53 brotlegir frjálshyggjumenn.

Þeir hafa aldeilis verið úti að míga um helgina ekkesen frjálshyggjudólgarnir okkar. Það ætti hiklaust að setja útgöngubann á þennan þokkafénað um helgar, svo skikkanlegt fólk geti verið á ferli óáreitt. Af þessum fimmtíu og þremur ruddum eru aðeins tvær frjálhyggjukonur, sem sýnir og sannar, svo ekki verður um villst, að konur eiga enn langt í land með að ná körlum í að míga uppum veggi. En ég geri  ráð fyrir að kjarnorkukvendi eins og Sóley Tomm fílí-bomm-bomm-bomm kippi þessu atriði í liðinn og að sama tíma að ári verði konur orðnar jafnokar karla í að míga á veggi.

Fimmtíu og þrír brutu gegn lögreglusamþykkt

Jón Baldvin formaður Ungra Jafnaðarmanna.

Það held ég sé harðla lítið púður í því hjá Ungum Jafnaðarmönnum að dubba Önnu Pálu Sverisdóttur upp í embætti formanns samtaka þeirra. Fyrir nokkrum árum var þessi sama Anna Pála ein af þessum litlausu og steingeldu ungliðum VG sem fráleitt er að búast við nokkru af á stjórnmálasviðinu. Nær væri Ungum Jafnaðarmönnum að taka Jón Baldvin Hanníbalsson til formanns því ég held satt að segja að hann sé mikið yngri en þessi háöldruðu ungmenni sem slæðast með veggjum í sölum svokallaðra ,,ungra jafnaðarmanna".

Anna Pála býður sig fram sem formaður Ungra jafnaðarmanna

Mannkynið mjólki sig sjálft en ekki varnarlausar kýr.

Það setur að mér hroll að lesa, að met hafi verið slegið í mjólkurframleiðslu. Fyrr má nú vera skepnuskapurinn að nytja mjólk úr öðrum dýrategundum sér til framfærslu. Ef einhver hefur ekki vitað það fyrir, þá er kúamjólk ætluð kálfum, afkvæmum kúanna, til matar og drykkjar á fyrstu mánuðum ævi þeirra en ekki mannfólki. Ef mannkynið getur ekki án mjólkur verið, ætti það að mjólka sig sjálft og laga úr þeirri mjólk skyr og osta eftir vild sinni, en látu önnur dýr í friði til þessarar miður þokkalegu iðju.

Met sett í mjólkurframleiðslu

Gleymdu stuðningi við Gissur Pé.

Það hefur greinilega verið glatt á hjalla hjá blessuðum framsóknarungunum í miðstjórn SUF um helgina. Þeir sakna greinilega hörmungatímabilsins þegar Davíð Oddsson og Halldór Ásgrímsson stunduðu einræðisstjórnarfar á Íslandi; ösluðu m.a.s. út í stríð með Georgi Bush. En hvað sem líður grátbólgnum söknuði ungra frasóknarmanna, sem harma liðna tíð og sinn ástsæla foringja H. Ásgrímsson, þá finnst mér að það vanti tilfinnanlega stuðningsyfirlýsingu við Gissur Pétursson forstjóra Vinnumálastofnunar í ályktunna. Gissur var nefnilega í eina tíð formaður ungra framsóknarmanna og naut ástríkis Halldórs Ásgrímssonar stríðsgarps og hlutahafa í Skinney-Þinganesi. Þeim hefði líklega verið nær að vanda sig meira og drekka minna, hinum ungu framsóknarmönnum, þegar þeir voru að sulla ályktunarnefnunni sinni saman á Sauðárkróki.

SUF lýsir yfir áhyggjum af stefnuleysi ríkisstjórnarinnar

Snobbútrásir og aðrar útrásir.

Þær eru margar útrásirnar nú til dags. Og nú er hvorki meira né minna en Menningarútrás í vændum !!! Og þá líklega undir forustu pilsaþyt hinnar háborgaralegu glanspíu sem vermir stól mentmálaráðherra þessi dægrin. Við verðum bara að vona að hin menningarlega útrásarskúta borgarastéttarinnar farist ekki í hafi milli Færeyja og Shetlands, þó að það væri enginn skaði út af fyrir sig. 

Ég var loksins að gera mér grein fyrir, að fyrir margt löngu var ég þátttakandi í heilmiklu útrásarævintýri. Það var löngu áður en innantómir jakkafatastrákar með vatnsgreitt hár fundu ,,útrásina" upp. Útrásin sem ég og félagar mínir tókum þátt í gekk út á veiða síld í Norðusjónum og Skagerak og selja síðan í erlendum höfnum. Þetta þótti sjálfsagt mál og var kallað að ,,vera á síld í Norðursjónum." Í dag væri slík iðja eflaust kölluð ,,síldarútrás" eða ,,fiskveiðiútrás" eða eitthvað álíka heimskulegt og vitlaust. 

