins og þig. 

Visst áfall segir Steingrímur

Flaggstöng sjálfstæðismanna á Akureyri

Sá sem ók á fánastöngina á Akureyri var enginn annar en stórvinur okkar allara, Kolbeinn Kolbeinsson skrifstofustjóri, en hann og eiginkona hans voru að koma úr ærslafengnu jólaglöggi Sjálfstæðisflokksins þar nyrðra. Málsatvik vóru á þá leið, að sjálfstæðismenn á Akureyri, með útgerðarburgeisa í broddi fylkingar, buðu sjálfstæðisfólkinu frú Ingveldi, sem á í vændum mikinn frama innan flokksins einkum ef Torgerður Katrín segir af sér, og manni hennar Kolbeini Kolbeinssyni til samdrykkju á jólaglöggi í tilefni af fæðingarhátíð frelsarans. Skipti engum togum að allir góðborgarar Sjálfstæðisflokksins á Akureyri urðu drullufullir á svipstundu ásamt frú Ingveldi og Kolbeini. Kom þar loks drykkjulátum að akureyrskir sjálfstæðismenn vörpuðu Kolbeini Kolbeinssyni á dyr vegna þess að hann vildi varna þess að sjálfstæðismaður nokkur þar að norðan fíflaði frú Ingveldi inni á klósetti. Ætlaði Kolbeinn að aka brott frá samkvæmisstað en var svo ólánssamur að keyra af fullum þunga á flaggstöng sjálfstæðismanna á Akureyri sem brotnaði í tvennt og skall í götuna ásamt fánanum af ránfuglinum.

Ekið á fánastöng og inn í garð