Bónus-Gummi fagnar og fagnar og fagnar

Auðvitað fagnar Gummi Marteins ,sveitungi minn, húsleit Samkeppniseftirlitsins í Bónus eins og hann hafi skorað úrslitamarkið í heimsmeistarakeppninni. Ekki er að efa, að þessi óforskammaða húsleit er fréttaflutningi Ríkisútvarpsins að kenna því ekki er við fréttaflutning Baugsmiðlana sð sakast því hann hefur enginn verið, að sjálfsögðu. Það er náttúrulega afleitt, að Bónusfeðgar og annað gott fólk af sama kalíberi, sem gert hafa meira fyrir láglaunafólk er öll verkalýðshreyfing heimsins samanlögð, skuli sæta slíkum kárínum af sínum eigin löndum. Og sannast hér hið fornkveðna, að gjarnan launar kálfur ofeldið með ofbeldi. Svo er bara að vona að snápar og snuðrarar Samkeppnisstofunuar finni ekki neitt misjafnt i bókum Bónusar og Krónu, því þá mun ljóst verða að markið sem Gummi Marteins skoraði við mikinn fögnuð var sjálfsmark. 

Samkeppniseftirlitið gerir húsleit hjá Bónus og Krónunni

Ruslið á Alþingi

Það er svo sem góða gjalda vert að breyta vinnufyrirkomulagi á Alþingi, sérstaklega ef breytingarnar hafa í það í för með sér, að þingmenn eigi auðvelda með að sitja á rassinum í sínum sætum á þingfundum, en séu ekki sí-ráfandi um þinghúsið eins og vankaðir höfuðsóttargemlingar. En mest nauðsyn er þó að breyta þingmannahópnum verulega. Þegar sjónvarpið birtir myndskeið frá Alþingi í fréttatímum, þar sem myndavélin er látin líða yfir hjörðina og þannig vill til að þorri þingheims er á sínum stað, blasir við fremur ófögur sjón. Þá birtis fólki í einni sjónhending næsta einslitur hópur. Og það sem verra er: Furðustór hluti þessa hóps er fólk sem á ekkert erindi á Alþingi, eigingjarnir sérhagsmunaspjátrungar af báðum kynjum ríða þarna röftum eins og ekkert sé, staurblindir af sjáfhverfu og sjálfsánægju. Það er því nauðsynlegt að flokkarnir taki sér tak fyrir næstu alþingiskosningar, taki til í sínum ranni og reki ónytjungana og sjátrungana af höndum sér.      

Betra Alþingi

Íslendingur kaupir demant á milljarð

Það kvu vera gaman að eiga dýra demanta. Þeir sem slíkan grip hafa eignast segja, að ekkert hressingarlyf, að kókaíni og fimm stjörnu koníaki meðtöldu, geri mann jafn alsælan til sálar og líkama. Maður losni bókstaflega undan áþján tíma og rúms í þessari jarðneski leiðinda tilveru. Og engin hætta sé á timburmönnum eða öðrum fráhvörfum af vímunni sem þessháttar demantur færi manni. Ég er viss um, að sá er hreppti demantinn væna á milljarð króna á uppboði Sotheby´s er endanega sáluhólpinn frá eilífð til eilífðar. Reyndar er ekki gefið upp hvaða persóna nældi sér í hinn 84,37 karata hvíta demant. En mjög líklegt er að sá guðssonur sé frjálsborinn íslendingur, sem hafi verið á góðri leið með að yfirbugast af velgengni við rúllettuborð auðhyggjunar, en borgið lífi sínu, sálu sinni og framhaldslífi með því að leggja út milljarð fyrir lítinn stein úr hörðu efni, sem fljótt á litið líkist glerpjátri eða plastglingri. Nú er bara að vona, að við sjáum einhverjum af okkar viðkunnanlegu og ástsælu burgeisum bregða fyrir á förnum vegi með miljarðsdemantinn góða dinglandi í gullkeðju um hálsinn. 

