Ferjuslysið og fjármálaráðuneytið - hvar er sökudólgurinn?

Hmmm ... er verið að gefa í skyn að sökudólginn í ferjuslyssmálinu sé að finna í fjármálaráðuneytinu? Er hringurinn máske farinn að þrengjast um hinn seka? Hvað vilja ungtyrkirnir í SÚS gera við hinn seka? ... eða Geir Haaarde? Þessi skemmtilegheit eru sannarlega farin að líkjast slökum sakamálareifara.

Segir fjármögnun Grímseyjarferju innan fjárreiðuheimilda

Grátur og minnisleysi SÚS-barnanna.

Það er naumast barnsgráturinn að þessu sinni úr kverkunum á litlu stuttbuxuðu sperrileggjunum í Sambandi ungra sjálfstæðismanna. Og nú hrína gersemin út af meintu aga- og ráðdeildarleysi forstöðumanna ríkisstofnanna og vilja reka forstöðumennina eins og hunda úr störfum sínum. Af einhverjum ókunnum ástæðum hefur grátkór SÚSara láðst að geta þess, að viðkomandi forstöðumenn er yfirleitt pólitíkst ráðnir beint af Sjálfstæðisflokknum eða af undirlagi hans. Þá gleyma SÚS-börnin ennig að minnast á, að það hefur löngum verið plagsiður foreldra þeirra í Stóra-Flokknum að halda ríkisstofnunum í viðvarandi og vísvitandi fjársvelti. Ekki er auðvelt að gera sérgrein fyrir hvort gleymska SÚS-rindlanna er vísvitandi eins og fjársvelti foreldrana, eða hvort minnisleysið stafar af einhverjum eðlislægum skorti eða sjúkdómi, t.d. Alsheimer.

SUS harmar agaleysi við framkvæmd fjárlaga

Bann við fjölkvæni er brot á mannréttindum.

Það er skemmtilegt til að vita, að kona í Saudi-Arabíu skuli hafa gifst tveimur körlum, en með því sýnir hún, svo ekki verður um villts, að þar er alminnilegur fémínísti á ferð. En því miður er fjölkvæni kvenna í Saudi-Arabíu bannað með lögum eins og á Íslandi. Það er svo kapítuli út af fyrir sig, að árið 2007 megi ekki hver og einn giftast eða kvænast eins mörgum og þeim sýnist. Það er sorglegt til að vita, að mannréttindi skuli svo gróflega þverbrotin á fjölkvænissinnum og raun ber vitni. En það kemur eflaust bráðlega að því að fjölkvænissinnar stofna sín samtök til að berjast fyrir sjálfsögðum réttindum sínum með gleðigöngum og öðru því um líku.

Á yfir höfði sér dauðadóm fyrir að giftast tveimur körlum

Nútímalegt ljóðmæli geta verið snilldin ein.

Vínrauður himininn gín yfir séméntsgrátt grasið.

Gulgræn slepja lekur hægt niður rúðuna.

Unglingsstúlkan kreistir ógeðslega graftarbólu á hökunni á sér.

Sambýlismaður hennar rorrar í hægindastólnum, nær fótavistarlaus af eiturnautn.

Þefurinn yfirþyrmandi.

Eðlurnar skríða hvatvíslega út og inn um opna gluggana.

Stegginn frá baðherberginu leggur með gólfinu út um allt hús og stígur upp með veggjunum.

Ókennilegir fuglar byrgja sýn til austurs.

Úr suðrinu andar hrímþoku ásamt með rotnunar- og fúkkalykt.

Tíminn heldur áfram.

Og svo er kominn annar dagur og regnið sem þá fellur er eins og tjara.

Síðan óvíst hvort fleiri dagar verða gefnir út.

Þau eru ekki öll eins Glitnishlaupin.

Mikið ósköp á upphafið að kvæði Einars Benedikssonar, Skriflabúðin, vel við gjörðir bankanna, þegar auglýsingaskrumi þeirra og ,,rausnarskap" sleppir og alvaran tekur við. 

Okrarans höfuð, hrokkið og grátt,

hvimaði´um syllur og snaga.

Melrakka-augað var flóttaflátt,

flærðin rist í hvern andlitsdrátt

og glottið ein glæpasaga. -

 

Glitnir hækkar vexti á íbúðalánum

Þvagleggsvinnubrögð lögreglu ekki rannsóknarverð!!!

