Ýttu bifreið fram af bjargbrún sér til skemmtunar

Ég er nú frekar þeirrar skoðunnar að hinir eftirsóttu erlendu ferðamenn hafi ýtt skrjóðnum fram af brúninni sér til skemmtunar; langað til að sjá hvernig vagninn liti út þegar hann væri kominn ofaní Ljótapoll. Ekki þarf að efa að hinir skemmtanavöndu túristar hafi hlegið hátt og innilega þegar þeir horfðu á eftir bílnum skondrast niður grjóturðina og fara í klessu. En eitt er víst: þarna var á ferðinni fólk sem kann að ferðast og skemmta sér á árangursríkan hátt.

Bíll féll fram af

Þórunn tók Húsvíkinga ærlega í gegn í kvöld

Samkvæmt mínum áreiðanlegu heimildum tók Þórunn Sveinbjarnardóttir álvíkingana á Húsavík svoleiðis í gegn á fundinum í kvöld, að þeir hlupu skrækjandi úr húsi af skömm eins og halaklipptir hundar. Er það mál manna, að aldrei hafi nokkur kona á Íslandi gjörsigrað fullt hús af fólki í kappræðum á jafn innilegan og sannfærandi hátt og Þórunn umhverfisráðherra gerði þessa örlagaríku kvöldstund. Þessa stundina liggja, að því er fregnir herma, allir helstu álsköndlar Húsavíkur grátandi og miður sín undir einhverjum helvískum moldarbakka þar nyrðra og sleikja sár sín, sem flest eru djúp. Þar með er næsta víst að ekkert verður af álveri á Bakka - sem betur fer.

Þórunn ræddi við Húsvíkinga

Utanríkisráðherra brigslar mönnum um landráð

Efirfarandi er haft eftir frú Ingibjörgu Sólrúnu Gísladóttur utanríkisráðherra: ,,Samfylkingin talaði fyrir því á sínum tíma að óháð rannsóknarnefnd yrði fengin til að skoða allan feril málsins gagnvart íslenskum stjórnvöldum.  Inibjörg Sólrún Gísladóttir segir hinsvegar aðalatriðið nú, að stuðningurinn hafi verið ólögmætur og framhaldið tilheyri sögunni og sé viðfangsefni sagnfræðinga."

Það er ekki hægt að skilja þessi orð frú Ingibjargar á annan veg, en að hún sé að brigsla þeim stóðu að stuðningi Íslands við árásina á Írak um landráð. Að veita stuðning af þessu tagi er mjög alvarlegt mál og eiginlega ótækt að enginn hafi verið látinn sæta ábyrgð vegna þess. Það hlýtur því að vera rökrétt að álykta, að utanríkisráðherra láti kné fylgja kviði og taki Írakshneykslið fyrir sem landráðamál, sem ljúki með því að einhverjir fái að heyra lásinn og slána glymja að baki sér austur á Litla-Hrauni.
 

Röng og ólögmæt ákvörðun

Tókst að merja drukkna Þjóðverja

Það var með naumindum að Íslendingum tókst að hafa kófdrukkna Þjóðverjana undir í leiknum áðan - en erfitt var það. Hefðu þýsku fylliraftarnir verið alsgáðir hefði áreiðanlega ekki þurft að spyrja að leikslokum.

Ísland fór hamförum gegn Þjóðverjum

Henti Bub á fjóshauginn því kýrnar þoldu hann ekki

Kunningi minn einn, sem er af standi kúabænda, hefur rekið tónlistarhöll fyrir nautgripi sína til fjölda ára. ,,Þetta var framanaf mikil þróunnarvinna," segir kunningi minn því hann komst fljótlega að því að kýrnar voru framúr hófi vandfýsnar á tónlist. Hann kvaðst hafa gert tilraun með að spila Bub Morteins yfir kúnum í belg og biðu með þeim afleiðingum að kýrnar trylltust og bauluðu Bub bókstaflega niður og nytin í þeim féll um 60%, þær þoldu ekki kapítalistablúsinn. ,,Þá henti ég Bubi á fjóshauginn og hann hefur verið þar síðan," fullyrðir þessi snjalli kúabóndi og leynir ekki óbeiti sinni á Bubstímabilinu í fjósinu. ,,Það var ekki fyrr en mér hugkvæmdist að spila sósíalíska byltingarsöngva fyrir beljurnar, að þær tóku við sér og fóru að mjólka svo útaf hefur flætt síðan."

Tónelskar kýr í risafjósi

Uppgjör við Halldórstímabilið verður að fara fram, annars ...

Neinei, er ekki nema hinn helmingurinn af Davíð Oddssyni raknaður úr rotinu - og man ekki neitt fremur en fyrri daginn. Ekki kemur heldur fram í viðtali mbl.is við framsóknargoðið hvernig á því stóð að Ísland lenti á lista þeirra þjóða sem ólmar vildur sjá blóð og hörmungar í Írak - enda man hann það varla fremur en annað. Ef Halldór og Davíð hefðu séð eitthvað athugavert við veru Íslands á blóðlistanum hefðu þeir að sjálfsögðu látið fjarlægja nafn þess umsvifalaust, en það gerðu þeir ekki, þvert á móti vörðu þeir skömmina með kjafti og klóm enda voru þeir jafn viljugir og Georg Bush að fara með báli og brandi á hendur Írökum.