Dýr demantur seldur á uppboði

Ráðherra hræðir börn

Það hefur verið þrifalegur fjandi fyrir blessuð börnin að fá Einsa Kr. sjávarútvegsráðherra í heimókn eins og elliæran miðaldaklerk í messuhugleiðingum. Það góða við þessa heimsókn er ,að nú vita börnin hvernig strengjabrúða LÍÚ-gengisins lítur út. Þó að það standi ekki í fréttinni, er hætt við ungmennin hafi orðið verulega skelkuð þegar gijagaurinn úr Bolungarvík hóf upp raust sína og hótaði að senda þau öll sem eitt til sjós á galeiður kvótafíklana og láta þau læra brottkast og framhjálöndun og aðra nytsama iðju. Hæstum hæðum náði þó sjávarútvegsráðherra, þegar hann bar á borð fyrir sakleysingjana að ,,sjávarútvegurinn væri skohh undirstöðuatvinnugrein íslendinga," án þess að minnast einu orði á illa launaða erfiðisvinnu í fiskvinnsluhúsum, hvað þá hann gerði glæpsamegu arðráni LÍÚ-stóðsins skil; segði þeim frá ríkisvöðum ruddaskap kvótaleigu og einbeittum brotum húsbænda sinna á kjarasamningum sjómanna. En heim fóru börnin með þá lífsreynslu að hafa séð á einu bretti ýsu, lýsu og pólitíska strengjabrúðu LÍÚ. Það kæmi mér ekki á óvart, að þessi tugur nemenda úr Lindarskóla, sem kynnti sér sjávarútveg og sjávarútvegsráðherra í gæri, þiggi áfallahjálp í dag.

Það sem Íslendingar lifa á

Tökum Færeyjar með hervaldi strax

Í dag er sorg í Færeyjum. Enda full ástæða til. Færeyingar lentu semsé í þeirri ógæfu í gær að tryggja hægri stjórninni í Danmörku áframhaldandi líf með því að álpast til að kjósa fólið Edmund Joensen á Danska þingið. Þessi forstokkaða breytni frænda okkar í Færeyjum vekur upp ýmsar áleitnar spurningar. Eigum við íslendingar t.d. að taka því þegjandi að færeyingar fari svona heimskulega að ráði sínu? Er ekki kominn tími til að við látum til skarar skríða og látum verða af því að láta gamlan draum okkar rætast og hertaka Færeyjar og innlima þær í hið íslenska lýðveldi? Það væri útrás sem talandi væri um. Auðvitað kemur ekki til mála að færeyingar fái að taka þátt í Alþingiskosningum herraþjóðarinnar, þeirra hlutverk verður að aðstoða okkur við að reisa virkjanir og álver, puða í fiskvinnslum vorum og róa til fiskjar fyrir ásættanlega þóknun fyrir vora ástsælu sægreifa og kvótafíkla. Það er því ekki eftir neinu að bíða með að senda Landhelgsisgæsluna, víkingasveitina, friðargæsluliðana og sýslumanninn á Selfossi til innrásar- og innlimunarstarfa í Færeyjum. 

Joensen tryggir Fogh meirihluta á danska þinginu

Veðravíti eineltis

Þeir eru aldeilis gamansamir þarna á Veðurstofunni þykir mér. Glæpurinn er að engu orðinn hjá þeim fyrst að það eru bara 12% sem hafa orðið fyrir veðravíti eineltis hjá stofnuninni, en ekki 28% eins og fréttastofa Páls Magnússonar og Björgúlfs tilkynnti á laugardaginn. Þar með er ljóst orðið, að Veðurstofa Íslands er blásakaus af einelti, þar sem einungir 12 af hundraði hafa verið eineltir þar innan dyra. Annars minnir þessi veðurstofugauragangur mig á Wolfgang morðingja. Eitt sinn vék maður sér að honum í samkvæmi og spurði hann afdráttarlaust, hvort það væri rétt að hann hefði drepið fimm menn um ævina. - Það er helvítis lýgi, orgaði Wolfgang þá upp yfir sig, - ég hef ekki drepið nema tvo ! Svo geta menn velt fyrir sér hvað þarf að einelta marga til að það geti kallast einelti og hvað maður þarf að drepa marga menn til að hjóta nafnbótina morðingi.

„Veðurstofan er góður vinnustaður"

Frábær árangur í áfengisneyslu

Það er alltaf ánægjulegt þegar íslendingar ná árangri á einhverju sviði. Og árangur íslendinga í alkóhólþambi er ekki bara árangur, heldur stórkostlega framúrskarandi árangur, landi og þjóð til mikils sóma. 65% aukning í faginu á aldarfjórðungi er sko engin hégómi heldur fagur vitnisburður um kraftmikið víkingablóð í æðum frjálshuga þjóðar. Kunningi minn einn, GJH að nafni, er dæmigerður íslendingur hvað þetta varðar. Hann hann hefur fylgt þróununni og bætt á sig þessum 65% í brennivíni á umræddum tíma, þrátt fyrir að vandséð væri að hann gæti í nokkru bætt um betur fyrir 25 árum síðan. En minn maður hefur sem sé sannað á glæsilegan hátt að lengi er hægt að gera gott ástand betra og betra og skilar nú sínum 158 alkóhóllítrum á ári, án nokkurra erfiðismuna.  