Menningarútrás í vændum

Öfgahægrimenn eru varasamt illþýði.

Hvert sem litið er, á því herrans ári 2007, glittir í ýmsar tilhneigingar sem ættaðar eru úr smiðju öfga-hægrisinna. Stórvaxandi yfirgangur auðvaldsins á alheimsvísu, með hroðalegri barnaþrælkun og þvíumlíku, er eftir vill gleggsta birtingarform þessa óþverra. Þá er kynþátta- og trúarbragðahatur vaxandi og virðast prímusmótorar öfga-hægrihyggjunnar kynda sem mest þeir mega undir þá óheillaþróun. Það kemur því ekki mjög mikið á óvart þegar borgarleg glanspía á Þýskri sjónvarpsstöð skuli hafa slysast til að lofsyngja nasístískt fjölskyldulíf og einmuna glæsilegt gildismat þess. Þess ber að geta að helstu boðberar öfga-hægristefnu á Íslandi kalla sig gjarnan frjálshyggjumenn og reyna oftar en ekki að slá ryki í augu fólks með vatnsgreiddri jakkafataframkomu. 

Þýsk sjónvarpsstjarna rekin fyrir að vegsama fjölskyldugildi nasista

Hægri öfgastefna óganar mannkyni.

Þar kom að því að Ísraelskir nýnasistar komust undir manna hendur og mega nú Íslenskir flokksbræður þeirra af Ný-Frjálshyggjukynstofni hafa áhyggjur af afdrifum þeirra. Uppgangur hægri öfgastefna í heiminum á undanförnum árum er mikið áhyggjuefni, sem mannkynið í heild, og þá ekki síst alþýða manna og samtök hennar, verður að fara að taka á. Fasismi dagsins í dag er slóttugri en áður fyrr. Hann birtist gjarnan sparifataklæddur með bros á vör og kallar sig ny-frjálhyggju eða eitthvað því um líkt. En undir fáguðu yfirborðinu er nákvæmlega sama mannfjandsamlega villidýrið og áður. Villidýrið sem valdið hefur meiri skemmdarverkum á mannlegu samfélagi en nokkuð annað. 

Ísraelskir nýnasistar handteknir

Reykjavíkurlögreglan og vilji Drottins Alsherjar.

Af hreystiverkum lögreglunnar í Reykjavík í nótt og fyrrinótt, ber hæst atlaga þeirra að fólki sem annaðhvort var mígandi utan í  veggi, utanhúss, eða pissandi á götur og gangstéttir. Auðvitað vita allir, að þetta átak lögreglunnar ákaflega þarft og skemmtilegt. Hinir eru eflaust færri sem gera sér grein fyrir, að með því að stoppa hlandstand fólks utanhúss, er lögreglan blátt áfram að reyna að koma í veg fyrir, að almenningur brjóti gegn vilja Drottins sjálfs Alsherjar. Vilji Drottins Alsherjar í þessum efnum er skýr, því orðrétt segir hann við Elísa spámann í annari konungsbók Biblíunnar: Bölvaður veri Jeróbóam, hann sem pissaði upp við vegginn. Með glæsilegum tiltektum sínum er stjörnulögeglustjórinn í Reykjavík, ásamt störnuvarðstjórum sínum, blátt áfram að varna þess, að óforsjálir einstaklingar fari fyrir óvitaskap í verri staðinn. 

Um 120 útköll hjá lögreglunni á höfuðborgarsvæðinu í nótt

Prestur jarðsöng gamla fjárrétt.

Það er mér bæði ljúft og skylt, að óska Skagfirðingum innilega til hamingju með nýju réttina þeirra í Deildardal. Aðvitað var full ástæða fyrir sóknarprestinn, síra Gunnar Jóhannesson, að stökkva vígðu vatni á réttina, ásamt með að hafa yfir blessunarorð og bæn um að hundar og bændur sitji á strák sínum framvegis og stilli slagsmálum sínum  í hóf í viðurvist nýju réttarinnar. Gömlu réttina, sem andaðist södd lífdaga á síðasta ári, jarðsöng síra Gunnar, eins og menn muna að viðstöddu mikilu fjölmenni. Er það talin ein fegursta athöfn sinnar tegundar bæði fyrr og síðar í Skagafirði.

Ný rétt tekin í notkun í Deildardal

Vandamálið Gissur Pé. lendir í AFLI.

Stjórn AFLS á Austurlandi á víst einskis annars úrkosta en að svara skætingnum í umskiptingnum sem gegnir stöðu forstjóra Vinnumálastofnunar. Reyndar kemur mér mjög á óvart að Gissur Pétursson, sem er framsóknarmaður að atvinnu, skuli yfir höfuð hafa rumskað, því ég hélt satt að segja að hann væri helst til of værðarfullur og dofinn til þessháttar afreka. 

Stjórn AFLS boðuð á aukafund vegna ummæla forstjóra Vinnumálastofnunar