En þó að ég hafi haft megnustu fyrirlitningu á ríkisstjórn Dvíoddssonar og Halldórs Ásgrímssonar, þá get ég ekki annað glaðst yfir að sjá hve glæsilega Halldóri tókst að skilja Framsóknarflokkinn eftir í rúst, traustu rúinn og í kalda koli. Ástæðan fyrir hruni Framsóknarflokkisns liggur svo sem í augum uppi: Halldóri tókst á undraskömmum tíma að breyta gömlu Framsóknarmaddömunni úr velviljaðri félagshyggju- og samvinnufrú, meira að segja dálítið sósíalískri á góðum stundum, í harðsvíraðann og gráðugan eiginhagsmunasegg sem vílaði ekki fyrir sér að þjóna sérhagsmunum fárra útvalinna ribbalda á kosnað almennings í landinu. Ef framsóknarmenn vilja í einlægni koma í veg fyrir að flokkurinn þeirra þurrkist hreinlega út á næstu árum, verða þeir að gjöra svo vel að fara í allsherjar uppgjör við Halldórstímabilið og sópa út öllu sem tengist formanninum fyrrverandi og nánustu taglhnýtingum hans.   

 

Kannast ekki við samskipti við Breta

Hvenær tökum við Færeyjar?

Hvað er nú helvítis krypplingsfóstrið Gorgur Búsh að steyta görn framan í Rússa útaf Georgíuævintýrinu? Ég held að karlandskotanum væri nær að þvo eitthvað af blóði írakskar alþýðu framan úr trýninu á sér, fremur en reyna að burðast við að setja ofan í við Pútin og félaga þó þeir prófi græjurnar aðeins á nágrönnum sínum.

En meðal annarra orða: Hvenær eigum við Íslendingar að fara með vopnavaldi á hendur Færeyingum, taka ærlega í lurginn á þeim og innlima þá undir hið Íslenska ríki? 

Bush aðvarar Rússa

Bersöglismynd um forleik að getnaði

Bölvaður óþverri er þetta. Hvernig getur nokkur lifandi maður, nú eða kona, lagst svo lágt að skrifa skítugan róman um Múhameð spámann og eiginkonu hans. Svona geðslegt tiltæki er hliðstætt því að eitthvert illmennið (eða illkvendið) tæki sig til og gerði bersögliskvikmynd um forleikinn að getnaði Frelsarans. Ég er algjörlega á móti listiðnaði sem gengur útá að hræra saman á óviðurkvæmilegan hátt, viðbjóðslegri lostasýki og heilögum trúarbrögðum milljóna og aftur milljóna manna. Þeir sem slíkt gera eru Guði viðurstyggð og verður í eldsofninn kastað.

„Ljósblátt klám“

Í stjórnmálasamband við Sigurð P. Ísmann

Það er framúrskarandi gleðilegt hve Ingibjörg Sólrún er allt í einu farin að hugsa stórt í starfi sínu, en hún hefur fram að þessu látið sér nægja vatnsgrautarpólitík og músarholusjónarmið. En nú hefur blessunin rifið sig uppúr lágdeyðunni og vesaldómnum og boðar að þessu sinni beinskeytt og milliliðalaust stjórnmálasamband við Austur-Grænland þar sem Sigurður Pétursson Ísmaður ræður, eins og kunnugt er, ríkjum og er allt í senn: kóngur, keisari og konferensráð. Auðvitað verður frú Ingibjörg að fara að öllu með gát í samningaviðræðum um væntanlegt diplómatasamband Íslands og Austur-Grænlands því ef hún gerir það ekki mun Ísmaðurinn ekki teja eftir sér að lýsa yfir stríði við Íslendinga og fylgja því eftir með vopnavaldi af fullum þunga. 

Vilji til aukins samstarfs við Austur-Grænland

Átti að myrða Tona í Klöpp?

Mér segir svo hugur um að á föstudagskvöldið hafi átt að binda enda á feril Tona í Klöpp, í sitt skipti fyrir öll, með því að kæfa hann uppi á sviði á útsmogin og lúalegan hátt. Það hefði áreiðanlega orðið saga til næsta bæjar ef hetjan Toni hefði verið borinn dauður út úr Egilshöll áður en tónleikar hans höfðu runnið sitt skeið. Ég neita því ekki að svo velheppnað morð hefði orðið gífurlega góð landkynning fyrir Ísland og komið því verðskuldað á heimskortið, en að sama skapi hefði slík niðurstaða ekki komið sér eins vel fyrir Tona í Klöpp eins og flestir sæmilega greindir menn gera sér væntanlega grein fyrir.

Kæfandi hiti á Clapton