Áfengisneysla jókst um 65% á Íslandi á aldarfjórðungi

Kommúnistaávarpið verður jólagjöfin í ár

Óttalegir ekkesens blábjánar eru þetta í jólagjafanefndinni, að gera sér í hugarlund að GPS staðsetnigartæki verði jólagjöfin í ár. Heldur blessað fólkið, að landsmenn séu orðnir svo villtir í góðæri ríka fólksins, að enginn rati orðið hjálparlaut á milli herbergja? Ef að ég ætti að segja fyrir um jólagjöf ársins myndi ég hikaust mæla með Kommúnistaávarpinu eftir þá félaga Karl Marx og Friðrik Engels. Mörgum villuráfandi sauðinum veitti sannarlega ekki af, að eyða dögunum milli jóla og nýárs í að lesa umrætt ávarp vel og vandlega. Ekki síst ættu þeir að festa sér vel í minni síðustu sex setningar Kommúnistaávarpsins, sem eru svo hljóðandi í nafni Marx og Engels: ,,Kommúnistar hirða ekki um að leyna skoðunum sínum og ætlunum. Þeir lýsa því yfir afdráttarlaust, að takmarki þeirra verði því aðeins náð, að allri þjóðfélgsskipan verði steypt af stóli með valdi. Lofum hinum drottnandi stéttum að skjálfa fyrir kommúnistabytingu. Þar hafa öreigarnir engu að týna nema hlekkjunum. Þeir eiga heilan heim að vinna. Öreigar allra landa sameinist ! "

Jólagjöfin í ár

Kókjólasveinarnir, Björgólfur, Hannes, Finnur, Jóhannes í Bónus og Glitnir

Þeir láta ekki að sér hæða hevískir kókjólasveinarnir. Og svo ósvífnir eru þeir, að þeir kalla sig íslenskum jólasveinanöfnum eins og ekkert sé sjálfsagðara. Ef þeir kölluðu sig Björgólf í ölinu, Hannes Smárason, Jóhannes í Bónus, Finn Ingólfsson og Glitni en ekki Stekkjastaur eða Giljagaur, mætti fyrirgefa þessum eldrauðu auðvaldsþorpurum því það er alltaf viðkunnanlegara menn kalli sig nöfnum við hæfi. Svo trúi ég svona rétt mátulega, að síkáti miljónamæringurinn, sem segist heita Stekkjastaur og vera staddur í helli á Suðurlandi, hafi verið með heitt kakó í bollanum sínum þegar blaðamaður hafði samband við hann í gær. Ætli þrjóturinn hafi ekki verið með landabrugg í bollanum eins og venjulega og auk þess verið á kvennafari þegar hann spjallaði við blaðamannsgreyið. En eitt er víst: Rekist ég á kókjólasvein, sem þykist heita Kertasníkir eða Gluggagægir, fyrir þessi jól, skal sá þokkapiltur hafa meira en verra af. Ég skal sem sé taka kvikindið og innrita hann í fémínístaskor Háskóla Íslands og sjá til þess að hann eigi þaðan aldrei afturkvæmt.

Jólasveinar moka inn milljónum

Stríðsglæpamenn halda friðarráðstefnu !

Ja hvur djöfullinn ! Stríðshyskið í Wasington að halda friðarráðstefnu ! Allur andskotinn er nú til ! Það virðist algjörlega óendanlegt, hvað hægt er að ganga langt í hræsni. Það hlýtur að vera bjargföst trú illmennana Geogs W. Bush og Condom Lessu Ræs, að íbúar heimsins séu fávitar upp til hópa, ef ekki eitthvað þaðan af verra. Að þessir forhertu morðhundar skuli taka sér orðið frið í munn er nógu afleitt af þeirra hálfu, en að þau ætli að halda friðarráðstefnu slær öll met í ógeðfelldri óskammfeilni. Hvað ætli allur sá aragrúi fólks sem liggur dauður í valnum fyrir tilstilli bandaríkjamanna myndi segja um friðarráðstefnu Bush og Ræs ef það mætti mæla?

Condoleezza Rice undirbýr friðarráðstefnu