Heldur betur virðast þeir vera geðugir í tiltektum við vinnu sína lögæslumennirnir sem lúta stjórn rólíngstónslögreglustjórans Ólafs Helga Kjartanssonar, sem er auk lögreglustjórastarfans á Selfossi, stjörnusýslumaður og fjölmiðlavænn í betra lagi. En í meðfylgjandi frétt bregður svo við, að lögreglustjórinn Ólafur Helgi stjörnusýslumaður villist af vegi í samtali við fjölmiðla og keyrir hiklaust út í skurð ef svo má segja. Stjörnusýslumaðurinn hrósar nefnilega happi, samkvæmt fréttinni, í aðsteðjandi vandræðum og lýsir því keikur yfir, að ríkissaksóknaraembættið hafi vísað frá kæru konu nokkurrar sem kærði undirmenn Ólafs Helga fyrir heldur betur skuggalegar aðfarir í samskiptum þeirra við hana. Nú er ég þar með ekki að fullyrða, að kæra konunnar sé alfarið á rökum reist, enda var ég ekki viðstaddur handtöku hennar. Hinsvegar þykja mér viðbrögð ríkissaksóknaraembættisins ábyrgðarlaus og óviðfeldin. En með því að lýsa yfir, að ekki sé grundvöllur fyrir að hefja rannsókn á þessu einkennilega máli, er embætti ríkissaksóknara í raun og veru, að dæma konuna sem kærði lygara og óheilindamanneskju - eða hvað? Mín skoðun er sú, að ríkissaksóknaraembættið eigi að rannsaka þetta mál, burtséð frá öllum grundvöllum sem embættinu dettur í hug að skjóta sér á bak við til að afsaka aðgerðarleysi sitt. 

Konu haldið niðri og þvagsýni tekið

Pílagrímaflug til Himnaríkis.

Það er andskotakornið lítið púður í að fljúga eins og halklipptur hundur frá Róm til Lourdes á Frakklandi í guðlegum erindagjörðum og sýnir best hvað páfinn og hans menn hugsa smátt og lágt. Ef einhver heilagleikabragur væri á þeim þarna í Páfagarði myndu þeir setja stefnuna beint á leiguflug til Himnaríkis þar sem pílagrímarnir fengju að sjá ásjónu Drottins millilialaust. Ég er viss um bænheitir kappar á borð við Gunnsa í Krossinum, Davíð í Seðlamusterinu og Björgólf í Landsbankareglunni væru fljótir að panta sér pílagrímaferð til Himnaríkis með leiguflugi Páfagarðs ef það væri í boði. 

Páfagarður hefur leiguflug

Guðfræði eða hagfræði?

Miðað við orðbragið á meðfylgjandi frétt, er tæplega gerlegt að sjá hvort Davíð Oddsson er að tala um guðfræðileg málefni eða hagfræðileg. Enda munurinn á þessu tvennu vart greinanlegur hjá sanntrúuðum kapítalistum. 

Davíð: Markaðurinn þráði góðar fréttir

Þeir lægst launuðu og Flóabandalagshetjurnar.

Það er svo sem gott og blessað hjá stjórn Verkalýðsfélagsins Hlífar nefna 30% hækkun lágmarkslauna í næstu kjarasamningum. Því miður stendur ekkert um það í meðfylgjandi frétt hvort Hlífarmenn eru að tala um 30% strax eða 30% á 2-3 árum eða fleiri. Einnig hvort nefnd 30% eigi að vera verðtryggð eða ekki. Annars ætti stjórn Hlífar að láta sem minnst fyrir sér fara varðandi kröfugerð til hækkunar lágmarkslauna. Verkalýðsfélagið Hlíf er nefnilega hluti af hinu alræmda Flóabandalagi sem hvað frægast er fyrir stórfellda klofningsiðju innan samtaka verkafólks. Klofningsiðju, sem valdið hefur hinum lægstlaunuðu óbætanlegum skaða. Og svo mikið er víst að flóabandalagshetjurnar Kristján Gunnarsson og Sigurður Bessason verða seint þeir bógar, að hafa getu eða vilja til að bæta fólkinu, sem heldur þeim uppi, tjónið sem flóabandalagið hefur valdið því, jafnvel þó að stjórn Vlf. Hlífar viðri sig upp við þá eins og auðsveipur hundur að húsbónda sínum. 

 

Vilja að lágmarkslaun hækki um 30%

,,Vinsælasti auðkýfingur landsins."

Í smápistlakompu Fréttablaðsins, ,,Frá degi til dags" kveður blaðamaðurinn pbb uppúr með að Björgólfur nokkur Guðmundsson, sá er þáði Landsbankann af silfurfati  Sjálfstæðiflokksins, sé ,,vinsælasti auðkýfingur landsins." Orðrétt segir pbb: ,,Er nema von að menn spyrji: hefur vinsælasti auðkýfingur landsins smekk á arkitektúr sem dugar inn í næstu öld?"

Ég verð að segja eins og er, að ég held það væri hyggilegra fyrir blaða- og fréttamenn á Íslandi, að sýna heldur þann manndóm, að fara vel og vandlega og á hlutlausan hátt ofan í saumana á hvernig menn eins og Björgúlfarnir og fleiri, hafa komist yfir jafn mikil auðæfi og völd á jafn stuttum tíma og raun ber vitni, frekar en að mæra þessa karla eins og guðlegar verur og gefa þeim innistæðulausar einkunnir eins og ,,vinsælasti auðkýfingur landsins."